Trang tin 10h30 và 14h30 ngày 20-10

1 # Page ini 20/10, Mbang nyaom 8, Quốc hội mbang 13 hu peih pakak. Ini lac mbang nyaom Quốc hội akaok mereip rah tabiak pak hội trường Diên Hồng, baoh sang Quốc hội bahrau, pak quận Ba Đình, Bal ine Hà Nội. Mbang nyaom ini hu caik jaik 2/3 tukvak ka bruk padang ngak adat hukum. Dalam van peih pakak page ini, Akaok Quốc hội Nguyễn Sinh Hùng brei panuac peih mbang nyaom; Thủ tướng Raja-ei Nguyễn Tấn Dũng puac harak khan brei thau ka bruk ngak mbang kinh tế-xã hội thun 2014 saong jalan ngak thun 2015; Akaok Uỷ ban Trung ương Mặt trận Negar Việt Nam Nguyễn Thiện Nhân puac harak khan brei thau dom panuac ndom, hatai caong di cử tri..v..v... 

2/ Dom labik y tế brei paglaong hatai sangka pabak jang gac ngan saong jit ruak Ebola daok mbuan njom tame taneh ia drei; nan lac panuac kakei di thứ trưởng mintri y tế Nguyễn Thanh Long di mbang pasang iek bruk pacang cakak jit ruak ini di sang iek ruak nhiệt đới TƯ barau ini. Hu mbaok tame kapul pasang iek hu lambaok gah y tế dunya daok di VN. Yaom lac taneh ia drei oh ka hu urang halei njauk ruak Ebola, min tapa pasang iek mboh lac, sang iek ruak nhiệt đới TƯ daok caga ka bruk taduan, iek ruak saong pacang cakak njom mbak jit ruak ini. Sang iek ruak hu padang jalan  tacei pato chẩn đoán saong iek ruak Ebola; padang jalan pacang cakak saong padang kapul cấp cứu lingiu sang iek ruak. Taphia bruk cagha ginup jru, hóa chất, sang iek ruak hu pabak khan ao pacang cakak ka urang y tế saong caga taduan mek 1000 bộ khan ao chuẩn di gah y tế dunya; padang duk cách ly áp lực âm pak di labik saong di động piah khik caga siam mekre salamat tuk iek ruak ka urang ruak.

3 # Đồn Biên phòng tỉnh Quảng Bình bahrau pambuak haong Chi cục Hải Quan pabah mbang negar pakat Dunya Cha Lo, tỉnh Quảng Bình bahrau cap khik sruh radaih  biển kiểm soát 73B- 00138 kayua tài xế Ngô Mậu Kính 43 thun, daok pak phường Nam Lý, bal Đồng Hới peih angaok jalan pajeng ba ma túy meng Lào mai Việt Nam piah pablei. Tapa pasang iek, gah chức năng duah mboh 02 pok ni lông hu 2 kg cần sa hu cakak sit, ép jeng yaok klaih paduak dalam sàn radaih. Di jabat điều tra, phụ radaih Nguyễn Tiến Pháp 26 thun, daok pak palei 6, xã Kỳ Tây, huyện Kỳ Anh, tỉnh Hà Tĩnh khan lac, dom cần sa angaok nan hu urang blei meng Lào ba mai pablei di Việt Nam. 

4/ Hajan gam gam dom harei tapa saong ia sua tuh mai ngak ka ralo bhum di huyện Bắc Trà My, tỉnh Quảng Nam oh nao mai hu. Di kraong Trường labik palei Mậu Long, xã Trà Sơn, huyện Bắc Trà My, harei (19/10), ia sua glaong jang 1met meteh ngak ka jalan nao tal 6 xã bhum glaong oh nao mai hu. Karja huyện Bắc Trà My saong xã Trà Sơn ngak paga pacang saong brei lực lượng khik caga oh brei menuac saong radaih nao mai; taphia di nan tacei pato dom puk palei khan brei ka bhap bini thau piah takik nao mai, caga pacang  saong bruk mbuan jaleih haluk.  

