Trang tin 10h30 và 14h30 ngày 18/10/2014

1 # Uỷ ban bhap bani bal Hà Nội bahrau mboh tangin tame kế hoạch 2 thun (2014-2015) peih ngak danak dak aia hacih vệ sinh môi trường palei pala. Tui nan, Hà Nội meda peih ngak akaok pagam, ba aia hacih meng dom công trình ba aia pataom ka  30.000 baoh sang bhap bani dom huyện Ba Vì, Phúc Thọ, Mỹ Đức, Thanh Oai, Chương Mỹ; pasiam bruk pandar jaman hợp vệ sinh ka 6.960 baoh sang palei pala; grap tanat ka jaik 85.000 urang hu kein laba meng dom xã mek hu tanut vệ sinh dalam xã. Tui kuhria dahlau yaom jien piah peih ngak danak dak aia hacih saong vệ sinh môi trường palei pala dalam 2 thun 2014-2015 di Hà Nội nan labaih 500 tỷ đồng.

2/ Mintri ilamu, TT saong DL barau hu harak payua mintri ngoại giao saong mintri tư pháp ka bruk thẩm định harak pok tagok thủ tướng rajaei saong harak kanal hadar ka bruk khik ramik, pasiam di inem krung dunya labik inem mek Mỹ Sơn. Tui  bruk di anak meta, mintri ilamu, TT saong DL saong jabat pasang iek khảo cổ học Ấn Độ (ASI) hu padang ngak, ginum meyai dự thảo harak kanal hadar di VN saong Ấn Độ ka bruk khik ramik dom nyaom bimaong di inem krung ilamu dunya labik inem mek Mỹ Sơn, tỉnh Quảng Nam. Mintri ilamu, TT saong DL caong khin dom mintri pasang iek harak pambuak bruk taphia di nan brei thau ý kiến thẩm định ka harak kanal hadar. Hu thau, abih tih phun jien ka bruk khik ramik pasiam kayua Ấn Độ daong nan lac jaik 160 triệu Rupee Ấn Độ. 

3 # Gilang pariak Karja brei thau ka Dự thảo thông tư pasiam veik ka 11/2013/TT-NHNN, pabak đối tượng hu mbang tui jien jhung ưu đãi meng pok jien daong padang ngak sang daok 30.000 tỷ đồng. Nan lac kapul urang jakar, bol lin  pan pao kraong, urang ngak hu jien bilan biar min kan kandah ka sang daok, tuk blei sang daok thương mại hu yaom jien abih tih oh tapa 1,05 tỷ đồng. Kapul urang jakar, bol lin pal pao kraong saong urang ngak pak  đô thị hu taneh blaoh daok kan kandah ka sang daok min oh ka hu Karja daong piah padang ngak sang daok.

4/ Tui mintri ngak nông saong patagok palei pala, dalam taneh ia urak ini hu labaih 10.000 HTX ngak nông. Dalam nan, hu 9.300 HTX dịch vụ saong bruk ngak nông, labaih 100 HTX ngak glai, jaik 600 HTX kaya ikan saong 79 HTX ngak sara. Dom HTX hu padang barau tagok jaik 200 HTX sa thun. Ralo HTX peih ngak oh hu kein laba. Dom HTX peih ngak hu kein laba nan lac 10%. Bruk ngak di HTX biak sit, bahrau ngak hu dịch vụ blei tame ka pandap ngak nông, quy mô sit, pren merak gauk dalam bruk pabak dom dịch vụ daok takik.  

5 # Uỷ ban bhap bani tỉnh Đắc Nông bahrau peih Nyaom biai taong yaom, brei tapa Đề án quy hoạch patagok phun mắc ca dalam huyện Tuy Đức, vaktu 2014-2020. Taong abih mblang taneh quy hoạch labaih 14.600ha, dom janih pajaih mắc ca meda ba tame pala nan lac OC, 246, 816, 849, 842, 741, 800, 900 saong 695; taong abih phun jien buh tame labaih 1.100 tỷ đồng. Pak Nyaom biai, Phaok akaok ủy ban bhap bani tỉnh Đắk Nông Nguyễn Đức Luyện khang panuac lac, bruk quy hoạch njauk pagam haong haong quy hoạch pandar taneh di puk palei; peih ngak ralo janih karei di hauk piah paglaong kein laba.

