1/ Danak dak “boh sang công đoàn” tuk halei jeng hu bruk pachreih tui, rik dong di công nhân viên chức urang ngak di tỉnh Sơn La. Dalam thun 2014, công nhân viên chức urang ngak dalam tỉnh rik daong hu jiak 1 tỷ đồng, dong ka dom boh sang công nhân viên chức urang ngak hu rai duik kan kandah pasiam veik labik dok, padang bahrau sang dok.

2/ Kayua akaok sahneng pacang eik, caga li-ar ka athur raong dalam bilan brak di bhap bini hu patagok, nan ye dalam dom harei li-ar meng bloh di tỉnh Điện Biên oh hu kabau, limo metai kayua li-ar. Dalam tỉnh urak ini hu jaik 170.000 drei athur raong, dahlau nan tỉnh hu klauk 467.000 liều vacxin dom janih ka limo kabau piah pacang cakak jit ruak dalam bilan brak.

3/ Piah iek glang tapon athur raong tuk nhiệt độ trun beir, karja dom huyện bhum ceik tỉnh Quảng Ngãi hu dong ka bhap bini pacang liar ka tapon athur raong. Urak ni lingik liar nan ye karja huyện Ba Tơ hu panuac ieu bhap bini khik piah pandap mbang, pacang sre val ro ka tapon athur raong.

4/ UB bhap bini tỉnh lâm Đồng barau brei buh tabiak meng kadung jien karja 13 tỷ 200 triệu đồng piah daong saong alin hadaih pandap ka dom baoh sang kan kathaot, baoh sang jaik si kan kathaot, urang bảo trợ XH, urang hu buh pren yava ka cách mạng, baoh sang sarak karja, kapul nyaom bol pan phao kraong dalam tỉnh hu jien mbang tết anek sak pabe 2015. Dom nyaom đối tượng ini hu alin hadiah pandap yaom meng 150 ribau đồng tal 1 triệu đồng, daok amaik VN anh hùng hu alin 2 triệu đồng.

5/ Thun ni, tỉnh Đồng Nai brei padang 20 labik sik ngak prong song 11 labik sik ngak sit. Dom labik sik ngak ni anak meta sik ngak hu labaih 320 drei limo kubau, 3.800 drei pabui song 61 ribau drei menuk sa harei melam. Tui kuhria tal puac thun 2015, dom labik sik ngak praong, sit ini hu ba tame ngak.

6/ Ngan saong yaom quýt Hồng trun tagok meng 20.000 đồng tal 25.000 đồng sa kg, urang ngak bein pala quýt Hồng di Lai Vung, Đồng Tháp daok hu laba. Tui kuhria, quýt chưng tết thun ini hu urang duah blei biak rilo nan ye yaom meda tagok jang, ba mai kein laba ka urang pala. Thun ini kayua urang pala bein pandar dom kỹ thuật, yau pandar khak hữu cơ, patakik khak vô cơ, patrun mbang pruh jru, buh khak samu gauk hu daong ka baoh quýt Hồng tuk paik baoh hu hacih, siam, sambo that, hu darak pasar takre.

7/ Piah samar dong ka rilo boh sang urang ngak gaok kan kandah hu mbang tết dalam bui sambai, bahrau ni harak mbao Người Lao Động peih danak dak “Gam song urang ngak yam tapa kan kandah” thun 2015. Danak dak piah alin hadiah pandap ka 26 urang ngak njauk bala tuk ngak bruk atau njauk ruak kan kandah dok ngak bruk di dom DN dalam khu chế xuất – khu công nghiệp ban raya HCM song dom quận, huyện di ban raya. Yaok pok pandap hu yaom 5 triệu đồng kayua dom gilang pariak Đông Á, ACB, Sacombank, Phương Nam, Eximbank song An Bình dong brei.

Patui di ini dom khau tin dunya:

8/ Rajaei di Thủ tướng Nhật Bản Sin-dô A-bê hu brei tapa pok kadung jien QP glaong biak glaong kuhria meng kan mai. Tui nan, dự thảo kadung jien ka tài khóa meng bilan 4 tal hu yaom tagok 2,8% dalam pandar cai QP tagok 4 ribau 980 tỷ yên (samu 41 tỷ 970 triệu đô la Mỹ). Tagok 2% duk saong thun dahlau saong yam tapa kỷ lục 4 ribau 960 tỷ yên di thun 2002.

9/ Karja Ôxtrâylia hu ba tabiak rilo panuac khan ka jit ruak kayua vi rút ký sinh di angaok jamaok rah tabiak tuk jamaok tagok khang di taneh ia ini. Urang dang akaok gah y tế Ôxtrâylia ndom lac, langik ấm áp di gah timur song ia ndik ia sua di gah kreih negar palagaih ka jamaok nyu caik anek

10/ Nyaom darak pasar Sôcôla mbang ka 2 di Bỉ hu peih tabiak meng harei 6 tal harei 8/2 tal di ban ine Brussels saong praong jang duk saong nyaom darak pasar mbang ka sa. Amuk Xin-vi Đu-xơ, sa dalam dom urang padang tabiak nyaom darak pasar Sôcôla Bỉ brei thau, nyaom darak pasar thun ini pataom hu labaih 150 urang ngak tabiak Sôcôla dalam taneh ia./.