1 # Tui bruk ba tabiak tal bilan 4 ini, Công ty cổ phần cao su Sơn La peih bruk kuah mek katak cao su. Ong Võ Nhật Duy, Akaok  Công ty cổ phần cao su Sơn La brei thau: hadei di tuk pasang iek, taong yaom mblang taneh cao su dalam tỉnh, Công ty meda peih bruk kuah mek katak cao su mbang ka sa dalam bilan 1 saong bilan 4 ini angaok mblang taneh 450 héc ta tapk huyện Quỳnh Nhai saong Mường La. Tal thun 2017 meda kuah mek di mblang taneh 1.400 héc ta. Tui kuhria, sản lượng yaok héc ta meda hu jaik 500 kg. Urak ini Công ty daok kuhria caga taong abih kadha ka bruk kuah mek katak, labaih 500 urang ngak hu pato pathram piah ba tame ngak.

2/ Di phường Lộc Vượng, ban sit Nam Định, tỉnh Nam Định barau rah tabiak lễ rok kiệu Ngọc Lộ, peih akaok ka dom bruk ngak di lễ hội Đền Trần rah tabiak luac 6 harei, meng harei 18 tal harei 23/2/2016, ngan saong kadha praong lac lễ khai ấn đền trần rah tabiak melam 14 suboh harei 15 bilan sa. Mban peih ngak lễ hội Đền Trần 2016 brei thau: harei 14 bilan sa, hadei di tuk peih ngak bloh adat cuh gilau, rok kiệu saong khai ấn, hu peih pabah mbang Đền Trần piah bhap bini saong tuai damuai tame ngak lễ akaok thun. Dalam tukvak lễ hội hu ralo bruk ngak ilamu yau: tamia lân, tamia rồng, tamia sư tử, daoh chèo, daoh chầu văn, pakacah cờ menuac, đầu vật, parang iek võ thuật… duh ka tuai damuai sambai xuân.  

3 # Tỉnh Quảng Trị bahrau duah mboh 3 sruh jit laka cambuai tapok kakau di tapol limo kubao. Hadei di tuk duah mboh, gah ngak nong saong patagok palei pala hu peih bruk pacang caga, padam jit ruak, oh caik ka nyu pambak prong. Ong Trần Thanh Hiền, Phaok Akaok Sở Ngak nong saong patagok palei pala tỉnh Quảng Trị brei thau: “Urak ini, pataom tame iek ruak dom drei limo laka cambuai tapok kakau saong pruh jru pametai anek ruak, blaoh kluak jru pacang caga ka dom drei limo oh ka laka cambuai tapok kakau. Khaol dahlak hu Harak pathau tagok Ủy ban bhp bani  likau jien daong blei ginup vắc xin saong tacei pato dom huyện, Chi cục thú y pataom tame kluak jru pacang caga dalam vụ xuân anak tal”

4/ Ong Đinh La Thăng, Ủy viên mintri chính trị, Bí thư thành ủy ban raya HCM barau hu var ngak bruk saong huyện Củ Chi ka bruk peih ngak sarak nyaom roya đảng bộ ban raya mbang ka X tukvak 2015 – 2020. Brei panuac di var ngak bruk, ong Đinh La Thăng ndom lac: meyah oh patagok hu kinh tế ye oh ngak hu hạ tầng, jalan mbak palei pala, oh ngak hu bruk an sinh XH. Taphia di nan, brei padang Đảng, padang hệ thống chính trị jum pataom, sa hatung hatian, kham merat “ngak bruk kayua bhap bini”. Yaok urang jakar, urang đảng jeng brei pataom tame kuhria ka bhap bini, duah darak pasar pablei pandap. Khin hu labik pablei tabiak siam, brei pambuak bruk, sản xuất praong, piah ngak hu bruk ini, karja palei brei tame bruk. Brei ngak yau habar piah ka bhap bini mboh hu kein lagaih tuk nao tui đảng, mek hu hatai jia di bhap bini.

