1 # Akaok Quốc hội Nguyễn Sinh Hùng ba akaok Kapul urang lambaok pakat glaong Quốc hội negar drei bahrau nao tal Oa-sinh-tơn rivang Hoa Kỳ tui panuac daa di Akaok Thường trực danh dự Thượng viện Hoa Kỳ,  Pa-tric Lê-hi (Patrick Leahy), Akaok Hạ viện Hoa Kỳ Giôn Bơn-nơ (John Boehner) saong Akaok Uỷ ban Quân vụ, Thượng nghị sĩ Giôn Mắc-kên (John McCain). Tui kuhria, dalam tukvak daok rivang Oa-sinh-tơn, akaok Quốc hội Nguyễn Sinh Hùng saong Kapul urang lambaok Quốc hội negar drei meda hu mbang taom gaok haong akaok Thường trực danh dự Thượng viện Hoa Kỳ  Pa-tric Lê-hi, Akaok Hạ viện Hoa Kỳ Giôn Bơn-nơ saong Akaok Uỷ ban Quân vụ, Thượng nghị sĩ Giôn Mắc- kên; taom gaok Ngoại trưởng Hoa Kỳ Giôn Ke-ri saong rivang palei di aruah Tổng thống Giooc-giơ Oa-sinh-tơn (George Washington), rivang muyim dakrai sajarah Hoa Kỳ, muyim lưu trữ negar, rivang đài tưởng niệm Lincoln, đài tưởng niệm Mác-tin Lu-dơ Kinh (Martin Luther King).

2/ Tui Thường trực mban tacei jalan Tây nguyên, urak ini dom tỉnh Tây Nguyên hu 53/597 xã, phường, ban sit mek hu tanut palei pala barau, dalam nan tỉnh Lâm Đồng hu 33 labik, Gia Lai hu 11 labik, Đắc Lắc hu 6 labik, Kon Tum hu 3 labik. Eng tỉnh Đắc Nông urak ini oh ka hu labik halei mek hu tanut palei pala barau. Dom tỉnh Tây Nguyên  pachreih hu labaih 65 ribau tỷ đồng, dalam nan tỉnh Đắc Lắc pachreih hu labaih 30 ribau tỷ đồng piah buh tame padang ngak palei pala barau.

3 # Piah hu siam mekre ka thun bac bahrau 2015 -2016, Gilang pariak Ngak nong saong Patagok palei pala Việt Nam pambuak haong Ủy ban bhap bani tỉnh Hà Giang bahrau peih pakak Sang bac Phổ thông Bangsa gam bac gam daok pakat I xã Thắng Mố, huyện Yên Minh. Sang bac Phổ thông Bangsa gam bac gam daok pakat I xã Thắng Mố, huyện Yên Minh hu padang ngak meng phun jien di Gilang pariak Ngak nong saong patagok palei pala Việt Nam yaom labaih 10 tỷ đồng, sang bac ini mek hu chuẩn pakat negar. Langiu di nan, gilang pariak ngak nong saong patagok palei pala Việt Nam daok brei 200 triệu đồng ka sang bac.

  4/ Tỉnh Yên Bái peih bruk ba 450 urang lin bahrau nao ngak lin mbang 2 thun 2015. Dahlau harei jao quân dom puk palei hu peih bruk pataom mbaok, taom gaok ndom meyai nao mai, daoh tamia, rivang sua saong alin hadiah pandap pachreih ba urang lin bahrau tagok jalan nao ngak lin. Mbang jao taduan quân mesup ini hu dom puk palei peih ngak praong prang, samar, siam mekre saong patak pataom. Urang lin bahrau angan  Nguyễn Hà Nam, phường Minh Tân, ban Yên Bái chreih chrai brei thau: Dahalak mboh lac tagok jalan ngak bruk khik caga taneh ia palei negar nan lac bruk di yaok rahra, abih di nyu nan lac ngan saong dam dara. Rup dahlak ye mboh biak bui sambai saong chreih chrai tuk nao ngak lin,  kham merat, pasram megru dalam  bol bala.

