1/ Harei kabroi, Bộ Tư lệnh bhum Cảnh sát tasik  2 dok di xã Tam Quang, huyện Núi Thành, tỉnh Quảng Nam peih tabiak bruk pasram megru thun 2015 song peih bruk pakacah gauk tabung glong pahadar 40 thun harei peih paha gah merong, yasa taneh ia (30/4/1975-30/4/2015). Tapa nan, Thiếu tướng Nguyễn Quang Đạm, Tư lệnh cảnh sát tasik Việt Nam brei thau cambaih bruk pasram megru tal tong abih urang karja, urang lin di đơn vị nan lac “tui kajap bruk pasram megru, rik dong ngak brei ja yah bruk ngak di thun 2015”

2/ Harei kabroi, Thành Đoàn Đà Nẵng peih tabiak bilan dam dara saong pachreih tui thun ilamu, văn minh đô thị 2015. Ngan saong kadha “dam dara Đà nẵng bao akaok nao dahlau dalam bruk padang ban ilamu, văn minh”, lambaok yaok ribau urang đoàn, dam dara dalam ban mbaoh tangin sanya pakacah gauk ngak dom bruk ba tabiak di bilan dam dara thun 2015. Tapa nan, thành đoàn Đà Nẵng daong 10 baoh sang, yaok baoh sang yaom 20 triệu đồng ka dom urang daok dalam sarak karja, baoh sang kan kathaot.

3/ Tỉnh đoàn Đắc Lắc bahrau peih tabiak bilan dam dara thun 2015, hu mbaok labaih 500 urang đoàn dam dara. Ngan song kadha “Hadah mbaok meta yam tagok tui hala dok Đảng”, Ban Thường vụ Tỉnh đoàn Đắc Lắc hu peih bruk “Dam dara pakacah gauk ngak bruk piah salam uan nyaom roya Đảng dom pakat”, peih tabiak bilan dam dara di dom huyện, thị dalam tỉnh ngan song rilo danak dak siam lagaih di cơ sở.

4/ Harei 28/2 meng bloh, hajan ribuk ngak tayah sang danaok, pandap panda di 36 baoh sang bhap bini daok di PALEI 8, xã Đồng Nai, huyện Bù Đăng, tỉnh Bình Phước. Tui kuhria mboh di tuk camereip, hu 19 baoh sang jaleih, 17 baoh sang par tabung, jaleih daning. Biak patuah oh njauk menuac. Thau hu bruk ini, karja palei saong dom kapul nyaom di xã Đồng Nai mai hu mbaok saong tacei pato bruk pasiam veik dom khut khat meng bala nan.

5/ Ủy ban bhap bini tỉnh Hậu giang hu harak Quyết định 154 song patabiak jalan peih ngak danak dak bruk ngak bangsa tal thun 2020. Tui nan tal thun 2020 urang bangsa takik dalam umo ngak bruk hu pasram megru, pato pakai tagok hu labaih 50% , taong abih uranaih dalam umo hu nao bac, yaok thun boh sang kan kathaot trun hu meng 2 -3% tagok, 70% boh sang hu tanut chuẩn di mintri padang ngak, jien mek tame kuhria tui akaok menuac di bhum urang bangsa takik yaok thun tagok jang meng 2 mbang tagok dut song urak ni. 

6/ Dom harei jaik di ini, hadei di tuk padeih tết, urang mai iek ruak di dom sang iek ruak dalam tỉnh Tiền Giang biak rilo, glaong jang harei karei meng 2 tal 3 mbang. Makna nan lac hadei tết, ralo urang pataom mai iek ruak hong gauk, abih di nyu nan lac dom urang ruak hu harak bảo hiểm y tế, dom urang iek ruak mãn tính tal harei tái khám. Ralo menuac njauk nao nộp harak iek ruak di dom duk iek ruak meng 2 tal 3 tuk sabuk.  

7/ “Huyền thoại trong lòng đất” lac angan ieu di mbang taom gaok ndom biai nao mai haong dom urang kamei du kích Củ Chi dahlau deih, rah tabiak harei kabroi di ban raya HCM. Danak dak kayua Cung Văn hóa Lao động pambuak song rayo papar binguk ban raya HCM peih ngak di tuk pahadar harei dunya urang kamei 8/3 song pahadar 40 thun harei peih paha gah merong yasa taneh ia. Ni lac tuk taom gaok dom urang kamei du kích – dom urang dok duik  hu ngak jeng ja yah sajarah dak rai dalam mbang mesruh metak pacang Mỹ dong ka taneh ia di bhum taneh pasei Củ Chi.

Patui di ini dom khau tin dunya:

8/ Thái Lan daok kuhria peih pabah mbang ka urang ngak phổ thông Việt Nam hadei di tuk mboh lac urang ngak meng 3 taneh ia Campuchia, Lào saong Mianma oh ka pabak ginup. Brei panuac angaok rayo papar sap negar Thái Lan barau ini, Thủ tướng Thái Lan Pra-dút brei thau, taneh ia ini meda kurang 60 tal 70 ribau urang ngak phổ thông tuk hu mbaok tame cộng đồng kinh tế ASEAN di akaok thun 2016 saong Thái Lan daok jhul pakhang bruk pasang iek ba urang ngak meng Việt Nam piah pabak bruk ini.

9/ Di ban No-dần xua Mác-nơ (Nogent-sur-Marne), gah lingiu ban ine Paris, hu rah tabiak danak dak uan raok thun anek sak pabe hu angan “Tết palei dahlak” ngan song rilo bruk ngak hu dui atah abih harei. Danak dak kayua kapul urang VN daok di Frang peih ngak, pachreih hu labaih 1000 urang Việt mai meng grauk labik dalam negar Frang.

10/ Libi barau hu panuac khan lac meda rah tabiak kan kandah khang ngan saong urang nhập cư di ban Mít-ra-ta kayua kurang jien, pandap panda saong labik piah iek glang ka dom irang meng châu Phi tuh mai ini daok dahlau di tuk tapa tasik nao châu Âu. Ong Bát-qua – urang dang akaok jabat pacang di cư sung hukum di Mít-ra-ta brei thau, yaok rituh urang di cư urak ini daok diuk dalam kan kathaot di sa pasak brei ka urang nhập cư di ban tapen tasik ini ./.