5 # Tui Ban Khik iek dom khu chế xuất saong công nghiệp bal Cần Thơ, tal harei 18/2, taong abih dom doanh nghiệp jeng yau urang ngak di dom khu công nghiệp, khu chế xuất dalam bal hu mai ngak bruk veik yau dahlau. Tui ong Nguyễn Hữu Nghĩa, phaok jabat khik iek doanh nghiệp saong urang ngak dalam Ban Khik iek dom khu chế xuất saong công nghiệp bal Cần Thơ, makna ngak ka ralo urang ngak mai veik doanh nghiệp ngak bruk avar kayua tuk tết nguyên đán thun ini, ralo doanh nghiệp thưởng tết biak glaong, kuhria rah tapa yaok urang ngak hu thưởng sa bilan lương. Dalam nan, jien thưởng glaong abih ka sa urang ngak nan lac 101 triệu đồng, biar abih lac 500.000 ribau đồng.

6/ Anak bruk ralo radaih njauk patau glum tuk peih angaok jalan cao tốc ban raya HCM – Long Thành – Dầu Giây, cty cổ phần dịch vụ kỹ thuật jalan cao tốc VN (Vece) đơn vị khik iek khai thác jalan cao tốc ini, hu ralo jalan pacang cakak. Tui cty cổ phần dịch vụ kỹ thuật jalan cao tốc VN, meng tuk ba tame khai thác di bilan 1/2014 tal ini, đơn vị hu 8 radaih njauk patau glum tuk daok peih angaok jalan di 6 labik lac Km 28 + 600, cầu vượt Tỉnh lộ 25A, cầu vượt Km 34, cầu vượt Km 41, cầu vượt Km 49 + 50 saong tatua Long Thành. Hadei di tuk thau hu bruk nan, đơn vị hu khan ka công an puk palei piah nao tapak labik nan, mek panuac di urang peih radaih. Tapa duah thau tuk camereip, dom mbang glum patau ini kayua bộc phát, oh lac bruk merak gauk. Dom radaih njauk khut hu daong cứu hộ saoh.

7 # Tổng cục Lâm nghiệp, Mentri ngak nong saong patagok palei pala bahrau hu harak payua tal dom kapul nyaom, manuac urang hu bruk ngak mbang pablei salih haong taneh ia Lào ka bruk padeih brei harak  adat Công ước ka bruk pablei salih dunya ka dom janih anek athur, phun glai nguy cấp (CITES). Tui nan, jabat khik iek CITES Việt Nam padeih brei harak adat CITES pablei tabiak, blei tame pandap panda dom janih dalam CITES brei ka bruk pablei salih mai meng negar Lào kuhria meng harei 11/2/2016 tal tuk hu thông báo patui veik. Dom kapul nyaom, manuac urang khik thau cambaih jang, meda liên hệ qua số điện thoại 04.37335676 piah hu langyah.

Patui di ini dom khau tin dunya:

8/ Akaok mintri di cư Hi Lạp Yanit Mudalat brei thau bruk kreik pabah mbang negar saong dom taneh ia Bancăng meda ba tal sa bruk khủng hoảng nhân  đạo praong di taneh ia ini saong oh pacang cakak hu menuac di cư. Dom taneh ia di liên minh châu Âu dahlau nan hu ba tabiak panuac pandar Hi Lạp dalam 3 bilan tal brei pasiam bruk pasang iek menuac di cư negar langiu, meyah oh pasiam hu, taneh ia ini njauk pasang mbaok saong dom jalan pasang iek taphia negar saong dom taneh ia daok veik dalam bhum miễn thị thực Schengen.

9 # Jabat báo chí dalam Mentri Tình trạng khẩn cấp Nga bahrau brei thau tapol radaih daong ngak pahla di Mentri ini bahrau nao tal bhum taneh gah miền Đông Ucraina dalam dom harei tal. Ini lac mbang pandap daong ngak pahla mbang 49 di Nga saong lac mbang pandap daong ngak pahla akaok mereip di Nga ka bhap bani gah miền Đông Ucraina dalam thun 2016. Mbang pandap daong  ngak pah hala mbang ini hu dom janih pandap yau dụng cụ bac megru ka anek saih saong thiết bị pacang caga khuah. Kuhria meng kreh bilan 8/2014, Mentri Tình trạng khẩn cấp Nga hu payua taong abih labaih 58 tấn pandap daong  ngak pah hala ka bhap bani gah miền Đông Ucraina.

10/ Bra-xin barau ba yaok rituh ribau urang lin nao daong nhân viên y tế ngak pahacih môi trường saong pathau khan ka bhap bini ka bruk pacang cakak virut Zika. Labaih 200 ribau urang lin nao tal yaok baoh sang di 3 triệu baoh sang di 350 ban piah pasang iek saong yah klaak dom labik jamuok mbuan caih nek./.