5 #  Harei kabroi 19/10, pak tỉnh Đồng Nai, Báo Lao động pambuak haong Liên đoàn Lao động tỉnh Đồng Nai, Công đoàn Công ty Teakwang Vina bahrau peih ngak danak dak brei thau ka adat hukum saong giao lưu – tư vấn pren yava ka jaik 1.000 công nhân kamei. Tapa nan,  dom bác sỹ, luật sư hu khan brei ka dom adei sa-ai kumei thau dom adat hukum piah pacang cakak bạo lực dalam sang saong khik pacang uranaih. Amuk Nguyễn Phước Mạnh, Phaok akaok Liên đoàn lao động tỉnh Đồng Nai brei thau:

Băng: Dahlak saneng lac, baoh sang hu cakrok patagok khang kajap ye xã hội meng cakrok patagok khang kajap hu. Urang kamei hu sahanang hatai, oh daok saneng kuhria ralo tal bruk  mbang huak , bruk  jien ndo, ye urang meng sangka tal pren yava di drei.  Tuk urang kamei hu pren yava  meng ngak siam hu bruk ngak amaik, ngak hadiuk saong gam iek glang pren yava ka anek bhik.

6/ Melam kabroi 19/10, tuyển U21 VN dit mbang U21 Singapore 3 baoh, dang akaok bảng A gải dit blong  U21 dunya Báo Thanh Niên 2014. Hadei di hiệp dit camereip oh hu bàn thắng, dalam hiệp dua, trung vệ Mạnh Hùng di kapul Sông Lam Nghệ An, dit baoh phạt tame labik hiểm hóc, ngak ka thủ môn Bin Rohaizad (Singapore) oh cap dil, daong ka tuyển U21 Việt Nam mbang dahlau 1 baoh.  Hadei di nan, Quách Tân dit tame 1 baoh di phút 64, saong Ngân Văn Đại dit tame 1 baoh tra, daong ka U21 Việt Nam mbang hu 3 baoh.. Dahlau di nan, U21 Malaysia dit mbang U21 Australia saong tỉ số 2-1.

Khaw tin dunya:

7 # Mỹ saong 4 negar châu Âu harei kabroi pok sap iew padeih bruk srau dhau taong paoh gauk di Libi. Tapa nan, raja-ei dom negar Pháp, Italia, Đức, Anh saong Mỹ njauk gauk lac, oh hu jalan quân sự halei meda langyah hu bruk srau dhau di Libi. Panuac khan jeng ndom lac, meda ba tabiak dom jalan taong phạt dom urang đe dọa tal sron mbon, grap tanat saong an ninh di Libi, atau pacang cakak, ngak tayah tiến trình chính trị pak negar ini.

8/ Gah an ninh saong pambuak bruk châu âu barau taih klak panuac di Béc-lin brei pasang iek bruk di Ucraina meng dom kapal haok oh hu menuac peih di Đức, kayua gah quân đội taneh ia ini vận hành. Brei panuac di Viện, lambaok gah an ninh saong pambuak bruk châu âu ndom lac, gah ini pok meyaom bruk daong halei nan di dom taneh ia thành viên, min ndom lac bruk hu mbaok di dom urang lin nan lac cagar veik haong bruk ngak di phái bộ di gah an ninh saong pambuak bruk châu âu di Ucraina.

9 #  Harei ini (20/10), Thái Lan peih bruk daong jien padai tapak ka urang nong negar ini kayua yaom kaya nong daok di tanut biak biar urak ini, abih di nyu nan lac yaom cao su tamo. Sarak bahrau hu raja-ei Thái Lan brei tapa brei adat daong 1 ribau Bạt (samu 700 ngàn đồng) sa Rai (đơn vị mblang taneh di Thái Lan- samu  1.600 mét vuông) tapak ka urang nong pala phun nông nghiệp atau phun công nghiệp ngan haong ralo di abih yaok baoh sang oh tapa 15 Rai./.