1/ Harei kabroi di trụ sở Trung ương Đảng, Ban Bí thư peih bruk taom gaok dom urang khoa học, văn nghệ sĩ naih gheih dalam taneh ia. Ni lac mbang ka 3 gam gam, Ban Bí thư peih bruk taom gaok ni, Dom urang  dang akoak  yau ong  Tổng Bí thư Nguyễn Phú Trọng; ong Lê Hồng Anh, Ủy viên mintri Chính trị, Thường trực Ban Bí thư; ong Đinh Thế Huynh, Ủy viên mintri Chính trị, Bí thư Trung ương Đảng, Trưởng Ban Tuyên giáo Trung ương mai hu mbaok. Pok panuac di mbang taom gaok Tổng Bí thư Nguyễn Phú Trọng ndom lac. Đảng drei tuk halei jeng iek prong bruk ngak di kapul trí thức, văn nghệ sĩ song mong iek ilamu nan lac jalan salih bahrau di XH. Tổng Bí thư tadhau yhut dom urang khoa học, văn nghệ sĩ dalam negar yam tapa thun bahrau anek sak pabe kajap kro, boh sang haniem phol, hu rilo bruk ngak bahrau.

 2/ Thủ tướng rajaei barau mbaoh tangin tame danh mục Dự án “Pablak bruk khik ramik đa dạng sinh học, lagaih haong biến đổi khí hậu saong khik iek glai khang kajap cảnh quan Trung Trường Sơn VN”. Dự án kayua kadung jien môi trường toàn cầu  daong tapa gilang pariak patagok châu Á (ADB). Dự án piah khik ka nyu tamo sinh thái di dom labik khik ramik saong labik jaik taphia di cảnh quan Trung Trường Sơn di VN, ba mai kein lagaih bruk ngak mbang ka bhap bini puk palei. Tukvak peih ngak dự án tui kuhria meng thun 2015 tal thun 2018.

3/ Harei 12/2, kapul ngak bruk di Ủy ban Mặt trận negar Việt Nam kayua ong Nguyễn Thiện Nhân, Ủy viên mintri Chính trị, Chủ tịch Ủy ban Mặt trận negar Việt Nam pan akaok hu nao rivang song tadhau yhut tết Mban tacei jalan Nam Bộ song Thành ủy Cần Thơ. Ong Nguyễn Thiện Nhân tong yaom glong dom kham merat di mban tacei jalan TNB song dom puk palei dalam bruk patruh eik patrun kathaot, tagok rai duik mbang ngui dok dang ka bhap bini.

4/ harei 12/2, jabat rayo sap ndom VN daok di Tây Nguyên saong sang bac Cao đẳng văn hóa nghệ thuật tỉnh Đắc Lắc hu pambuak saong dhar Vietcom Bank di Đắc Lắc  alin hadiah 260 paok pandap tết ka mikva bangsa M’Nông di buôn BHôk, xã Yang Tao, huyện Lắc, tỉnh Đắc Lắc. Buôn Bhôk hu taong abih menuac lac urang M’Nông. 

5/ Peih danak dak “Xuân tapen negar, tết bhum glong” tỉnh đoàn Quảng Bình pambuak bruk song dom kapul ngak pahla brei labaih 2000 pok pandap, yaok pok yaom 300 ribau đồng tal 500 ribau đồng, dalam nan hu jien, har, kẹo, brah, ia tasau song dom janih karei karei brei ka uranaih hu rai duik kan kandah di labik tapen negar. Langiu di nan, Tỉnh Đoàn Quảng Bình dok peih bruk jao 500 gu bánh chưng, phui, aow, pandap bac daa dong ka anek saih kan kathaot di bhum atah bayah.

6/ Piah pabak điện tuk tết anek sak pabe 2015, điện lực tỉnh Quảng Trị hu salih bharau talei  điện  di dom jalan talei trung áp, ngak barau dom mạch vòng 22 KV saong salih dom jalan talei 35 KV tapa pandar di cấp điện áp 22 KV. Urak ini, gah điện lực tỉnh Quảng Trị daok patagok bruk pasang iek mạng lưới, khik kajap bruk pabak điện tani tanat, kein lagaih brei ka bhap bini. 

7/ Peih mbang tabung glong ka bruk khik caga trật tự an toàn giao thông tuk puac thun 2014 song tết anek sak pabe 2015, meng harei 22/12/14  tal harei 31/1/2015 gah Cảnh sát giao thông dalam negar hu pasang iek, langyah jiak 400 ribau urang vi phạm; mek  song buh ka gilang pariak karja labaih 323 tỷ đồng, khik harak adat peih radeih ka labaih 52 ribau urang. Cục Cảnh sát giao thông hu công điện 13 payua ka  Giám đốc Công an dom tỉnh, ban di Trung ương hu punuac tacei dom đơn vị công an pataom tame pasang iek radeih ô tô pajeng ba, langyah catang dom radeih nhồi nhét song mek harak radeih yaom glong dalam tuk tết nguyên đán ni.

Patui di ini dom khau tin dunya:

8/ Harei kabroi gam saong bruk mek hu thỏa thuận di  Min-xcơ (Bê-la-rút), ka bruk padeih mesruh gauk di Ucraina, kadung jien dunya saong rajaei Ki-ép jeng hu mbaoh tangin tame sanya sa thỏa thuận sơ bộ ka paok jien daong dunya yaom 40 tỷ đô la dalam 4 thun. Brei panuac di Brúc-xen( Bỉ), Tổng Giám đốc kadung jien IMF, amuk Crit-tin La-gác ndom lac, piah hu brei mesraiy paok jien doang nền kinh tế daok laik trun kayua srau kadau chính trị saong bruk mesruh gauk, Ucraina njauk ngak chip bruk saloh bharau nền kinh tế taphia di nan peih sa danak dak pacang tham nhũng. 

9/ Thủ tướng Ôxtrâylia Tô-ni A-bót (Tony Abbott) harei kabroi 12/2 hu panuac ieu brei ngak catang bruk pasang iek soi chiếu an ninh ngan saong dom urang di cư hadei di tuk cảnh sát negar ni bahrau pacang cakak hu sa mbang tấn công khủng bố. Ong A-bót hu panuac lac bhap bini Ôxtrâylia brei tỉnh táo anak dom bruk an ninh di tapen negar.

10/ Di Trung Quốc hu duah mboh urang njom cúm A(H5N6) akaok meti dalam thun 2015. Urang njom cúm A(H5N6) akaok meti ini, lac sa urang likei umo 44 thun, daok di khu tự trị Tây Tạng, tỉnh Vân Nam. Urang ruak ini hu triệu chứng: pandiak, patuk, sổ mũi di harei 27/1; tame sang iek ruak di harei  3/2. Urang ruak hu gaok cim glai metai. Harei 8/2, mẫu bệnh phẩm  di urang ruak hu duk iek brei mboh lac dương tính saong cúm A(H5N6)./.