1# Harei kabroi 18/4, di  Hà Nội, Thủ tướng rajaei Nguyễn Xuân Phúc taduan raok urang jakar di kadung jien bac Vừ A Dính saong kalup kapul kayua Hoàng Sa, Trường Sa anit ranam. Di var raok, Thủ tướng Nguyễn Xuân Phúc taong yaom glaong dom bruk ngak di kadung jien bac Vừ A Dính saong kalup kapul kayua  Hoàng sa, Trường Sa anit ranam. Dalam 17 thun tapa, kadung jien bac Vừ A Dính ieu pataom hu 263 tỷ đồng saong patabiak rilo danakdak rik daong ka xã hội, pachreih tagok ilimo gheih mekre mengkan di bangsa drei lac menyum ia dar tal halau ia, hala siam tapaok hala tahak.

2/ Dom bruk ngak salam uan harei ilamu dom bangsa VN (19/4) daok rah tabiak di palei ilamu – DL dom bangsa VN, Đồng Mô, Sơn Tây, HN. Hu mbaok tame bruk  salam uan harei ilamu dom bangsa VN hu 120 urang taha, akaok palei, nghệ nhân, bhap bini di 8 bangsa mai meng 8 tỉnh nan lac Hòa Bình, Nghệ An, Điện Biên, Đắk Lắk, Kon Tum, Thái Nguyên, Tuyên Quang saong Sóc Trăng. Bhap bini dom bangsa padang veik 4 rija roya meng kan nan lac rija cầu mùa di bangsa Sán Chay; rija trưởng thành di bangsa Ê đê; rija that pui saong rija uan umo taha di bangsa Dao.  

3# Anak bruk lingik pandiak bhang dui atah, labaih 100 drei kubao, limo di bhapbini dua 2 xã tapeng negar lac Ia Lốp saong Ea Rvê, huyện Ea Súp, tỉnh Đắc Lắc metai kayua kurang pandap mbang saong ia menyum. Anak bruk kubao, limo metai dak harei dak rilo jang, Uy mban bhapbini huyện Ea Súp jak ba bhapbini ba tapol athur nao tal dom labik hu kraong, danao daok ia, hu hareik piah palao, khik caga tapol athur dalam puk palei. Daok dom sang hu kubao, limo metai kayua tua, huyen daok ba tagok uy mban bhapbini tỉnh daong jien piah daong ka dom sang nan yam tapa kan kandah, tani tanat raidiuk.

4/ Di Bình Thuận, tuai damuai mai rivang, DL biak ralo dalam dom harei padeih lễ meng bloh.  Labik hu tuai mai tal ralo di abib nan lac labik DL Hàm Tiến – Mũi Né saong pasak ban sit Phan Thiết. Langiu di nan, dom labik DL tapen tasik xã Tiến Thành (ban Phan Thiết), xã Thuận Quý saong Tân Thành (huyện Hàm Thuận Nam) saong ban sit La Gi  jeng pachreih hu ralo tuai damuai meng dom tỉnh gah meraong.

5# Yaom padai di Cần Thơ jeng ye bhum taneran kraong Cửu Long daok tagok yaom saong oh ka mboh trun. Cambaih laih, pajaih padai Jesmine meng  6.500 – 6.700 đồng/sa kg; pajaih OM meng 5.700 – 5.900 đồng/sa kg; yaom padai dom janih daok veik jeng meng 5.500 – 5.600 đồng/sa kg. Amuk Nguyễn Thị Kiều, Phó Giám đốc Sở ngak nong saong patagok palei pala ban sit Cần Thơ brei thau, yaom padai glaong ye urak ini, ban sit oh brei khik piah padai brah. Lingiu di nan, sản lượng padai dalam bhapbini jeng daok rilo, kayua bhapbini pablei abih piah mek jien pala drak padai bilan Hè Thu.

6/ Baoh ia tasau Lò Rèn (Vĩnh Kim) lac sa dalam 7 janih baoh kayau đặc sản hu angan je di huyện Châu Thành, tỉnh Tiền Giang. Jaik di ini, kayua langik tasik oh lagaih, hu halak halin, pala  oh njauk kỹ thuật, phun pala ini patrun năng suất biak khang, nyu  taha saong metai nao. Kayua oh hu jalan pasiam chip, ralo sang bein ba gauk tak klak phun ia tasau. Meyah daok ngak yau nan, oh suai livik, baoh ia tasau Lò rèn meda lahik abih.  

7# Pandiak bhang dui atah dalam dom bilan tapa ngak ka rilo bein amraik kalu dalam huyen PHU QUOC tỉnh Kiên Giang kurang ia pruh mbuan si metai thu. Labaih 2 rabau goc amraik kalu di ông Trần Văn Lợi daok di tổ 4, ấp Khu Tượng, xã Cửa Dương huyện Phú Quốc daok kurang ia trak. Bingun caoh thu abih, ông njauk buh tabiak 35 triệu đồng piah khoan bingun công nghiệp. Khoan blaoh 12 harei min jeng oh mboh hu ia.  Ông Lợi brei thau : “Mbang tua thun ini huac biak, oh ka bhian mboh. Meyah tua daok dui atah, 2 rabau goc amraik kalu di sang ông meda metai thu ”.

Patui di ini dom khau tin dunya:

8/Tây Ban Nha hu brei sa sruh kapal haok quân sự nao tal Ê-cu-a-đo piah daong pajeng kapul cứu hộ nao tal dom labik gaok kan kandah saong piah parabha pandap daong. Bruk daong duah  urang njauk bala daok hu peih ngak. Akaok mintri an ninh Ê-cu-a-đo Xe-da Na-vát brei thau, dom urang njauk rambuah meda hu ralo jang duk saong 2.068  urang urak ini.   

9# Harei kabroi 18/4, dom urang ngak praong gah y tế Hi Lạp duh hatai huac lac jit ruak meda mbuan patuh tabiak di dom  trại tị nạn di bhum tapeng negar taneh ia ini ngan saong Mác-xê-đô-nia. Tui dom bác sĩ di trại tị nạn I-đô-mê-nia, ruak viêm dạ dày, chấy, rận saong laka daok pambak samal dalam abih tih labaih 10 rabau 400 urang di cư daok pak labik ini. Dom kapul daong daok pachreih urang di cư njauk nao tal dom labik kayua karja padang hu labik daok siam jang .

10/ Urang ngak praong Thái Lan brei thau, dalam tukvak rah tabiak rija thac ia uan rok thun barau (Songkran), taneh ia ini hu abih tih 442 urang metai, 3 ribau 600 urang njauk rambuah dalam dom mbang bala di jalan mbak. Menuac metai thun ini ralo jang 30% duk saong thun dahlau, makna  kayua menyum alak tuk peih radaih saong oh sangka tuk nao mai angaok jalan mbak./.