Tal urak ini, gah pato megru di dom puk palei dalam negar hu  ginup abih labik pato, pandap pato, kapul nyaom gru pato… pabak ka bruk salih bahrau pato megru, thun bac bahrau 2015-2016:

          1 # Kuhria caga ka thun bac 2015-2016, Jabat Pato megru huyện bhum ceik A Lưới, tỉnh Thừa Thiên-Huế buh tame jaik 5 tỷ đồng padang ngak 14 duk bac bahrau pak xã Nhâm; padang ngak  paga pacang ka khuôn viên Sang bac mầm non A Ngo; pasiam veik mblang ma-in ka sang bac triểu học dalam huyện... taphia di nan, Jabat pato megru huyện A Lưới daok buh tabiak labaih 200 triệu đồng piah patagok tu tapuk ka pakat I saong pakat II dalam huyện, khik ka taong abih anek saih nao bac hu ginup tapuk giáo khoa. Ong Nguyễn Duy Nguyên, Akaok Jabat pato megru huyện A Lưới, tỉnh Thừa Thiên-Huế brei thau, thun bac ini, huyện A Lưới hu labaih 12.000 anek saih dom pakat tame bac: Piah kuhria caga ka thun bac bahrau, Jabat hu peih bruk pasang iek pacang mbaih mbaoh, pasiam veik cơ sở vật chất ka dom sang bac. Drei hu pasiam hasit yau ngak paga, mblang ma-in, tabung pacang. Ndom ka cơ sở vật chất, pak huyện A Lưới, taong abih sang bac hu padang meng pakat 4 tagok saong dom labik pato praong di dom sang bac pakat I, pakat II hu ngak lầu.

2/ Thau cambaih tacei pato di phaok thủ tướng Vũ Đức Đam saong mintri pato megru, sở pato megru tỉnh Gia Lai hu tacei pato salih barau bruk peih mbaok thun bac barau 2015 – 2016 tui jalan lac taong abih kayua dom adei anek saih. Tui nan, taong abih dom labik pato megru dalam tỉnh jeng peih thun bac bahrau di 8 tuk harei 5/9/2015. Bruk ngak lễ oh suai jang 60 menit. Bruk me-in sambai iek tui bruk di đơn vị, peih dom bruk me-in bui sambai, ba chreih chrai ka anek saih yam tame thun bac barau.  

3 #  Thun bac 2014 -2015, tỉnh Đắc Lắc hu jaik 1.000 sang bac dom pakat haong jaik 450 ribau anek saih, dalam nan 34% lac anek saih bangsa takik. Dom bruk ngak hu di gah pato megru tỉnh Đắc Lắc dalam dom thun tapa nan lac hu 35 anek saih mek hu giải dalam dom mbang pakacah anek saih naih jioy pakat negar, dang akaok dalam 10 tỉnh bhum kreh negar saong Tây Nguyên. Thun bac 2015-2016, gah pato megru brei patagok dom sang bac, tal bac, patagok cơ sở vật chất, pandap pato megru piah khik chất lượng pato saong bac. Abih di nyu nan lac, patui bruk buh jien tame piah paglaong chất lượng pato megru bhum atah bayah, bhum urang bangsa takik.

4/ Piah khik caga siam mekre ka thun bac barau, ban sit Tây Ninh, tỉnh Tây Ninh hu ngak salah bloh song ba tame pandar 3 sang bac barau nan lac: tiểu học Nguyễn Thị Minh Khai, Nguyễn Thái Bình saong sang bac tiểu học Tôn Thất Tùng. Langiu di nan, ban sit Tây Ninh hu ramik pasiam 27 sang bac anih labaih 1 tỷ 950 triệu đồng. meng jien di kadung jien karja tỉnh. 

5 # Pak tỉnh Bạc Liêu, Sở Pato megru tỉnh hu pandar dom sang bac  peih thun bac bahrau dalam sa harei haong gauki nan lac page harei 5/9. Bruk peih thun bac bahrau oh dui atah tukvak, đơn giản min trang trọng.

Hadei di ini, kol dahlak likay salaih tapa dom khau tin njauk caik hatai:

6/ Tal urak ini, tỉnh Bình Định hu 12 po kapal hu mbaoh tangin tame harak pambuak bruk mesraiy jien saong dom gilang pariak piah ngak kapal ikan kanduh pasei tui nghị định 67 di rajaei, tui yaom jien mesraiy abih tih jaik 170 tỷ đồng, urak ini hu peih brei mesraiy jaik 35 tỷ đồng. Bilan 9 ini, urang taong cap ikan Bình Định taduan mek 4 kapal ikan kanduh pasei, dalam nan 3 kapal ngak di tỉnh Khánh Hòa, sa kapal ngak di ban sit Hải Phòng.

7 # Piah khik caga bruk ngak mbang pala drak saong tani tanat rai diuk bhap bani, pacang cakak bala meng langik tasik, pacang caga bruk glut jaleih taneh dak harei dak khang, tỉnh Tiền Giang buh tabiak labaih 14 tỷ đồng xử lý chip 35 labik glut jaleih trak labik aia dauk gah pai dahlau di bilan hajan ribuk thun 2015; dahlau di nan tỉnh hu daong labaih 9 tỷ đồng, daok veik lac jien di kadung jien karja huyện saong bhap bani rik daong.

8/ Meng akaok thun 2015 tal urak ini, hu 41 urang lac urang bangsa takik dalam huyện Sa Thầy, tỉnh Kon Tum pang tui panuac pachuh pajak di kol kanjah klak sang nao negar langiu. Bruk klak nao negar langiu nan lac piah hu rai diuk sanang sane, duah hu ralo jien. Thau lac dom urang bangsa takik di huyện Sa thầy nduac nao negar langiu lac kayua jia tui urang, pang tui panuac pachuh pajak di kol kanjah, công an tỉnh Kon Tum kham merat jak ba, pathau khan langyah brei dom urang nan thau ka sarak ưu tiên di đảng, karja ngan saong mikva. Pathau khan tacei cambaih dom âm mưu thủ đoạn di kol kanjah di negar langiu. Tapa nan, taong abih dom urang nduac nao thau hu bruk ngak sung hukum di drei saong sanya oh ngak sung tra./.