1/ Mintri Y tế bahrau peih nyaom biai tapak peih bruk pacang caga jit ruak, hacih saat pandap mbang tết anek sak pabe di 651 labik dalam taneh ia. Brei panuac di nyaom biai, akaok mintri y tế Nguyễn Thị Kim Tiến brei thau. Urak ni, jit ruak sởi di negar drei mbuan tamuh khang kayua bruk klauk jru oh ka hu yau bruk ba tabiak. Taphia di nan, jit cúm A(H7N9) dok rah tabiak di TQ gam song bruk pablei salih lậu menuk ada dahlau di tuk tết tagok glong mbuan ngak ka jit cúm mbuan si njom bak tame VN.

2/ Salam uan Tết anek sak pabe thun ini, HN hu cuh phao bingu di 31 labik, dalam nan hu 5 labik cuh tầm glaong di Hồ Hoàn Kiếm, mblang bein Thống NHất, bein bingu Lạc Long Quân, Hồ Văn Quán - Hà Đông saong sân vận động pakat negar Mỹ Đình. Tukvak cuh phao bingu dalam 15 minit, meng 12 tuk tal 12 tuk 15 minit melam 19/2/2015.

3/ Kapul urang njauk jru klik kruac ban sit Đà Nẵng hu jao 200 pok pandap tết brei ka urang njauk jru klik kruac dok di xã Hòa Nhơn, huyện Hòa Vang, yaok pok pandap yaom 300 ribau đồng. Amuk Nguyễn Thị Hiền, akaok Kapul urang  njauk jru klik kruac ban sit  Đà Nẵng brei thau: meng ni tal luac tết khol hulin hu jak ba ka labaih 5 bibau urang njauk jru klik kruac. Cong khin dom urang ngak pahla dalam song langiu negar ba tangin tame dong ka urang njauk jru klik kruac hu mbang tết trei sil jang song pachreih hatai ka urang rilo jang.

4/ Nyaom darak khuyến mãi thun barau Quảng Nam 2015 hu peih tabiak di ban sit Tam Kỳ, hu mbaok 162 doanh nghiệp saong 310 gian hàng gam saong ralo janih pandap yau: pandap mbang menyum, thủ công mỹ nghệ; kim khí điện máy, hóa mỹ phẩm, bingu phun cảnh. Ini lac sa bruk xúc tiến pablei salih di tỉnh Quảng Nam pachreih tui bruk jak ba “urang VN dahlau di abih njauk pandar pandap VN”.

5/ Urang tong ikan Khánh Hòa dok hu pabak pren jang piah tabiak tasik tuk phun jien ka yaok mbang nao tasik atah harei hu patrun biak rilo kayua yaom menyek diesel patrun dalam tukvak tapa. Taphia di nan, mbang tabiak tasik camereip dalam thun 2015 ni chap hu biak rilo kaya ikan ngak pachreih urang tong ikan tabiak tasik. Tui dom urang tong ikan, mbang nao tasik akaok thun ni tong chap hu ikan ngừ đại dương yau nan lac njauk bilan.

6/ Bilan bingu Tết thun ini, ong Trương Chí Hạnh, sa dalam dom urang pala bingu Tết praong di palei bingu Liên Trì, ban sit Tuy Hòa tỉnh Phú Yên pala 400 chậu quất. Tal tukvak ini, bein quất di sang ong Hạnh hu ralo urang pablei salih saong dom đơn vị praong đặt blei taong abih ngan saong yaom meng 400 tal 500 ribau đồng sa chậu. 

7/ Dok dalam danak dak jao pandap tết ka boh sang kan kathaot di Long An, bahrau di ni, kapul urang jakar Mban tacei jalan Tây Nam bộ hu jao pandap ka dom boh sang kan kathaot dok di 3 huyện Thạnh Hóa, Tân Trụ song Thủ Thừa. 30 pok pandap hu jao ka 30 boh sang kan kathaot dok dalam huyện hu yaom abih tih 30 triệu đồng. Jeng dalam mbang ni, mban tacei jalan Tây Nam bộ hu alin hadiah 1300 pok pandap yaom  1 tỷ 300 triệu đồng brei ka dom boh sang kan kathaot hu rai duik kan kandah dok di bhum taneran krong CL.  

Patui di ini dom khau tin dunya:

8/ Truyền thông Trung Quốc ba panuac di gah Y tế dunya brei thau, urang ruak ung thư daok tagok samar saong ngak khat lahik ka nền kinh tế taneh ia ini kuhria labaih 21 tỷ đô la Mỹ yaok thun. TQ hu jaik 3 triệu urang njauk ruak ung thư yaok thun, dalam dom urang nan hu tal 2,2 triệu urang metai.

9/ Rilo urang Palextin di Gada lihik sang danaok dalam mbang mesruh gauk jiak di ni song Ixraen daok dang anak dom kan kandah tuk bão tuyết daok hu bak labik ni. Menuac urang di Gada njauk pandar dhing truac hadah tuk sang mac điện di Gada dok kurang menyek biak khang, tok pabak điện 6 tuk yaok harei. Urak ni yaok ribau urang di labik ini oh hu điện sưởi ấm.

10/ Gah Y tế dunya WHO brei thau, dom urang njom Ebola barau di 3 taneh ia Tây Phi patagok mbang akaok meti dalam thun ini, tamat dom adit mboh hu siam lagaih dalam bruk mesruh pacang Ebola. Tui WHO, bruk dar menuac metai oh siam rah tabiak akaok bilan 1 di dom tỉnh gah timur Ghi-nê ngak tamuh jit barau di labik ini ngan saong 11 urang njom ruak barau./.