5 # Angaok bhum tasik Hà Tiên dalam tỉnh Kiên Giang, gah chức năng dalam Bộ Tư lệnh Bhum Cảnh sát tasik 4 hu peih bruk pasang iek Gilai KK 20112 kayua ong Sorm Mao ngak po gilai gam haong 3 urang ngak quốc tịch Campuchia. Pak vuktu pasang iek angaok gilai pajeng 6m³ kayau cẩm saong kayau hương, po gilai oh ba tabiak harak ba-ar halei pambuak pagam tal bruk ngak di drei angaok tasik saong asal di kayau pajeng ba angaok nan. Urak ini, Bộ Tư lệnh Bhum Cảnh sát tasik 4 hu ba gilai KK 20112 gam haong dom urang angaok sruh gilai nan mai cảng An Thới- Phú Quốc piah peih duah thau cambaih laih saong langyah tui njauk adat hukum.

6/ Cúm menuk ada H5N1 barau tamuh tabiak di sa trại raong ada, xã Lương Sơn, huyện Ninh Sơn, tỉnh Ninh Thuận. Taphon ada labaih 1.000 drei di ong Đặng Hùng Khiêm, palei Trà Giang 2, xã Lương Sơn mboh tagloh meta, pran takai… yaok pluh drei ada metai palai rai, min oh thau makna. Tui duk iek di jabat thú y bhum 6, dom mẫu bệnh phẩm jeng dương tính saong cúm menuk ada H5N1. Gah thú y puk palei urak ini daok patagok bruk pathau khan, tacei ba bhap bini peih ngak dom jalan pacang cakak, oh lui jit pambak praong.  

7 # Ủy ban Mặt trận Negar Quận 8, bal raya Hồ Chí Minh pambuak haong Ban Jak ba kadung jien brei ka urang kathaot di quận gam haong dom urang ngak pahla peih bruk alin brei pandap panda bac megru ka dom anek kamuan urang Cam daok pak phường 1, Quận 8. Hu 161 adei anek saih Cam taduan mek hu pandap nan lac sa bộ pandap bac megru, yaom 300 ribau đồng. Gam haong pandap, yaok adei daok taduan hu 150 ribau đồng meng dom urang ngak pahla. Adei Phalida anek saih bac tal 11 Sang bac Trung học phổ thông Lê Thánh Tôn drut droi lac:  “Kayua sang oh hu jien nan ye taduan mek hu pandap ini adei biak bui sambai. Dalam thun bac bahrau ini adei  kham merat bac da-a naih joi.

8/ Page ini di Cung ilamu Hữu nghị Việt Xô HN, Rayoa sap ndom VN Vov peih bruk pahadar 7 thun padang rayo 7/9 saong taduan mek Huân chương Độc lập hạng I mbang ka 2. Nini lac tuk piah ka urang jakar, urang ngak di rayo hadar veik ilamu hadah hadai piah kham merat yam tagok, ngak siam bruk bo Đảng, Karja saong bhap bini jao brei.

Patui di ini dom khau tin dunya:

9/Đức hu peih pabah mbang negar, taduan raok yaok ribau urang nduac mai dalam kiệt sức, hadei di tuk dom urang nan nao tapa ralo taneh ia di Ban-căng. Gah urang ngak praong Đức brei thau, 10 ribau urang nhập cư hu nao tame ban Munich dalam harei 5/9 angaok dom kapal đặc biệt, tabiak meng ban ine Bu-đa-pét di Hung-ga-ri saong nao tapa Áo. Nao hu tal Mu-nich,  urang nhập cư meda nao tapa dom pasak tút angan tạm trú dahlau tuk hu ba nao tal dom labik tị nạn kayua rajaei Đức padang tagok dalam dunya.

10# Thủ tướng Ôx-trây-li-a Tô-ni Áp-bốt bahrau brei thau, negar ini meda taduan raok ralo jang urang tị nạn meng Xyri, taphia di nan brei thau Akaok Mentri nhập cư Ôx-trây-li-a Pi-tơ Đắt-tơn (Peter Dutton) meda nao tal Giơ-ne-vơ (Thụy Sỹ) piah ginum biai cambaih laih bruk ini haong Cao Ủy liên hợp quốc ka urang tị nạn. Panuac brei thau ini hu ba tabiak dalam tuk khủng hoảng urang tị nạn pak Châu Âu daok tagok khang. Pok panuac ndom haong báo chí, Thủ tướng Áp-bốt khang panuac lac, Ôx-trây-li-a meda taduan raok ralo jang dom uran tị nạn meng dom negar daok mesruh metak, jang yau patagok bruk daong brei jian padai ka dom negar nan./.