1# Thủ tướng rajaei barau patabiak sarak daong sang daok ka sang kathaot tui chuẩn kathaot tukvak 2011 – 2015. Sarak nan piah daong sang daok ka jaik 311.000 sang kathaot bhum palei pala, khik kajap bruk hu sang daok siam, tani tanat, dak harei dak paglaong diuk rai, rik daong patruh eik patrun kathaot khang kajap. Sarak brei daong dahlau ka dom urang yau ini:  Sang kan kandah ( taha, daok sa drei, jaoh jo); sang bhapbini bangsa takik; sang di bhum bhian rah tabiak bala meng lingik tasik; sang daok diuk rai di dom puk, palei kan kandah; sang daok di dom huyen kathaot tui quy định di sarak 30a di rajaei .

2/ Hadei di 2 thun peih ngak “đề án rami ramik veik gah ngak nông tui jalan paglaong yaom gia tăng saong patagok khang kajap”, mintri ngak nông saong patagok palei pala hu patabiak 6 đề án sit dalam dom gah nan lac: pala drak, raong glang, ngak glai, kaya ikan, thủy lợi saong ngak kaya glai, kaya nông, kaya ikan saong sara. Tal urak ini, hu 47 dalam abih tih 63 tỉnh, ban patabiak đề án, jalan ngak rami ramik veik gah ngak nông piah ramik veik quy hoạch sản xuất tui jalan patagok kein lagaih di puk palei saong tui bruk darak pasar.

3# Piah pahadar 70 thun Cách mạng bilan 8 saong harei negar 2/9, Trung ương kapul dam dara Cộng sản Hồ Chí Minh pambuak bruk saong Báo Thanh niên barau peih Họp báo yaih khan dom bruk salam uan Cách mạng bilan 8 saong harei negar 2/9. Ngan saong kadha “Mùa thu cách mạng”, di Hà Nội saong dom tinh karei, Trung ương kapul dam dara CS Hồ Chí Minh peih dom bruk ngak ye : ndom biai “ dahlak ranam negar dahlak”; melam daoh tamia “Hadah mbaok meta negar dahlak”, danakdak Gala âm nhạc “Giai điệu Tổ quốc” rik daong yaih khan, pathau khan dom kadha daoh cách mạng, kadha daoh pok meyaom urang ranaih, hatai ranam puk paga, palei negar tal rilo urang đoàn, thanh thiếu niên.

4/ Jabat ilamu brei thau huyện Đắk Hà, tỉnh Kon Tum pambuak bruk saong UB bhap bini dom xã Đắk Long saong Đắk Pxy, huyện Đắk Hà barau peih tal pato taong cồng chiêng, tamia xoang ka dam dara, thiếu niên bangsa takik. Dalam sa bilan, dom anek saih hu kapul nghệ nhân hu ilamu di puk palei pato dom ilamu cơ bản ka bruk taong cồng chiêng; pato dom tiết tấu, âm sắc chính di cồng chiêng; parang me-in dom ragu tamia xoang meng kan. Ini lac bruk ngak rik daong khik ramik ilamu cồng chiêng bhap bini dom bangsa takik Tây Nguyên. :

5# Meng akaok thun tal ini, yaom pala drak nong, lam, thủy sản di tỉnh Đồng Nai hu labaih 13.000 tỉ đồng, tagok jaik 4% duk saong dom bilan ini thun 2014.  Raong glang dalam tỉnh jeng khik hu tanut tagok glaong duk saong pala drak, kaya ikan, lam san. Daok danakdak padang ngak palei pala barau, tal akaok bilan 7 dalam tỉnh hu 63/133 xã mek hu tanut chuẩn. Tui kuhria tal puac thun 2015, hu 88 xã mek hu chuẩn palei pala barau saong hu  5/11 huyện, thị hu brei angan huyen palei pala barau.

