1# Harei kabroi, di tuk tabiak bruk pachreih tui harei tapuk VN mbang yaka 3 harei 21/4 - tỉnh Lào Cai hu jak ba, rik pataom hu labaih 30 rabau baoh tapuk ka anek saih bhum glaong. Dom baoh tapuk ini hu parabha tal dom gilang tapuk, tủ tapuk di dom puk palei kan kandah, tapeng negar di Lào Cai, kayua 48 labik, kapul nyaom dalam tỉnh daong tapak , kuhria tui yaom jien abih tih jaik 500 triệu đồng.

2/ Ngan saong kadha “tapuk – ilamu saong patagok”, Harei pataom tapuk Hải Châu, ban sit Đà Nẵng hu peih tabiak di melam kabroi 20/4, rik daong ngak jeng bruk bhian randap puac tapuk ngan saong tuai damuai saong bhap bini ban sit Đà nẵng. Harei pataom tapuk thun ini pachreih hu jaik 100 gian hàng di 25 đơn vị, sang tapuk, sang patabiak tapuk dalam taneh ia hu mbaok tame.

3# Di sang thiếu nhi tỉnh Kiên Giang, Sở Thông tin saong Truyền thông tỉnh pambuak bruk saong uy mban bhapbini tỉnh peih pakak harei tapuk VN mbang yaka 3. Di var peih pakak, ông Lê Văn Chuyển, Phó giám đốc Sở Thông tin saong  truyền thông tỉnh Kiên Giang brei thau, harei tapuk Việt Nam mbang yaka 3 hu peih ngak  piah pachreih saong patagok bruk puac tapuk dalam bhapbini, pok je yaom glaong di tapuk, brei thau labik dang, bruk praong prang di tapuk dalam raidiuk.

4/ Tỉnh Quảng Ninh barau peih bruk pachreih daong dom xã, palei kan kathaot dalam tỉnh tabiak truh kan kathaot, padang ngak palei pala barau thun 2016. Di tuk peih bruk, dom kapul nyaom, doanh nghiệp, menuac urang hu tut angan tame daong  jaik 30 tỷ đồng daong ka dom xã, palei biak kan kandah. 

5# Tui Sở Lao động, Thương binh saong Xã hội tỉnh Đắk Nông: meng harei  20 - 30/4, 8 huyện, ban sit dalam tỉnh peih bruk brei 600 tấn barh daong bhapbini mbang cang yuak, tua thun 2016. Ini lac brah hu rajaei tacei mintri jien padai brei meng gilang caik piah di negar piah Đắk Nông daong pacang eik ka bhapbini di mbang cang yuak thun ini. Bruk brei brah hu yaok tui akaok menuac di yaok sang hu brei, yaok urang taduan hu  meng 15 - 45 kg . 

6/ Harei kabroi 20/4, kapul urang joh jo ban Cần Thơ hu peih bruk brei 21 radaih lăn ka urang joh jo. Ini lac bruk ngak piah daong ka urang joh jo hu radaih nao mai, duh ka bruk ngak saong bac daa patrun meneng kan kandah dalam rai diuk. Saai Nguyễn Chí Toàn, urang hội joh jo labik Nhịp Cầu, ban Cần Thơ khan lac: “Urak ini taduan hu radaih lăn ini biak sambai kayua nyu daong bruk nao mai mbuan lagaih, cadu glaih glar ka dom urang halan hatian. Jeng caong khin kapul dak harei dak patagok piah daong ka dom ayut joh jo sinh hoạt, bruk ngak piah ka urang eng drei kuhria ka rup pabhap”

7# Urak ini, di dom bhum pala phun pajaih di tỉnh Bến Tre daok rah tabiak bruk kurang phun pajaih ba tal bruk tagok yaom. Huyện Chợ Lách hu angan lac “patao phun pajaih di bhum taneran kraong CL, yaok thun, brei tabiak darak pasal jaik 10 triệu phun pajaih dom janih. Kayua tua riya, njom mbaak, hu tal 60% taneh phun pajaih di huyen ini metai saong thu hala. Ông Nguyễn Văn Đang, daok di xã Phú Sơn,  huyện Chợ Lách, chuyên pala phun pajaih brei thau:  “Yaom phun meda  tagok glaong jang. Kayua dom tỉnh hu phun metai saong urak ini daok hu darak pasal Campuchia tra, darak pasal ini biak praong saong urang daok blei piah pala.

Patui di ini dom khau tin dunya:

8/ Harei kabroi 20/4, Tổng thống Êcuađo Ra-pha-en Cô-rê-a khan lac tui kuhria mboh barau di abih, urang metai hadei di mbang megei baoh taneh 7,8 độ richte rah tabiak harei 17/4  tagok tal 553 urang. Urak ini jeng daok labaih 100 urang lahik saong hu labaih 4 ribau 600 urang njauk rambuah. Tổng thống Cô-rê-a hu mbaok tapak di bhum megei baoh taneh piah tacei pato saong hu mbaok tame parabha pandap daong ka bhap bini dalam dom harei tapa.   

9# Dalam tuk hu tal yaok pluh rabau urang lahik sang danaok hadei di dua mbang megaiy taneh khang di tỉnh Cư-ma-mô-tô barau blaoh, rajaei Nhật Bản hu mek sa sang guc di puk palei ini ngak labik daok tạm thời ka dom urang gaok bala di mbang megaiy taneh. Bruk ini jeng brei mboh Nhật Bản daok dang anak rilo kan kandah saong tavak tavaiy dalam bruk pasaim veik dom khut khat di mbang megaiy taneh hu maong lac praong abih kuhria meng thun 1923 di bhum Tây nam di Nhật Bản.

10/ Urang ngak praong Mianma barau brei am cuh klak labaih 23 ribau drei menuk ada piah pacang cakak bruk pambak praong jit cúm menuk ada H9N2, rah tabiak meng akaok bilan ini di Mô-ni-oa dalam bhum Xa-ga-inh, tây bắc Mianma. Karja puk palei brei thau, taong abih menuk ada njauk am cuh klak nan di 47 trang trại raong glang di Mô-ni-oa.  Urak ini, bhum raong glang menuk ada labik ini njauk pacang cakak./.