1/ Di Trụ sở rajaei, Thủ tướng Nguyễn Tấn Dũng bahrau pan akaok mbang nyaom Thường trực rajaei piah pang Mintri Công Thương pathau khan jalan rami ramik yaom điện thun 2015. Hadei di tuk pang mintri công thương song Tập đoàn Điện lực Việt Nam pathau khan dom jalan ngak piah ramik veik yaom điện, Thủ tướng, dom phó Thủ tướng rajaei, urang dang akaok dom mintri hu ginum biai song njauk hatai ka bruk ramik veik yaom pablei điện. Tui nan, njauk hatai brei tagok yaom pablei điện 7,5%, samu yaom blei điện tui kuhria 1.622,05 đồng/kWh song tuk vak tagok yaom pablei điện meng harei 16/3/2015

2/ Thun 2015 lac thun akaok meti mintri pato megru peih mbang pakacah THPT pakat negar piah xét tốt nghiệp THPT saong piah tui nan palih ruah tame đại học, cao đẳng. Tui kuhria mbang pakacah hu peih tabiak di akaok bilan 7/2015.

3/ Dom thun tapa, meng phun jien danak dak 134, 30a di rajaei, tỉnh Lai châu hu dong ka boh sang kan kathaot taneh pala drak piah hu jalan yam tabiak truh kan kathaot. Min urak ni, dalam tỉnh dok jiak 6.000 boh sang kurang taneh pala drak njauk hu bruk sangka dong ba.

4/ Di ban Đà Nẵng, Liên minh Hợp tác xã Việt Nam barau peih nyaom ginum meyai “bruk ngak HTX sang bac, ilamu dunya saong triển vọng di VN”. Di VN, puac thun 2006, Liên minh HTXVN peih ngak đề án “patagok HTX dalam dom sang bac đại học, cao đẳng saong TH chuyện nghiệp”. Tal urak ini, hu 6 HTX sang bac hu padang tagok, min daok ngak tui jalan sit sot.

          5/ Labaih 20 thun tapa, sang bac trung học phổ thông bangsa gam bac gam dok Huỳnh Cương di tỉnh Sóc Trăng  hu daong ka dom rairah anek saih bangsa Khmer. Sang bac oh lac pato akhar haroh, bo dok pato song iek glang tal dom var lasei, var ndih ka dom adei. Rilo anek saih bangsa takik hu palih ruah tame labik ni bac megru piah patagok ilamu di drei, jeng menuac jeng urang, gilac mai puk palei.

6/ Tui sở ngak nông saong patagok palei pala tỉnh Tiền Giang, urak ini ia mbak daok njom tame baoh taneh, ia di dom kraong ribaong dalam mblang hamu daok kurang. Tui kuhria meng harei 10/3, cống Xuân Hòa di huyện Chợ Gạo – cống đập mek ia taba meng kraong Tiền piah pandar, piah pala drak dom huyện gah timur hu kreik sre piah pacang mbak. Kayua yau nan ye labaih 300 ha padai Đông xuân daok di bhum ia taba Gò Công mbuan kurang ia. Makna nan lac dom taneh ini urang nông drak suai, daok atah halau ia.

7./ Meng ni tal bilan 10/2015 Pasak patagok ilamu song Công nghệ trẻ di Thành Đoàn ban raya Hồ Chí Minh peih ngka danka dak “Urang ilamu daok ranaih umo halan hatain mbang ka 6 thun 2015”. Danak dak hu peih ngak di dom sang mac, sang bac, khu dân cư, bhum taneh ngak mbang, rong glang, hợp tác xã… di ban raya Hồ Chí Minh song dom tỉnh Đông Nam Bộ, bhum taneran krong Cửu Long song Tây Nguyên. Dom urang ilamu, trí thức, sinh viên halan hatain hu ba dom  pajaih phun pala, janih rong ka urang ong, pato pasram ka mikva jalan pala drak rong glang./.

Patui di ini dom khau tin dunya:

8/ Tuk thun barau anek sak pabe 2015, melam kabroi, di Bắc Kinh TQ, Đại sứ quán Việt Nam saong Đại sứ quán Lào di Trung Quốc peih bruk taom gaok ndom meyai nao mai piah patagok bruk jum pataom saong pambuak kein laba di Đại sứ quán dua taneh ia

9/ # Harei kabroi, di sang taduan tuai di Rajaei, Phó Thủ tướng, akaok mintri Ngoại giao Phạm Bình Minh hu ngak bruk haong Uy viên Bộ Chính trị, Phó Thủ tướng, akaok mBan Đối ngoại Trung ương Đảng bhap bini Cách mạng Lào, akaok Mintri Ngoại giao Lào Thoong-lun Xi-xu-lít tuk tapa rivang Việt Nam. Dua Phó Thủ tướng taong yaom glaong talei pambuak bruk meng kan di dua Đảng, Karja, Rajaei saong bhap bini dua taneh ia  Việt Nam – Lào dak harei dak patagok khang kajap, siam lagaih, kein laba di taong abih bruk pambuak gauk.

10/ Dunya daok pasang mbaok saong tukvak kan kandah di abih dalam bruk pacang cakak Ebola. Nan lac panuac di Tổng Thư kí Liên hợp quốc Ban Ki Mun tuk hu mbaok di nyaom meyai dunya pacang Ebola di Brucxen, Bỉ kayua Liên minh châu Âu saong dom gah pambuak bruk peih tabiak. Tui dom chuyên gia, dom urang njauk ruak barau trun khang di tây Phi, min bruk daok pamaong tal nan lac oh daok urang njauk ruak barau lac biak kan kandah. Jit meda tamuh veik, dom taneh ia brei patagok bruk tui iek, ngak siam bruk chẩn đoán, samar brei menuac tui iek piah iek ruak hu kein lagaih./.