1/ Urak ni, Pasak mbao chí duh ka nyaom ROYA pakat negar mbang 12 di Đảng hu ngak salah bloh di pasak Nyom biai pakat negar Mỹ Đình. Tla urak ni, hu labaih 600 urang vak dalam negar song mbao chí tut angan brei thau ka nyaom ROYA, dalam nan hu labaih 80 urang vak negar langiu, mai meng 10 hãng thông tấn mbao chí dunya. Bruk njauk nyai nan lac, brei thau ka mbang nyaom 12 di đảng mbang ni daok hu mbao chí di urang Việt daok di negar lingiu, dom hãng thông tấn di Châu Phi piah samar brei thau cambaih laih ka bruk daok rah tabiak di nyaom roya tal urang Việt daok di negar langiu jang yau bhap bini dom negar châu phi.

2/ Uan tết nguyên đán anek sak kara, UB MT negar VN tỉnh Bình Định barau alin hadiah 3.000 paok pandap tết ka baoh sang kan kathaot, urang gaok kan kandah, yaok paok yaom 300.000 đồng. Urak ini, tỉnh Bình Định daok jak ba dom doanh nghiệp, kapul nyaom, menuac urang daong pandap tết brei ka urang kan kathaot mbang tết bui sambai. Ong Huỳnh Cao Nhất, Phaok akaok Uỷ ban Mặt trận negar VN tỉnh Bình Định brei thau: “Urak ini, MT negar daok jak ba piah ka dom doanh nghiệp, dom kapul nyaom thành viên, dom urang ngak pahala hu sangka rik daong. Meda lac bruk kuhria tết ka urang kan kathaot meda ngak hu biak siam”.

3/ Piah dong ka dom boh sang sarak karja, boh sang kan kthaot mbang tết nguyên đán anek sak kara, UB bhap bini tỉnh Ninh thuận hu buh tabiak meng kadung jien karja tỉnh labaih 12 tỷ 500 triệu đồng blei pandap alin saong brei dom kapul nyaom nao rivang, pachreih ba dahlau di harei 20-12 saka ia bulan. Langiu di pok pandap tết di akaok negar, di tỉnh, dom huyện, ban jeng hu buh tabiak meng kadung jien karja huyện, ban piah brei pandap tết ka urang kan, boh sang sarak karja dok dalam tỉn, tui kuhria meng 150 tal 200 ribau đồng sa pok pandap.

4/ Mintri ilamu công nghệ barau mbaoh tangin saong sang bac Đại học Sư phạm kỹ thuật ban raya saong kapul ruah duah di tiến sĩ Nguyễn Bá Hải – urang ngak tabiak “mắt thần” tui đề tài độc lập pakat negar ngan saong angan ieu lac “ruah duah pasiam thiết kế, ngak tabiak mẫu camin diện tử brei ka urang sup meta”. Tukvak camereip kapul ruah duah hu ngak pasiam công nghệ chế tạo piah ngak iek 1000 camin tui tacei pato di thủ tướng Nguyễn Tấn dũng di bilan 9 thun bloh. Abih tih yaom jien ka tukvak ngak iek nan lac labaih 5 tỷ meteh.

5/ Tui Pasak dong anek saih SV ban raya HCM, tal tukvak ni, labaih sa ribau harak radaih mai palei mbang tết hu jao tal tangin dom ayhut SV song urang ngak kan kathaot dok di ban raya. Tết nguyên đán anek sak kara 2016, lingiu 3.500 harak radaih brei saoh ka SV, công nhân song urang ngak tự do di ban raya, mbang camereip danak dak “ sruh radeih mùa xuân, tết taom gauk” kayua pasak dong anek saih, SV, ban raya song mbao tanh niên pambuak bruk peih ngak dok alin brei 1 ribau harak radaih nao HN song 500 harak radaih nao Đà Nẵng ka dom anek saih, SV saong urang ngak kan kandah karei karei.  

6/ Urak ini, urang ngak bein tỉnh Tiền Giang pala labaih 7000 ha phun durieng, pataom tame ralo di dom puk palei tapen kraong Tiền dalam huyện Cai Lậy, Cái Bè. Tal tukvak ini, durieng hu taong yaom lac janih baoh kayau brei kein laba glaong di abih dalam dom janih baoh kayau hu pala rilo dalam tỉnh, ngan saong yaom meng 60.000 đồng tal 80.000 đồng sa kg. Meng yaom tani tanat yau tukvak jaik di ini, dalam sa công taneh pala durieng, urang ngak bein hu jien mek tame jaik 200 triệu đồng sa thun. Ralo baoh sang bhum pala durieng hu jien mek tame labaih 1 tỷ đồng sa thun. Ông Đặng Văn Lâm, akaok Ủy ban bhap bini xã Tam Bình lac: “phun durieng yaom urak ini labaih, kurang 60 ribau đồng sa kg, bhap bini hu jien mek tame biak glaong. Dalam nan hu ralo baoh sang hu jien mek tame yaok thun labaih 200 triệu đồng, jeng hu baoh sang mek tame labaih 1 tỷ đồng. meng bein phun mbang baoh nan, rai diuk bhap bini hu salih barau”.

7/ Tapa 5 thun (meng thun 2011- tal thun 2015) peih ngak danak dak pakat negar padang ngak palei pala bahrau, xã Định Hòa, huyện Gò Quao, tỉnh Kiên Giang hu pataom tame ngak siam sarak bangsa, meng nan KT patagok, meng 11% tagok tal 13%/ sa thun, tagok jien mek tame meng 10,2 triệu tagok 26,6 triệu/urang, boh sang kan trun meng jiak 11% dok 4,64%.

Patui di ini dom khau tin dunya:

8/ Urak ini Nga daok peih dom bruk ngak pahala di Xyri. Tướng Xecgây Rutxcôi, sa urang ngak praong pakat glaong di bộ tổng tham mưu bol bala Nga brei thau, bhap bini daok mai veik dom ban di Xyri saong rai diuk daok sron mbon veik. Ong Rutxcôi ndom lac, tui bruk yau nan, bruk  ngak pahala lac sa dalam dom bruk ngak barau di dom kapul nyaom bol pan phao kraong Nga daok di Xyri.

9/ Kadung jien uranaih Liên hợp quốc (UNICEF) harei 15/1 hu panuac khan ka bruk lavang lavaih trak dok rah tabiak di ban sit tapen jalan negar Madaya, dok di gah barak ban ine Đamat, Xyri. Dalam sa panuac khan hu ba tabiak harei ni, hadei di tuk LHQ song Hội chũ thập đỏ dunya hu nao tal ban sit Madaya piah parabha dom pandap dong camereip kuhria meng bilan 10 thun bloh , Unicef ndom lac, labaih 300 uranaih di Madaya dok lavang lavaih trak.

10/ Mintri y tế Xiêra Lêôn barau brei thau lac hu sa urang njom Ebola barau di taneh ia ini. Dalam panuac khan hu ba tabiak dom tuk hadei di tuk gah y tế dunya brei thau lac abih jit Ebola di Tây Phi, mintri y tế Xiêra Lêôn brei thau, sa urang kamei sinh viên umo 22 thun njom ruak di Lumor, sa khu dân cư jaik taphia negar saong Ghinê. Urang ini hadei di nan hu ba nao tal labik karei piah iek ruak saong metai di labik nan. Dom gauk gar di urang kamei sinh viên urak ini hu cách ly piah duk iek drah. Mintri y tế Xiêra Lêôn brei thau, daokcaga pacang bruk tamuh veik jit Ebola./.