1/ Hội Hữu nghị Pháp-Việt (AAFV) bahrau peih nyaom biai pakat negar mbang ka 15 piah pataom eik veik bruk ngak dalam tukvak 2011-2014 song brei tapa jalan ngak ka tukvak 2014 - 2016.  Brei panuac di nyaom biai, amuk Phạm Thị Thái, Phó Tổng Thư ký, Trưởng ban Châu Âu brei thau bruk kham merat di bhap bini Prang brei ka VN meng dahlau deih mbiah tal urak ni. Meng bruk oh thau gleih glar di Kapul hữu nghị Pháp Việt meng thun 1975 mbiah tal harei ni hu ba mai ka VN talei jum pataom, pambuak bruk dak harei dak khang kajap, pachreih ba bhap bini VN dalam bruk dak padang song patagok taneh ia.

2/ Harei kabroi, nyaom darak pasar pahala dunya Bazaar hu rah tabiak di mblang bein di khách sạn Ashok, pasak ban ine New Delhi di Ấn Độ, hu mbaok di ralo đại sứ quán dom taneh ia di labik ini. Nyaom darak pasar pahala dunya Bazaar nan lac bruk ngak yaok thun di gah ngoại giao Ấn độ di puac thun, kayua kapul urang kamei khối thịnh vượng chung di New Delhi dang tabiak peih ngak. Gian hàng di VN mboh biak mekre meta, yaih khan ralo janih pandap thủ công mỹ nghệ yau bình bingu, takai caik din, hộp khảm trai, nduol hu pachreih tuai mai maong iek.

3/ Kapul tong ikan ban sit ĐN pambuak bruk song Viễn thông Đà Nẵng bahrau peih bruk brei pandap ka urang tong ikan hu rai duik kan kandah, kham merat tabiak tasik dalam thun 2014. Kapul tong ikan ban sit ĐN hu brei 60 pok pandap, yaok pok yaom 10 triệu đồng ka 60 urang tong ikan hu rai duik kan kandah, nao tabiak tasik. Langiu di jien ndua, kapul hu jao 1000 hala dok song 2000 sim Vina palao tasik ka urang tong ikan. Abih tih yaom jien dalam mbang jao brei ni hu labaih 700 triệu đồng. Ni lac sa bruk pachreih ba ka urang tong ikan yam tapa kan kandah, kham merat tabiak tasik ngak mbang song khik caga chủ quyền palao tasik di taneh ia.

4/ Tỉnh Đắc Nông barau peih nyaom roya dom bangsa takik mbang ka 2.  5 thun tapa, dom jalan ngak, dom sarak di Đảng saong karja brei dahlau ka bhap bini bangsa takik hu tỉnh Đắc Nông peih ngak chip saong ba mai kein laba njauk pok meyaom. Baoh sang kan kathaot dalam bhum urang bangsa takik meng 43% trun daok ala 30%. Bhap bini dom bangsa tỉnh Đắc Nông bhian patagok bruk jum pataom, kham merat hu mbaok tame dom bruk pakacah gauk anit ranam taneh ia, rik daong patagok kinh tế - xã hội, khik kajap QP – an ninh.

5/ Kayua ribuk ka 4, dom harei tapa di tỉnh Gia Lai hu hajan di angaok taneh prong, ngak khat lihik ka bruk pala drak di dom labik, dalam nan hu tapon anek athur rong di huyện Kông Chro metai rilo. Bruk nan hu meneing makna kayua bhap bini bhian ranadap kak limo song pabe di tapen krong, chraoh dalam tuk melam. Nan ye tuk ia tagok glong, tapon athur njauk mblung ia atau ia ba seik, lihik. Karja song gah chức năng puk palei dok kuhria iek khat lihik piah dong ka dom boh sang hu anek athur metai song lihik.   

6/ Tukvak jaik di ini, dom doanh nghiệp saong bhap bini tỉnh Bến tre biak duh hatai anak bruk lahik điện gam gam, ngak kan kanadah tal bruk daok dang saong ngak mbang di bhap bini. Tui công ty điện lực Bến tre: makna rah tabiak bruk lahik điện gam gam nan kayua khut mac biến áp 40MVA T1 blai 110kV Bến Tre, ngak lahik điện dom labik.

7/ Meng akaok thun tal ni, Chi Cục khik ramik darak pasa ban raya Hồ Chí hu peih bruk pasang iek labaih 7000 mbang ka bruk hacih saat pandap mbang, langyah labaih 1trieu 300 ribau pandap song 700 tấn pandap panda, buh tame kadung jien karja 84 tỷ đồng. Min daok hu rilo bruk oh ka duah hu, pasang iek langayah. Kayua yau nan ye, bo bhap bini di ban raya, abih di nyu nan lac di labik hu rilo urang ngak jeng dok randap pandar dom pandap panda kurang an toàn, abih di nyu nan lac pandap pablei di jalan song dom darak pasa tamuh eng di tapen jalan.  

Patui di ini dom khau tin dunya:

8/ Di sân vận động Olimpic di ban ine Kiev (Ucraina) barau rah tabiak nyaom darak pasar pahala mbang ka 2 hu mbaok di 34 đại sứ dom taneh ia di Ucraina. Tame nyaom darak mbang ini, dom gian hàng di ralo taneh ia hu ba mai dom janih pandap di taneh ia, palei pala drei, dom pandap lưu niệm, dom pandap mbang gam saong dom danak dak daoh tamia bhap bini mbak carak ilamu di yaok bangsa.

9/ Kuhria tal urak ni hu labaih 1 triệu urang Phi-líp-pin njauk paduan ba nao labik karei hadei di tuk ribuk Ha-gu-pít tuh tame dom tỉnh  tapen tasik gah kreih negar song gah timur di negar ni. Tui panuac khan hu labaih 1 triệu 200 ribau urang hu ba tal sa ribau 500 pasak paduan ba di grauk labik di gah kreik negar Phi-líp-pin. Dom labik yau nhà thờ, sang bac, balik tập thể thao, dom labik ngak bruk di karja hu mek ngak labik dok ka bhap bini./.

10/ Karja Xi-ê-ra Lê-ôn barau brei thau, hu gilac dua bác sĩ Xi-ê-ra Lê-ôn metai kayua njom vi rut Ebola. Yau nan, tal urak ini, hu 9 bác sĩ Xi-ê-ra Lê-ôn metai kayua njom janih virut ini./.