1 # Ủy ban Mặt trận Negar Việt Nam tỉnh Sơn La bahrau peih bruk jao sang gul pataom ka dua baoh sang kathaot, baoh sang biak kathaot di huyện Yên Châu saong Vân Hồ. Bruk daong padang ngak saong jao sang gul pataom ka baoh sang kan kathaot brei mboh bruk sangka biak ralo di dom pakat, dom ngành, dom kapul nyaom ngan haong dom baoh sang kathaot dalam tỉnh, daong ka dom baoh sang hu labik daok tani tanat, grap tanat ngak mbang, patagok kinh tế, yam tagok dalam rai diuk, abih di nyu lac dalam tuk Tết mai, akaok thun bahrau tal.

2/ Chi cục khik iek darak pasar tỉnh Quảng Bình barau am cuh klak pandap cap mek kayua oh daok tukvak pandar. Dom pandap hu am cuh klak nan lac 1,5 tấn baoh hatai pabui saong seok menuk mbau bruk. Dahlau di nan, di harei 18/1, kapuk khik iek darak pasar tỉnh Quảng Bình duah mboh lô pandap ini di kho li-ar di cty TNHH pablei salih saong dịch vụ Tuấn Vũ, daok di xã Lý Trạch, huyện Bố Trạch, Quảng Bình.

3 # Meng thun 2012 tal 2015, Đác Nông hu buh tame  jaik 661 tỷ đồng padang ngak labaih 400 công trình pakajap ribaong kraong saong jalan mbak nao mai dalam tỉnh. Đác Nông daok buh tame labaih 540 tỷ đồng peih ngak danak dak pakajap ribaong kraong saong jalan mbak nao mai dalam tỉnh, kham merat tal thun 2020 jalan mbak hu tuh menyek dalam tỉnh hu patagok, meng 51% thun 2015 tagok 64%.  

4/ Huyện Trà Cú, tỉnh Trà Vinh hu labaih 62% menuac sia lac urang bangsa Khmer. Dalam nan, dom baoh sang Khmer kan kandah ka sang daok biak ralo. Bruk hun phun jien padang ngak sang di kapul urang kamei huyện Trà Cú hu daong ka dom urang hội kan kandah ka sang daok hu sang daok siam mekre, daong ka urang sahanang hatai padang mbang ngui.

5 # Akaok Uỷ ban Bhap bani tỉnh Ninh Thuận bahrau hu harak tacei pato Sở Lao động-Thương binh saong Xã hội pambuak haong dom jabat peih bruk blei saong brei labaih 30.230 harak bảo hiểm y tế ka bhap bani urang bangsa takik daok pak bhum atah bayah, bhum kan kandah dalam tỉnh. Dalam nan hu dom huyện Thuận Bắc labaih 8.150 harak, Bác Ái labaih 21.630 harak saong huyện Ninh Hải labaih 450 harak. Hadei di tuk daong brei, dom ngành, puk palei njauk bhian nao pasang iek, pachreih bruk peih ngak chế độ bảo hiểm y tế ka dom đối tượng njauk tui adat hukum.

6/ Dalam tuk tết anek sak kara 2016 ini, kapul daong urang ruak kankathaot Tây Nam bộ hu peih danak dak tết ka urang kan kathaot ngan saong kadha “Xuân anit ranam”. Tui nan, kapul daong urang ruak kan kathaot Tây Nam bộ hu pataom tame jak ba dom doanh nghiệp, tập đoàn, urang ngak pahala daong jaik 10 tỷ đồng piah iek glang ka dom baoh sang kan kathaot di dom tỉnh, ban bhum taneran kraong Cửu Long bui sambai uan rok tết.

7 # Bác sĩ Phạm Thị Nguyệt Ánh, Pasak khik caga pren yava urang ngak saong môi trường Bal raya Hồ Chí Minh brei thau: urak ini hu labaih 22% anak saih bal raya njauk cakong talang raong. Tui bác sĩ Nguyệt Ánh, hu ralo makna ngak ka uranaih cakong talang raong: daok suan tư thế, bàn kik suan quy cách, ngak bruk trak... dom makna ini njauk hu tah klaak, meng pambuak bruk khang kajap di sang bac – baoh sang saong gah y tế, piah khik caga pren yava ka uranaih.

Patui di ini dom khau tin dunya:

8/ Yaom lac daok bac daa, ngak bruk di taneh ia langiu min dom urang đảng di negar langiu jeng biak sangka tui iek var peih mbaok nyaom roya đảng mbang ka 12 tapa dom jalan truyền thông. Dom urang đảng daok atah taneh ia jeng njauk hatai saong taong yaom glaong pathau khan di ban chấp hành TU& đảng mbang XI ka dom văn kiện nyaom roya XII di đảng saong caong khin hadei di nyaom roya XII meda hu dom jalan ngak praong patagok kinh tế - XH khang kajap.

9 # Pháp meda pambuak bruk haong Rumani dalam bruk khik caga an ninh labik tapen negar châu Âu. Nan lac panuac khan di akaok negar Pháp Phrăng-xoa Ô-lăng-đơ hadei di mbang taom gaok Thủ tướng Rumani Đa-xi-an Xi-ô-lốt. Akaok negar Phrăng-xoa Ô-lăng-đơ khan lac Rumani saong Pháp hu pambuak bruk  haong gauk piah pamaong tal bruk khik caga an ninh tapen negar gah langiu Liên minh châu Âu min jeng daok ngak njauk tui adat hukum di Hiệp ước tự do nao mai Sen-gien. 

10/ Di  Ki-ép (Kiev), Ucraina, Đại sứ quán Việt Nam di Ucraina  barau peih bruk taom mbaok pahadar 50 thun padang kapul nghị Ucraina - Việt Nam saong salam uan Tết anek sak kara 2016.  Lambaok karja VN, Đại sứ Nguyễn Minh Trí hu panuac tadhau yuh saong taong yaom glaong dom rik daong biak praong saong hu mak di kapul hữu nghị Ucraina – Việt Nam dalam luac 500 thun tapa piah pakhang saong patagok talei pambuak bruk di dua taneh ia  VN - Ucraina. /.