1#/ Akaok mintri ngak nong song patagok palei pala Cao Đức Phát bahrau nao pasang iek bruk pacang caga pandiak bhang di tỉnh Bình Thuận. Urak ni pandiak bhang dok rah tabiak khang di tỉnh Bình Thuận. Ia di taong abih dom danao thủy lợi dalam tỉnh dok labaih 111 triệu mét khối, samu 51% dung tích thiết kế. Labaih 40.000 boh sang dalam tỉnh dok kurang ia pandar yaok harei, Ong Cao Đức Phát njauk hatai song dom panuac caong di tỉnh Bình Thuận yau pok tagok Thủ tướng rajaei dong ka tinh labaih 106 tỷ đồng piah pacang pandiak bhang, dong asar pajai, pasiam veik bruk pala drak, pabak ia pandar ka bhap bini, kuac raok kraong ribaong, pasiam veik dom công trình thủy lợi dalam bilan đông xuân.

2/ UB bhap bini ban HN daok padang jalan parabha phun jien piah patao bruk ngak ka urang ngak palei pala meng thun 2016 tal thun 2020. Anak meta dalam thun 2016, ban HN hu buh tabiak 70 tỷ đồng daong urang bac bruk ngak, daong dahlau ka bruk pato bruk ngak, ba bruk ngak ka urang joh jo. Tui nan, ban HN hu peih pato bruk ngak ka jaik 30.500 urang ngak palei pala; dalam nan pato bruk ngak nông ka labaih 15.500 urang saong bruk ngak lingiu ngak nông labaih 14.400 urang. Tui kuhria hu labaih 80% urang hu pato bruk ngak hu bruk ngak.

3#/ Di labik inem krung sajarak dak rai ilamu Đền Trần, Ub bhap bini ban Nam định bahrau peih Lễ Khai ấn akaok thun anek saka. Lễ Khai ấn akaok thun hu makna lac likau ka taneh ia srom mbon, bhap bini siam mekre, haniem phol, pachreih urang yam tame thun bahrau khang kajap pren yava,    kham merat ngak mbang, bac megru, ngak bruk siam. Ni jeng lac tuk piah ka bhap bini brei mboh hatai iek prong iek glong ong muk ong kei, hadar tal dhar phor praong glaong di saman patao Trần hu dak padang saong khik caga taneh ia Đại Việt

4/ Ia di 20 danao dalam tỉnh NT daok labaih 64/192 triệu m3, samu 33% dung tích thiết kế. Langiu di nan, ia dalam danao Đơn Dương urak ini hu labaih 137/165 triệu m3. Meng akaok thun tal ini, ia di bhum Nam Trung Bộ kurang  meng 30 tal 50%; di bhum Trung bộ kurang meng 20 tal 60%, hu labik kurang tal labaih 80% (Khánh Hòa) duk saong ralo thun. Urak ini ia di Sông Ba saong dom craoh dalam huyện Krông Pa (Gia Lai) jeng biar jang duk saong rilo thun meng 30 tal 50%.   

5#/ Bilan đông xuân thun ni, di tỉnh Hưng Yên kham merat tam drak labaih 37 ribau ha padai song ngak salah bloh dahlau di harei 5/3. Urak ni urang nong di dom puk palei dalam tỉnh tam drak hu jiak 3 ribau ha, ngak taneh mbang ka 2 hu labaih 25 ribau ha, tam drak hu 5 ribau ha, dalam nan taneh drak tapak hu labaih 3 ribau ha, taneh dok veik lac tam meng mạ sân, mạ nền cứng. Tỉnh Nam Định kham merat tam, drak 75.500 ha padai, năng suất tui kuria mek hu labaih 69 tạ/ha. Gah ngak nong hu panuac kakei dom xã tapen tasik njauk pataom tame ngak padai lai tamuh hu dalam ia mbak song chất lượng cao. Di odm huyện gah barak tỉnh, padai lai hu labaih 20% taneh, padai thuần hu 80% taneh.

6/ Pahadar 85 thun harei padang kapul dam dara Cộng sản Hồ Chí Minh, 57 thun harei  bộ đội biên phòng, di đồn biên phòng 316, xã Cát Khánh, huyện Phù Cát, kapul liên hiệp dam dara VN tỉnh Bình Định peih danak dak “bilan klau biên giới”. Tapa nan, mban peih ngak danak dak “bilan 3 biên giới” hu alin hadiah 6 bộ mac vi tính ka dom đồn biên phòng dalam tỉnh, alin 78 paok pandap ka dam dara nao ngak lin mbang 1 thun 2016 di huyện Phù Cát, iek ruak, brei jru ka 100 bhap bini saong pala phun kayau di puk palei.

7#/ Yaom sara di tỉnh Bến Tre dok beir ngak ka rilo sang urang nong gaok kan kandah. Urak ni, sara yaom 18 ribau đồng / sa giạ ( yaok giạ 45 kg),  meyah kaoh abih dom chi phí, yaom sara kuhria tabiak dok 200 đồng sa kg. Thun 2015, B.Tre hu labaih 1.600 ha sara song tổng sản lượng labaih 100 ribau tấn song dok labaih veik jiak 60 ribau tấn. Urang ngak sara njauk pablei eng, min tal vụ ni dok labaih 17 ribau tấn sara.

Patui di ini dom khau tin dunya:

8/ Jabat chức năng Prang barau brei thau, labik cắm trại di urang nhập cư dalam labik glai jaik ban sit Calê hu yah klak dalam adit ini. Dalam sa thun bloh, yaok ribau urang nduac klak kan kathaot eik lipa saong mesruh metak di Trung Đông saong Bắc Phi tal châu Âu saong padang trại tạm di labik glai langiu ban sit Cale ini ngan saong hatai caong khin sa harei halei nan duah hu jalan meng Prang tame Anh.

9/ Rajaei Ô-xtrây-li-a bahrau hu panuac lac kol khủng bố dok kuhria taong tame ban ine Kua-la Lam-pơ (Kuala Lumpur) di Malaixia. Tui panuac kakei gah du lịch hu rajaei Ô-xtrây-li-a khan di angaok website, dom mbang taong pamong tame ban ine Kua-la Lam-pơ di Malaixia lac dom mbang taong tame kein liba di gah phương Tây atau dom labik hu rilo urang negar langiu bhian mai tal. Rajaei Ô-xtrây-li-ahu panuac ieu urang  Ô-xtrây-li-a jhui nao du lịch tal dom labik gah tamur Xa-ba (Sabah), sa labik main pachreih hu rilo urang negar langiu di Malaixia./.