6/ 416 baoh sang bhap bini njauk glut, caai meng bruk pasiam veik kênh Tân Hóa – Lò Gốm, di quận 6, quận 11 saong quận Tân Phú, ban raya HCM barau taduan mek jien bayar hadei di ralo mbang ginum meyai saong dom gah padang ngak. Abih tih phun jien bayar ka 416 baoh sang ini tagok tal labaih 29 tỷ đồng. Ong Trần Trung Hậu, phaok giám đốc mban khik iek padang ngak công trình nâng cấp đô thị ban raya HCM – gah ngak po đầu tư công trình brei thau: Urang dang akaok ban raya hu ralo mbang nao pasang iek saong pandar karja palei gam saong dom sở, ban ngành chức năng pasang iek ruah duah piah bhap bini tani tanat rai diuk dalam tuk kinh tế kan kandah yau urak ini. Kol dahlak ndom lac jien bayar oh lac meng kadung jien karja. Ini lac jien di dom urang thầu bayar brei.

7# hadei di jaik dua thun, kapul  Liên hiệp urang kumei tỉnh Bạc Liêu ba tabiak danakdak brei mesraiy daong ngak mbang duah jien ka urang kumei kathaot, jaik si kathaot dalam tỉnh, urak ini, Kapul hu peih brei mesraiy ka 281 sang (urang kumei ngak po sang) mesraiy labaih 1 tỉ đồng, buh tame raong glang, pala drak, pablei salih sit…Amuk Trương Thị Nghi - Phó akaok kapul Liên hiệp urang kumei tỉnh brei thau : tal urak ini, dom sang mesraiy jien jeng ba tame ngak njauk bruk, pataom gauk njauk định kỳ saong ngak siam bruk bayah jien phun, jien laba njauk quy định. Meng dom bruk ngak hu nan, Kapul daok peih praong danakdak piah hoi vien, urang kumei hu jalan patagok kinh te khang kajap.

Patui di ini dom khau tin dunya:

 8/ Mintri jien padai Mỹ brei thau thâm hụt kadung jien karja di taneh ia ini dalam bilan 7 tagok tal jaik 150 tỷ đô la. Tui số liệu brei thau harei 12/8, abih tih jien mek tame kadung jien karja di rajaei Mỹ hu 225 tỷ đôla dalam tuk jien pandar cai abih tih lac 374 tỷ đôla. Jien brei ka BHYT saong jien ka gah pato megru lac makna ngak brei thâm hụt kadung jien karja di rajaei Mỹ tagok samar. Yaom lac patagok thâm hụt kadung jien karja dalam bilan 7 min Jabat kadung jien karja taneh ia ini jeng kuhria mboh lac abih tih jien thâm hụt di Mỹ dalam tài khóa thun ini tok daok di tanut 425 tỷ đô la, tanut biar di abih kuhria meng thun 2007.  

9# Dom taneh ia châu Âu daok kham merat pacang cakak bruk di cư meng châu Phi saong Trung Đông, dom urang daok nduac dauk mesruh metak, eik lipa, kan kathaot saong srau kadau chinh tri piah duah raidiuk barau di lục địa taha. Piah daong ka Hy Lạp dalam bruk hu rilo  urang nduac mai daok suan hukum, Liên minh châu Âu (EU) hu brei tapa danadak daong yaom 528 triệu đô la Mỹ. Langiu bruk daong jien padai, EU daok hu panuac brei ba 16.000 rabau urang tị nạn meng Hy Lạp tapa dom taneh ia karei di EU.

10/ labaih 60 urang metai dalam dom harei tapa kayua pandiak di Ai Cập. tui mintri y tế Ai Cập, kuhria meng harei 8/8 tal harei 12/8, hu 61 urang metai saong 768 urang karei njauk mebuk pandiak. Dalam dom urang nan ralo meng lac urang praong thun. Gah y tế Ai Cập hu kakei bhap bini, abih di nyu nan lac urang taha saong urang njauk ruak mãn tính, jui nao tabiak gah langiu meyah oh hu bruk hagait praong. Meng puac bilan 7 tal urak ini, bhum Trung Đông gam gam hu pandiak khang hu labik langik pandiak tal 47 độ C./.