6/ Meng akaok thun tal ini, dom urang ruak pandiak tabiak drah saong tangin takai cambuai di ban sit Đà Nẵng patrun biak ralo duk saong thun bloh. Dalam tuk nan dom urang njauk ruak thủy đậu, sởi saong laka glo akaok kayua vi rut daok patagok. 9 bilan tapa, ban sit Đà Nẵng hu labaih 1.400 urang ruak thủy đậu; 700 urang ruak phát ban medil lac sởi, dalam nan labaih meteh dương tính saong ruak sởi, 11 urang tui iek laka glo akaok vi rut. Ong Tôn Thất Thạnh, Giám đốc pasak Y tế Dự phòng Đà Nẵng brei thau: ban sit barau ngak salah bloh bruk klauk vacxin pacang cakak laka glo akaok NB brei saoh ka uranaih umo meng 1 tal 5 thun; patui klauk vacxin sởi – rubela ka labaih 210 ribau uranaih umo meng 1 tal 14 thun dalam puk palei.

7 #  Baoh taua tuan dalam khu rivang ma-in Nhân Tâm, nao tapa kraong Chò, huyện Diên Khánh, tỉnh Khánh Hòa padang ngak oh hu adat hukum, oh njauk kỹ thuật nan ye Kapul urang pasang iek liên ngành brei padeih nao mai meng dom bilan dahlau. Yau nan min tal urak ini, baoh taua tuan ini jeng daok peih pandar, duh ka tuai damuai nao mai, oh khik hu siam mekre salamat ka tuai mai rivang ma-in.  

Patui di ini dom khau tin dunya:

8/ Di ban ine Viêng-chăn (Lào) barau peih nyaom meyai pambuak bruk pato megru pakat glaong di Lào - Liên minh châu Âu. Brei panuac di nyaom meyai, ong Mi-xen Cô-pheng ndom lac, gah pato megru nan lac sa dalam 3 gah liên minh châu âu ưu tiên ka Lào dahlau, dalam thun bac 2014 -2015 liên minh châu âu hu daong 15 triệu ơ rô ka lào, piah khik kajap bình đẳng ka bruk pato megru pakat cơ sở, langiu di nan daok daong ka bruk kế hoạch, jien padai saong gilang pariak ka dom gah karei. 

9 # Thủ tướng Jamaica Portia Simpson-Miler bahrau ini pok sap iew jak ba taong abih nguồn lực piah pasang iek saong pacang cakak bruk pambak prong di jit pandiak tabiak darah Chikungunya. Tui amek Simpson-Miler, dịch Chikungunya tamuh khang di Jamiaca meng bilan 7 thun ini, tal ini, jit hu pambak prong tal jaik abih dom bhum taneh dalam negar ngak ka ralo sang bac saong sang mac  kareik pabah mbang. Thủ tướng Jamaica brei thau, negar ini hu buh tabiak labaih 4 triệu USD piah pametai anek jamaok di dom labik gaok kan kandah di abih kayua jit ruak.

10/ Mblang kapal haok dunya Ba-ra-giát di ban Ma-đrít di Tây Ban Nha daok dalam bruk khẩn cấp hadei di tuk sa urang tuai nao angaok kapal haok di hãng kapal haok Prang par trun di mblang kapal haok ini hu medil lac njom vi rut Ebola. Tui urang brei panuac mblang kapal haok saong hãng kapal haok prang, urang tuai medil njom Ebola nan mboh pandiak luac mbang par di kapal haok 1300 di hãng kapal haok prang par meng ban La-gốt di Ni-giê-ri-a quá cảnh ban ine Pa-ri, Pháp tal Tây Ban Nha. Kapal haok nan hu ba nao khử trùng. Harak khứ hồi di mbang par jeng hu ba klak./.