1./Patui mbang nyom ka 9, Quốc hội mbang 13, harei ini (1/6), dom urang Quốc hội pang harak langyah, taduan panuac, ramik pasiam dự thảo Hukum padang Rajaei (pasiam veik) saong ginum biai dom asal kadha daok hu panuac karei di gauk dalam dự thảo Hukum ini. Biar harei, Quốc hội pang langyah, taduan panuac, ramik pasiam dự thảo Hukum padang karja palei, ginum biai dom asal kadha daok hu panuac karei di gauk dalam dư thảo Hukum ini. Adit ini, Quốc hội caik rilo tukvak ka bruk padang ngak hukum. 

2/ Patui di ini, daa mikva saong taong abih gauk pang kol dahlak khan ka dom bruk ngak iek glang ka uranaih hu peih tabiak tuk pahadar harei uranaih 1/6:

Biar harei 31/5, Ủy viên mintri chính trị, Phaok Thủ tướng Nguyễn Xuân Phúc hu nao rivang saong alin hadiah pandap ka uranaih di palei uranaih SOS Đà Nẵng. Phaok Thủ tướng Nguyễn Xuân Phúc caong khin dom adei di palei SOS Đà Nẵng jeng yau uranaih gaok kan kandah kham merat yam tapa thar vak, bac daa naih joi.  Phaok Thu tuong lac: Wa caong khin dom kamuan kham merat jang gac, bac joi, dahan yam tagok. Meng pren khang di drei, taong abih kol drei jeng brei yam tagok. Dom kamuan brei hu hatai jia tame pasiam kan kandah piah dak padang harei hadei. Dahlak jia lac, dom kamuan meng hatai anit ranam daong ba di dom anai meda patagok bac daa naih joi, pasram megru siam piah rik daong ralo jang gac ka XH.

3./Pachreih tui bilan kayua uraniah, kadung jien daong ka uraniah Việt Nam daok peih ngak rilo bruk piah daong uraniah sang kan kandah dalam taneh ia, yau taom mbaok 55 lambaok uraniah (umo ala 16 thun) hu raidiuk kan kandah dalam negar  mbang ka VIII – hu hatai kham merat yam tapa kan kandaht, yam tagok dalam bac da-a; peih bilan kayua uraniah di Hải Phòng… Taong abih yaom jien peih ngak dom danak dak ini jaik 15 tỷ đồng. Tui kuhria dalam thun 2015, Kadung jien meda daong ka jaik 6.000 mbang uraniah sang kan kandah, tui yaom jien abih tih jaik 76 tỷ đồng.

4/ Tal puac thun 2014, dalam taneh ia hu 26,7 triệu uranaih, dalam nan hu jaik 1,5 triệu uranaih gaok kan kandah saong jaik 2,5 triệu uranaih karei mbuan laik tame bruk biak kan kandah yau: mbuan njauk ngược đãi, pablei salih, cap mek saong njauk bala… brei hu bruk sangka ba tangin tame iek glang, khik caga jang gac di bhap bini. Piah hu dom sarak daong lagaih ka kapul uranaih gaok kan kandah, rajaei hu patabiak ralo sarak yau: iek glang pren yava; daong pato megru, khik caga uranaih saong daong uranaih hu mbaok tame. Gam saong kadung jien sarak karja, meng tuk padang thun 1992, tal urak ini kadung jien daong ka uranaih VN dom pakat jak ba hu labaih 5 ribau tỷ đồng meng dom kapul nyaom menuac urang dalam saong langiu taneh ia, daong labaih 30 mbang triệu uranaih gaok biak kan kandah. 

5./ Festival Caoh blong sang bac năm 2015 bahrau hu peih tabiak di ban raya Hồ Chí Minh, hu mbaok  64 sang bac tiểu học dalam dalam ban raya, gam saong 1.200 adei sit dit blong. Hadei di dom mbang pakacah dahlau di 11 cụm dalam ban raya meng puac thun 2014 tal urak ini, pilih ruah hu 87 kapul dit blong di 64 sang bac tame chung kết, pakacah 2 nội dung dit blong likei hu 6 adei saong dit blong likei kumei hu 4 likei saong 2 kumei) di dom tal bac 3 saong tal bac 4. Ini lac thun ka 2 peih bruk dit blong sang bac saong bruk nan hu siam mekre jang hatai caong khin, meng 40 sang bac hu mbaok tame di mbang camereip, urak ini tagok hu 84 sang bac saong hu pambak praong di taong abih 24 quận, huyện.

