1# Tuk hu karja palei jak ba peih praong bruk pala phun rabung mai, saai Hoàng Thị Thường, bangsa Tày daok di Bản Khéo, xã Lâm Thượng, huyện Lục Yên, tỉnh Yên Bái bui hatai pachreih tui. Jien buh tame akaok mereip oh glaong, mbuan pasang iak, yau nan ye sang saai hu pala jaik 1.000 goc rabung. Tapa 8 thun gam pala gam pablei pajaih tabiak darak pasal saong pataom rabung di mikva dalam bản piah pablei, yaok thun sang saai hu jien mek tame labaih 200 triệu đồng. Saai Hoàng Thị Thường ndom lac :

“Pala phun rabung biak lagaih saong bruk di sang. Tuk pala di taneh samu njauk buh halok khak NPK atau khak athur, yaok goc atah gauk 5 mét, meyah taneh siam njauk pala atah di gauk jang. Tuk kaoh, yaok goc njauk caik veik 2 tal 3 akaok labung piah tamuh jeng phun ka thun hadei tamuh rabung veik.

2/ Tỉnh Ninh Thuận hu 20 danao caik ia, urak ini 20 danao ini daok hu 53 triệu mét khối ia min, samu 28% dung tích thiết kế. Dom danao yau Ông Kinh, Tà Ranh thu ia meng bilan 1; dom danao daok thu ia yau Tân Giang, Bầu Zôn, Thành Sơn, Sông Trâu… Pandiak bhang ngak ka 22.000 ha taneh ngak nông di tỉnh trun năng suất atau khat lahik abih, dalam nan hu 67 ha padai daok dalam tukvak sraoh, yaok ribau ha medar, ginui di xã Phước Thái, huyện Ninh Phước, dom danao thu abih, oh daok ia piah pruh ka phun pala, oh daok ia piah pandar yaok harei di bhap bini.

3# Dom harei tapa, dom urang pablei salih ba gauk tame blei baok ươi di bhapbini daok di xã tapeng negar Mô Rai, huyện Sa Thầy, tỉnh Kon Tum. Kayua yaom  ươi tagok tal 120.000 đ/saong kg saong ươi that hu yaom meng 20.000 - 30.000 đ/sa kg yau nan ye bhapbini oh lac duan mek ươi  bo daok tak phun piah mek baok ươi that. Ngak yau nan, oh suai livik phun ươi oh daok piah ka mikva Mô Rai paik baoh pablei duah jien,  taphia nan mbuan ba tal khuah glai tuk tame bilan thu.

4/ Thành đoàn Cần Thơ barau peih mbang pataom mbaok urang jakar đoàn tapa dom samar saong pok meyaom dom kreih camin urang jakar đoàn hadah krah. Di mbang taom mbaok, urang dang akaok ban Cần Thơ taong yaom glaong dom rik daong di dama dara ban Cần Thơ dalam luac tukvak mesruh metak, khik caga saong dak padang taneh ia. Tapa nan, Thành đoàn Cần Thơ hu pok meyaom 67 urang jakar đoàn hadah krah dalam bruk ngak đoàn saong bruk thanh thiếu nhi di dom puk aplei, đơn vị.

5# Tỉnh Tiền Giang hu jaik 120.000 urang lac sang kathaot saong sang sarak mesraiy jien di gilang pariak sarak karja abih tih jaik 1.800 tỷ đồng. Kayua ngak siam bruk khik ramik phun jien, pambuak bruk saong dom pakat kapul taduan pasang iek, pachreih ba urang mesraiy pandar njauk bruk, yau nan ye phun jien mesraiy ưu đãi hu patagok kein laba. Thun 2015, dom dankadak brei mesraiy hu daong ka 5.312 sang patrun kathaot, labaih 10 rabau sang hu công trình ia hacih, yaok rabau urang ngak hu bruk ngak veik.

6/ Di jalan 7, ban sit Chơn Thành, huyện Chơn Thành, tỉnh Bình Phước hu rah tabiak nyaom drak pandap mbang, hu 75 gian hàng, pachreih hu labaih 1000 urang hu mbaok tame. Dom gian hàng di nyaom drak ralo meng lac parang iek dom pandap mbang krein randap yau: bu menuk, sinh tế…  yaom 10 ribau đồng sa suất. Nyaom drak nan lac bruk ngak hu kein lagaih, rik daong ngak jeng labik me-in ka urang đoàn.

7#  Harei 24/3, di ban raya Hồ Chí Minh, sang iek ruak brei darah saong huyết học ban raya Hồ Chí Minh hu mboh tangin tame biên bản ghi nhớ pambuak bruk saong công ty Baxalta hu jabat ngak bruk di  Singapore ka bruk paglaong iek ruak Hemophilia di gah meraong Việt Nam tukvak 2016 – 2020.  Bác sĩ Phù Chí Dũng, akaok sang iek ruak brei darah saong Huyết học ban raya Hồ Chí Minh brei thau, tapa pambuak bruk ini, urang ruak rối loạn đông darah Hemophilia hu daong rilo jang gah y tế.

Patui di ini dom khau tin dunya:

8/ Akaok mintri QP Mỹ A-stơn Cát-tơ ndom lac, châu Âu brei patagok dom kham merat pacang cakak  kol khủng bố IS. Tui ong Cát-tơ, bruk tấn công di Brúc-xen brei mboh châu Âu, gam saong Mỹ brei patagok dom bruk pacang IS di Xyri, Irac saong labik halei karei.

9# Di jabat Đại sứ quán Việt Nam di ban Ine Praha, Kỹ sư Nguyễn Quyết Tiến saong Giáo sư-Tiến sĩ ngôn ngữ Ivô Vaxiliép (Ivo Vasiliev), dua urang gam ngak tabiak bộ inelang giáo khoa Séc-Việt, hu var ngak bruk saong Đại sứ quán saong kapul urang Việt Nam daok di Cộng hòa Séc piah jhul pakhang bruk yaih khan praong bruk roh duah ini jeng ye sajarah, ilimo di Việt Nam saong Séc tal bhapbini dua taneh ia.

10/ Mintri ngoại giao Nga brei thau, taneh ia ini pachreih tui bruk ginum biai thoại barau di Mỹ saong Cuba saong ndom lac,, Mỹ njauk yaih klak taong abih dom lệnh trừng phạt Cuba. Panuac nan hu ba tabiak hadei di tuk tổng thống Mỹ Baracobama barau tamat mbang nao rivang Cuba./.