1/ Harei ni,  di HN, Ủy ban Thường vụ Quốc hội peih nyaom biai mbang ka 36. Rah tabiak meng harei ni tal harei 17/3, nyaom biai hu rilo asal kadha prong, dalam nan Ủy ban Thường vụ Quốc hội hu peih bruk tangi sua Chánh án Tòa án bhap bini tối cao Trương Hòa Bình song akaok mintri, Chủ nhiệm Ủy ban bangsa Giàng Seo Phử ka dom bruk khik ramik di dom gah.

2/ Harei kabroi, hadei di tuk nao rivang saong pasang iek bhum tapen negar di đồn biên phòng Bu Prăng, Phó Thủ tướng, akaok mintri Ngoại giao Phạm Bình Minh gam saong kapul ngak bruk di rajaei hu var taom gaok dom urang dang akaok tỉnh Đắc Nông ka bruk patagok kinh tế - xã hội, bruk ndom biai nao mai saong phân giới, padang geng jameng.

3/ Mintri ngak nong song patagok palei bahrau hu harak công điện payua ka Akaok UB bhap bini dom tỉnh, ban di TƯ daok di gah barak hu panuac tacei pato ka bruk khik caga padai bilan đông xuân 2014 – 2015 dalam tuk langik tasik dok siam, Dom tỉnh bhum taneran krong Hồng song trung du gah barak brei khik ginup ia pruh padai, palagaih ka padai tabiak dhar, hu ginup ia dalam hamu luac tukvak patagok di padai.

4/ Thau lac bruk patrun kan kathaot lac bruk ngak haong gauk di taong abih Đảng bộ, karja dom pakat, dom kapul nyaom saong abih xã hội, tỉnh Lâm Đồng daok pachreih yaok nguồn lực patui jhul pakhang peih ngak dom sarak xã hội ka bruk patrun kathaot khang kajap saong khik kajap an sinh xã hội di puk palei. Dalam thun 2015, dom gah chức năng di Lâm Đồng pataom tame langyah dom bruk bức xúc ka taneh daok, taneh ngak mbang ka bhap bini bangsa takik, pasiam veik dom công trình ia hacih, padang ngak sang bac, blai y tế di bhum atah bayah.

5/ Di labik du lịch Sinh thái ilamu bhap bini Ko Tam, ban sit Buôn Ma Thuột, Nyaom pakacah sarak rup kayau bhap bini Tây Nguyên bahrau peih tabiak. Hu rah tabiak meng harei 8 tal harei 11/3, nyaom pakacah mbang ni hu 37 nghệ nhân mai meng dom puk palei di dom tỉnh Kon Tum, Gia Lai song Đắc Lắc.

6/ Urak ini, yaok pluh ha padai di xã Ea Bia, huyện Sông Hinh, tỉnh Phú Yên daok kurang ia, ralo taneh pala bei di puk palei ini jeng metai njauk pala veik mbang dua. Kayua hajan takik duk saong yaok thun, ia danao thủy điện Sông Hinh urak ini biar jang tanut thiết kế sa mét, danao thủy điện Sông Ba Hạ jeng daok thu ia.

7/ Urak ni, tỉnh Tiền Giang dok yuak bilan padai Đông xuân. Ni lac tukvak bo rilo tapon ada palao meng grauk labik dok dalam song langiu tỉnh tuh mai dom mblang padai hu yuak bloh piah mbang padai laik, kandaong. Di dom xã dok di huyện Cái Bè, Cai Lậy, tỉnh Tiền Giang hu yaok rituh tapon daa palao tabiak ngan song yaok ribau drei. Dalam tuk vak jit kum menuk ada dok rah tabiak di dom tỉnh bhum taneran krong CL, Karja song kapul nyaom puk palei njauk tagok bruk tui iek tapon ada, oh caik ka tapon ada oh ka klauk vắc xin nao tal labik karei.

Patui di ini dom khau tin dunya:

8/ Di nyaom darak du lịch dunya 2015 barau peih tabiak di Berlin, taneh ia Đức hu parang iek dom blah bản đồ VN hu ralo ayut Đức saong dunya hu mbaok di nyaom darak caik hatai sangka. Dalam labik parang iek di VN di nyaom darak hu parang iek dom blah bản đồ hu in hình dua pulao Hoàng Sa saong Trường Sa, dalam nan tacei lacVN ngak pô.

9/ Urang vak di rayo sap ndom VN dok di TQ brei thau, hu 5 urang metai song 44 urang njauk  rambuac dalam nan hu 12 urang njauk rambuac trak dalam mbang radeih phaoh gauk rah tabiak di harei 8/3 di tỉnh Hà Nam, TQ. Bala  rah tabiak tuk 6 tuk 20 minite, sa radeih pajeng 55 urang dok peih di angaok jalan cao tốc Thương Hải Thiểm Tây nduac tapa tỉnh Hà Nam laik trun danao ia. Hadei di tuk rah tabiak, urang pan akaok hu trun tapak song tacei  pato bruk pasiam dom khat lihik song peih bruk duah thau ka tantu cambaih laih makna ba tal bala.

10/ Sa janih dum barau barau duah mboh dalam labik mỏ bau-xít daok jaik Nhu-lun-bai, bhum lãnh thổ brak (Northern Territory) Australia. Janih ini hu angan lac “dum darui di Kohout”, dalam chi Polyrhachis, hu makna lac “ralo darui”. Janih ini hu darui biak praong yau takaiy di gah likuk di rup pabhap. Angan nyu hu caik tui urang ilamu Ru-đi Cô-hút, ong hu patabiak ralo tài liệu ka dòng Polyrhachis saong caik ralo thun brei ka bruk ruah duah dom nyaom dum đặc biệt ini./.