6/ Uan harei Phật đản Phật lịch 2559 thun ini, Ban Trị sự Giáo hội Phật giáo Việt Nam tỉnh Khánh Hòa peih thuyết trình ka an toàn jalan mbak, rik daong paglaong bruk ngak tui dom quy định ka an toàn jalan mbak dalam phật tử. Bilan phật đản thun ini, dom phật tử di tỉnh Khánh Hòa hu alin hadiah yaok ribau paok pandap ka bhap bini di 2 huyện bhum ceik Khánh Vĩnh saong Khánh Sơn. Tapa nan,, Ban Trị sự Giáo hội Phật giáo Việt Nam tỉnh Khánh Hòa jeng peih bruk thuyết trình ka an toàn jalan mbak ka urang agama, phật tử dalam tỉnh. Cư sĩ Trần Sơn, phaok Chánh thư ký, phaok duk ban trị sự giáo hội phật giáo VN tỉnh khánh Hòa brei thau: Pambuak bruk saong ban an toàn jalan mbak di tỉnh, phật giáo tỉnh Khánh Hòa hu danak dak pathau khan ka an toàn jalan mbak ka mikva phật tử, nao diễu hành piah paling gaiy phật đản. Saong pablah tame bruk pathau khan ka an toàn jalan mbak ngan saong bhap bini phật tử. Dom gru dalam ban trị sự jeng mboh biak chreih chrai.

7./ Tỉnh Trà Vinh bahrau ngak salah bloh bruk daong taneh daok ka 2.010 baoh sang urang Khmer daok dalam tỉnh tui Quyết định 29 di Thủ tướng Rajaei. Tui kuhria, yaok baoh sang taduan hu 385 mét vuông taneh. Tui mban Bangsa tỉnh Trà Vinh, dalam labaih 2 ribau baoh sang hu daong taneh daok, hu 337 baoh sang hu brei harak chứng nhận quyền pandar taneh saong 185 sang hu padang ngak sang bloh. Urak ini, dom huyện, ban sit dalam tỉnh  daok samar ngak dom harak gar piah brei harak chứng nhận quyền pandar taneh ka dom baoh sang daok veik. Abih tih yaom jien daong taneh daok ka sang urang Khmer kan kathaot oh hu taneh daok jaik 65 tỷ đồng; dalam nan kadung jien Trung ương daong labaih 60 tỷ đồng, daok veik lac jien di kadung jien karja tinh.. Sa-ai Thạch Tòng, daok di xã Ngũ Lạc, huyện Duyên Hải bahrau hu brei taneh saong hu daong jien ngak sang chreih chrai khan lac: Meng tuk hu diuk, tabiak daok karei, oh hu taneh hagait kayua amaik ame oh hu taneh. Urak ini hu karja brei taneh daok, daong padang ngak sang brei, dahalk uan tabuan lô. Dahlak kham merat ngak mbang piah tabiak truh kan kathaot.    

Patui di ini dom khau tin dunya:

8/ Rajaei Indonesia daok soạn thảo quy định oh brei uranaih pandar phon pan tangin. Brei panuac di sa mbang ginum meyai di ĐH pakat negar Jakarta barau ini, akaok mintri quyền uranaih saong kamei metian Indonesia Giô-ha-na Em-bai brei thau uranaih, abih di nyu nan lac anek saih tiểu học, oh cần thiết pandar phon pan tangin. Taphia di nan, thiết bị pan tangin ini jeng ba dom adei tal dom trang mạng độc hại, nan lac dom trang hu asal khiêu dâm. Langiu di nan, caik ralo tukvak pandar phon pan tangin ngak ka uranaih takik caik hatai tal bruk ruah duah, jeng yau ilamu taom gaok xã hội. Ndom ka umo hu ba tame quy định ini, rajaei Indonesia jeng daok sahneng kuhria tal bruk lac anek saih di pakat bac trung học brei patakik quyền pandar.

9./Kuhria tal harei ini, menuac metai kayua pandiak bhang di rilo labik dalam taneh ia Ấn Độ mboh labaih 2.207 urang. Dalam nan, mbang An-đra Pra-đét (Andhra Pradesh) jeng daok lac labik hu menuac metai kayua pandiak bhang rilo di abih di Ấn Độ. 

10/ LHQ brei thau, dalam sa thun, dom urang klak sang nao kayua srau kadau di bhum Sa-hen châu Phi tagok jang dua mbang. Akaok thun bloh, LHQ brei thau hu jaik 1,6 triệu urang daok di 9 taneh ia bhum Sa-hen nan lac Buôckina Pha-sô, Camơrun, Cộng hòa Sát, Giămbia, Mali, Môritani, Nigiê, Nigiêria, Sênêgan nduac klaak sang saong urak ini tagok tal 3,5 triệu urang./.