1/ Thủ tướng rajaei bahrau tabiak harak tacei pato peih bruk tong abih bhap bini hu mbaok tame khik caga taneh ia, jalan tapen negar dalam tukvak bahrau. Tui nan, Thủ tướng jao ka mintri ngak nong song patagok palei pala dang tabiak pambuak bruk song mintri quốc phòng pasang iek veik bruk quy hoạch labik daok ka bhap bini di dom xã tapen negar piah rami ramik, dong padang ngak palei pala bahrau, khik siam mekre salamat bhum tapen negar.

2/ Thun 2015 hu palih ruah lac thun an toàn vệ sinh thực phẩm, nan ye mintri ngak nông saong patagok palei pala hu pataom tame pasang iek gah chất lượng saong an toàn ngan saong pandap mbang raong glang, pandap mbang hu chất đạm saong daok labaih kháng sinh dalam pandap mbang raong glang brei hu klak nao. Cục raong glang di mintri hu pambuak bruk, tacei pato dom gah chức năng, puk palei peih bruk pasang iek dalam taneh ia ka bruk pandar janih oh brei pandar dalam pandap mbang raong glang saong ba tabiak dom jalan khik iek ka nyu siam.

3/ Bahrau ni, Kapul ngak bruk di mban tacei jalan Tây Bắc hu nao rivang song brei pandap ka dom urang kan kathaot, urang hu buh pren yava ka taneh ia song lambaok dom sang bac mầm non di 2 huyện Mường Chà song  Nậm Pồ (tỉnh Điện Biên). Pandap alin brei hu 35 boh tivi LCD, 20 pok pandap “boh hatai meh”, tui yaom jien abih tih labaih 100 triệu đồng.

4/ Pachreih tui bruk jak ba “tết ka urang kan kathaot” thun 2015 kayua UB bhap bini tỉnh Nghệ An peih tabiak, dalam dom harei akaok thun barau ini, Bộ chỉ huy quân sự tỉnh hu jak ba urang jakar chiến sỹ patak pataom jien bilan saong phụ cấp daong jaik 80 triệu đồng. Ini lac bruk ngak camereip di jabat quân sự Nghệ An, rik daong gam saong dom gah, dom puk palei daong ka dom baoh sang kan kathaot, baoh sang daok dalam sarak karja kan kandah hu điều kiện mbang tết thun anek sak pabe 2015.

5/ Tui Liên đoàn Lao động tỉnh Đồng Nai, meng harei 6/2 tal harei 13/2 (njauk tame harei 18/12 -25/12 saka ia bilan) dom pakat Công đoàn di tỉnh Đồng Nai hu brei 1.040 harak radeih ka dom urang ngak kan kathaot dok di dom tỉnh bhum taneran krong CL, gah kreih negar, gah barak piah mai palei mbang tết anek sak pabe. Urang hu brei harak radeih nan lac đoàn viên công đoàn hu rai duik kan kandah, 4 thun gam oh ka hu mai palei mbang tết hong gauk gar. Langiu di nan dom pakat công đoàn dok brei labaih 4.600 pok pandap (yaok pok yaom meng 400 ribau tal 500 ribau đồng ka dom boh sang urang ngak, đoàn viên công đoàn hu rai duik kan kandah.

6/ Piah hu ginup pandap, langiu jien daong di UB bhap bini tỉnh Trà Vinh, dom doanh nghiệp hu mbaok tame tani tanat yaom kaom dalam tỉnh daok kuhria caga labaih 462 tỷ đồng piah khik mepiah pandap pablei dalam tuk tết anek sak pabe 2015.

7/ Piah brei hu rilo janih pandap, paglong chất lượng ka phun li-u, Công ty  cổ phần xuất nhập khẩu Bến Tre dok buh jien tabiak labaih 20 triệu USD piah padang sang mac Thành Công, ngak tabiak ia liu song ia tasau liu đóng paoap pablei tabiak negar langiu. Sang mac hu padang di xã Phong Nẫm, huyện Giồng Trôm di angaok taneh prong labaih 50.000 mét vuông.

Patui di ini dom khau tin dunya:

8/ Urang vak di rayo sap ndom VN daok di Lào brei thau: thun 2014, tuai damuai du lịch mai tal Lào kuhria hu 4,2 triệu mbang urang; ralo jang jaik 10% duk saong thun 2013. Dalam nan, tuai damuai Thái Lan patrun hasit kayua bruk srau kadau chính trị, min tuai meng Hàn Quốc, Trung Quốc, Ô-xtrây-li-a mai rilo jang kayua bruk peih jalan par tapak meng Lào tal Trung Quốc saong Hàn Quốc. Taphia di nan, tuai meng Prang, Anh saong Nhật Bản jeng patagok duk saong thun 2013.

9/ Rajaei Ê-ti-ô-pi-a hu panuac ieu bhap bini dunya jak gauk dong pren klak rabha dom kan kandah ka urang tị nạn dak harei dak tagok di negar ni. Urang brei panuac di mintri ngoại giao Ê-ti-ô-pi-a Đi-na Múp-ti (Dina Mufti) brei thau, urang tị nạn meng dom negar dok jiak taphia mai tal Ê-ti-ô-pi-a dak harei dak rilo. Ni lac sa kan kandah prong ka taneh ia ni.

10/ Oh brei njuk pakao di mblang bein, sân vận động, mblang tasik; oh brei njuk pakao dalam radaih ô tô hu uranaih, taphia di nan patakik dom bruk njuk pakao dalam phim truyền hình saong điện ảnh. Nan lac panuac caong khin di akaok mintri y tế Italy. Mintri y tế taneh ia ini jeng pandar rajaei di Thủ tướng Mát-tê-ô Ren-di kak je glaong jang gac ngan saong bruk pablei salih pakao hala./.