1# Ủy ban bhapbini tỉnh Quảng Trị barau brei parabha yaom jien 77 tỉ 222 trieu đồng piah blei bảo hiểm y tế ka urang kan kathaot, urang bangsa takik, urang bảo trợ xã hội, uranaih ala 6 thun  (mbang 1 thun 2015). Bruk parabha  jien nan piah peih ngak sarak  xã hội, daong ka dom urang kan kandah hu iek ruak, khik caga pren yava siam jang.

2/ Tui sở pato megru tỉnh Quảng Nam, urak ini taong abih anek saih tal 12 lac urang bangsa takik dalam tỉnh daok kham merat ôn tập pak di sang bac piah caga tame pakacah THPT pakat negar jaik tal. Piah pachreih anek saih anek kamuan bangsa takik dalam tukvak ô tập, tỉnh Quảng Nam barau hu quyết định daong 1,3 tỷ đồng piah khik kajap sarak ka dom adei saong gru pato yau dalam tukvak bac chính thức.

3# Đề án daong sang kathaot ngak sang plaih ribuk tui harak 48/2014/QĐ-TTg harei 28/8/2014 di Thủ tướng rajaei peih ngak di tỉnh Phú Yên daok suai damuai duk saong bruk ba tabiak. Tui đề án, tỉnh daong sang kathaot padang 420 baok sang kuhria tabiak yaom jien abih tih labaih 21 tỷ đồng, dalam nan thun 2015 lac 336 baok sang, thun 2016 daong 84 baok sang. Min, urak ini, tỉnh Phú Yên barau daong padang hu 110 baok sang plaih xua ribuk, dalam nan ngak barau 96 baok sang saong ramik pasiam, paglaong tầng 14 baok sang, samu 32,74% bruk ba tabiak. 

4/ Barau ini, dalam mbang nyaom ka 27 hội đồng điều phối dunya danak dak anek menuac saong sinh quyển di UNESCO, lbhum dự trữ sinh quyển Lang Biang (tỉnh Lâm Đồng) hu gah pato megru, khoa học saong ilamu LHQ (ieu lac UNESCO) brei angan lac bhum dự trữ sinh quyển dunya. Ini lac bhum dự trữ sinh quyển dunya akaok meti di Tây Nguyên saong lac bhum dự trữ sinh quyen dunya ka 9 di VN.

5# Tui Sở ngak nong saong patagok palei pala tỉnh Đồng Nai, mintri Nông- Lâm- Thủy sản Nhật Bản barau brei adat ka baok pa –ok Đồng Nai tame darak pasal taneh ia ini. Pajaih pa –ok bo dom doanh nghiep Nhat Ban brei adat hu pala di huyện Xuân Lộc, tỉnh Đồng Nai. Urak ini, puk palei ini daok peih praong taneh pala pa –ok tui tanut chuẩn VietGAP.

6/ Harei 12/6, di ban raya HCM hu rah tabiak harei pataom tapuk yaom đặc biệt 2015 kayua Tổng cty ilamu ban raya HCM pambuak bruk saong cty patabiak tapuk ban raya HCM peih tabiak. Harei pataom tapuk parang tabiak labaih 300.000 bản tapuk, yaok ribau pandap văn phòng phẩm di rilo nhà xuất bản, cty truyền thông ilamu saong dom labik pabak dalam saong langiu taneh ia, tui yaom jien abih tih dom pandap nan labaih 5 tỷ đồng.

7# Tỉnh Trà Vinh hu labaih 30% menuac lac urang bangsa Khmer, daok rilo di bhum palei pala. Tapa 4 thun ba tabiak danakdak bruk ngak negar padang ngak palei pala barau, Trà Vinh urak ini hu 13/85 xã mek hu taong abih 19 tiêu chí padang ngak palei pala barau. Tukvak I (2011- 2015) tỉnh Trà Vinh ruah  18 xã ngak điểm tacei pato padang ngak palei pala barau.

Patui di ini dom khau tin dunya:

8/ Parang iek rup thaot di dom urang vak chiến trường hãng thông tấn Mỹ AP hu angan “VN”: bruk mesruh biak biai” ((Vietnam: The Real War) barau rah tabiak di HN. Parang iek mbang ini rik daong pahadar 20 thun pasiam veik talei pambuak bruk Việt - Mỹ saong piah patagok bruk thau gauk jeng yau talei pambuak ngoại giao di 2 taneh ia.

 9# 5 bilan akaok thun ini, jien mek tame di sang iek ruak  Chợ Rẫy-Phnom Penh, công trình pambuak bruk di Việt Nam saong Campuchia di gah y te hu tagok 36% duk saong dom bilan ini thun dahlau. Tapa nan brei mboh siam lagaih dalam bruk ngak saong brei mboh sang iek ruak hu jeng sa labik jia tame ka urang ruak di Campuchia. 

10/ Akaok UB liên minh châu Phi Dlamini-Zuma hu panuac ieu taong abih dom urang dang akaok châu Phi ngak taong abih dom bruk meda ngak hu piah padeih bruk khủng hoảng di cư dalam tuk urang châu Phi di cư tapa châu Âu urak ini jeng lac bruk suh sah di dunya. LHQ brei thau meng akaok thun tal ini, hu labaih 100.000 urang, ralo meng lac meng châu Phi, tapa địa trung hải duah jalan nao tal châu Âu. Dom urang metai di địa trung hải dalam thun ini  jaik 1.800 urang./.