1/ Pasak khik ramik inum krung medil Huế dok ngak harak hồ sơ thơ văn akhar haraoh Hán angaok dom labik kiến trúc medil Huế piah pok tagok UNESCO brei angan lac inum krung ký ức dunya. Dom inum krung ni hu yaok ribau đơn vị thơ văn akhar haroh Hán hu trang trí dalam dom labik kiến trúc medil Huế. 

2/ Tui pasang iek di Sở Lao động Thương binh saong xã hội ban sit Đà nẵng, yaom thưởng tết anek sak pabe 2015 glaong jang 25% duk saong thun 2014, tui yaom bình quân labaih 9 triệu đồng sa urang, glaong di abih nan lac 300 triệu đồng  sa urang saong biar di abih lac 300 ribau đồng sa urang. Doanh nghiệp hu yaom thưởng glaong di abih nan lac doanh nghiệp cổ phần phun jien pabak tame di karja.

3/ Meng ni tal harei 5/2, Kapul pasang iek di dom gah ka bruk hacih saat pandap mbang tỉnh Quảng Ngãi peih bruk tui iek, duah thau dom labik ngak pandap, pablei salih, pablei pandap tết di dom puk palei dalam tỉnh. Kapul pataom tame pasang iek dom labik sik ngak rilow menuk ada, athur rong, dom labik pablei salih njam patam hacih, langyah catang dom bruk ngak suan adat hukum dalam bruk ngak pandap, pablei salih.

4/ Sở Công thương tỉnh Bình Định hu jalan khik mepiah pandap pablei tết anek sak pabe 2015 tui yaom abih tih labaih sa ribau tỷ đồng, ralo jang 15% duk saong thun dahlau. Urak ini sở công thương tỉnh Bình Định hu pambuak bruk saong dom pasak pablei salih, mban khik iek dom darak dalam tỉnh peih bruk niêm yết yaom pandap di dom quầy, sạp pandap saong pablei pandap njauk tui yaom niêm yết, ba mbuan lagaih ka bhap bini blei  dalam tuk tết.

5/ Tỉnh ủy Ninh Thuận bahrau peih nyaom biai peih tabiak bruk pacang caga tham nhũng thun 2015, Mban thường vụ tỉnh ủy tacei pato brei patagok bruk pan akaok ba jalan di pakat ủy, karja dom pakat ngan song dom jabat nội chính, khik siam mekre salamat ka nyaom roya Đảng  dom pakat, pamong tal nyaom roya Đảng pakat negar mbang ka 12, patagok bruk khik ramik, pacang caga buôn lậu, jhul pakhang bruk pasang iek duah thau, langyah dom bruk tham nhũng.

6/ Hadei di labaih sa thun peih ngak sarak daong patrun khat lahik dalam bruk ngak nông, kaya ikan tui quyết định 68/2013/QĐ-TTg di thủ tướng rajaei, tỉnh Kiên Giang hu buh tame labaih 86 tỷ đồng brei ka urang nông mesraiy blei jamriah, pandap ngak nông piah pala drak, patagok bruk pandar jamriak angaok mblang hamu. Taphia di nan, tỉnh Kiên Giang daok hu daong ka dom kapul nyaom, menuac urang mesraiy tui yaom laba tín dụng đầu tư saong patagok labaih 58 tỷ đồng padang kho khik mepiah padai brah.

7/ Harei kabroi 13/1 Pasak papar binguk bol bala tabiak mbaok danak dak “Nao duah đồng đội” . Danak dak nao duah đồng đội hu peih tabiak meng harei 15/1 dalam 30 minite, meng tukvak 20 tuk 45 minite harei jip di angaok riyah papar binguk Quốc phòng VN song 7 tuk meteh harei adit di angaok riyah VTV2 Rayo papar binguk VN dalam adit camereuip song adit ka 3 dalam bilan.

Patui di ini dom khau tin dunya:

8/ Jien xu klak abih di taneh ia Mỹ hu angan jien xu Bớt (Birch Cent) barau ini hu urang blei yaom 2,6 triệu đô la, samu 60 tỷ đồng VN dalam sa mbang pablei to yaom di Mỹ. Ini hu iek lac sa yaom glaong di abih brei ka janih jien ini di dom mbang pablei to yaom meng dahlau mai di Mỹ.

9/ Trung Quốc dok kham merat dong ka bruk mesruh pacang jit ruak Ê-bô-la (Ebola) tapa bruk brei pabak 232 nhân viên y tế dalam bol lin negar ni tal Tây Phi, labik jit ruak metai menuac ni dok rah tabiak. Trung Quốc lac negar urka ni oh hu urang halei njom ruak Ê-bô-la, bahrau dong 121 triệu đôla Mỹ , dalam nan hu jien song pandap piah dong ka bruk mesruh pacang jit ruak Ê-bô-la di Tây Phi.

10/ Meng lavik mai, me-ik saradang tuýp 1 hu iek lac janih ruak mbuan ngak brei metai atau hu dom biến chứng trak suai lavik. Min, sa ruah duah barau di dom urang ilamu Mỹ brei mboh, bruk pasang iek catang saradang dalam drah tui tukvak meda patakik hu biak ralo dom ruak nan./.