1# Mesup harei 17/2, Ủy ban Thường vụ Quốc hội peih mbang nyaom ka 45. Mbang nyom ini tui kuhria  hu rah tabiak meng ini tal abih harei 24 bilan 2. Dalam mbang nyom ini, Ủy ban brei panuac ka bruk caong rami ramik veik danak dak padang ngak hukum, pháp lệnh thun 2016; dom dự án hukum nan lac: Hukum Báo chí (pasiam veik); dự án Hukum khik caga, iek glang saong pato pakai uraniah (pasiam veik); dự án Hukum jru tavao (pasiam veik) jeng hu Ủy ban Thường vụ Quốc hội pasang iek, brei panuac. Ủy ban Thường vụ Quốc hội jeng daok brei panuac ka bruk kuhria caga mbang nyom ka 11, Quốc hội mbang 13.

2# Urak ini, di mblang tasik tỉnh Ninh Thuận mboh hu mực ống biak rilo, yau nan ye meng pagaiy harei 6 bingun tết tal ini, dom urang ngak ikan daok kham merat tabiak tasik. Ninh Thuận urak ini hu jaik 2.500 kapal, gilai daok ngak bruk ngan saong labaih 15 rabau urang daok taong cap di tasik. Saai Lê Thành Huynh, urang ngak ikan phường Đông Hải, ban sit Phan Rang –Tháp Chàm, tỉnh Ninh Thuận brei thau :“Dom harei tapa, kaya ikan mikva taong cap hu biak glaong. Dalam mbang nao tasik akaok Xuân mikva caong khin biak rilo kadha, kayua dalam thun tapa san luong nyu oh glaong yau nan ye mikva caong khin Xuân ini meda hu sản lượng glaong piah patagok jien mek tame” 

3# Di tỉnh Bến Tre, độ mbak 1‰ nyu njom tame dalam baoh taneh meng 60 – 75 km, nyu njom tal 152/164 xã, phường, ban sit.  Bruk ini nyu ngak ka jaik 7.000ha padai đông xuân muộn di dom huyện Ba Tri, Thạnh Phú saong Bình Đại gaok kan kandah praong saong yaok ribau ha phun mbang baoh dalam tỉnh mbuan jruh baoh. Lingiu di nan, ia mbak njom tame daok ngak kurang ia pandar ka labaih 2.000 sang bhap bini daok di dom xã tapen tasik tỉnh Bến Tre. Sa-ai Trần Thanh Sang daok di xã Tân Xuân, huyện Ba Tri brei thau: “Ia bingun di labik ini pandar oh hu, piah papah khan ao, rao tangin rao takai, daok mbang menyum ye pandar ia gaiy. Bhum ini ia kraong njom mbak trak oh pandar hu. Pandar ia gaiy, sa bilan abih labaih 200 ribau jien ia”.

4# Daok di tỉnh Trà Vinh, urak ini ia mbak daok mbang tame saong yam tapa tanut mbak di dom janih phun pala. Eng phun padai, tal tukvak ini hu 285 ha lihik abih saong 330 ha khat lihik meng 30-70%, abih di nyu nan lac hu labaih 11.000 ha padai đông xuân di huyện Trà Cú barau hu 35-45 harei nan ye bruk kurang ia di puac vụ lac bruk kan si plaih hu.  Ông Lê Phước Dũng, Phó Chi cục thủy lợi tỉnh Trà Vinh brei thau : Puac bilan 12 akaok bilan 1 mbak  nyu mblo tabiak saong tago biak samal, ngak ka  bhapbini di labik taphia mbak yamen kan si pandar hu ia kraong. Jalan  ngak urak ini lac tỉnh buh brei dahlau  jien bơm chuyền meng ribaong pakat 2 tagok  ribaong pakat 3 piah daong ia ka bhapbini. Min, meyah bruk ini dui atah meda oh ginup ia ba tame.”.

5# “Bilan xuân-baoh sang-tasik pulao” lac angan ieu di danak dak taom gaok ndom biai nao mai kayau Mintri Ilamu, Thể thao saong Du lịch peih ngak tui kuhria hu  peih tabiak di melam 19/3 di Hà Nội. Danak dak piah salam uan jak jeng di nyom roya pakat negar mbang ka 12 di Đảng saong harei dunya haniem phul 20/3/2016; saong piah daong pathau khan paglaong akaok sahneng di meuac sia ka makna di harei dunya haniem phul, meng nan ba tabiak dom jalan ngak cambaih laih piah dak padang baoh sang haniem phul, bhap bini haniem phul di urang Việt Nam.

6# Bhapbini bangsa Mông xã Sa Pả, huyện Sa Pa, tỉnh Lào Cai barau peih ngak rija Gầu tào mengkan piah kakuh thau dhar phuan lingik tasik taneh riya, po yang daong ka menuac urang, ka dom sang hu khang kadang, bhapbini trei sir, pala drak njauk, athur raong menuk ada bak var raong…rija jeng lac tuk piah mikva jum pataom, bui mein kuhria caga yam tame bilan pala drak barau.

7# Lễ hội Lăng Ông Tiền quân Thống chế Điều Bát Nguyễn Văn Tồn bahrau rah tabiak di xã Thiện Mỹ, huyện Trà Ôn, tỉnh Vĩnh Long. Ini lac bruk hu tỉnh Vĩnh Long peih ngak piah salam uan thun du lịch negar 2016 “Phú Quốc-taneran kraong Cửu Long”. Dom bruk ngak dalam lễ hội hu: pahadar 196 thun harei lihik Tiền quân Thống chế Điều Bát Nguyễn Văn Tồn; pakacah ngak mbang huak, ngak har meng kan ngan saong kadha “Pandap bingi harei tết”,  me-in dom kadha me-0in meng kan.

Khaw tin dunya

8#  Urang vak di rayo sap ndom VN daok di Lào brei thau: melam 17/2, di ban Viêng chăn (Vientiane)-Lào, Ban chấp hành kalup kapul đồng hương Xiêng khoảng di ban ine Viêng chăn gam saong rilo mikva hội viên hu peih harei taom gaok akaok thun barau -Xuân Bính thân 2016. Kalup kapul đồng hương Xiêng khoảng di ban ineViêng chăn padangtagok hu labaih 10 thun. Ini lac labik taom gaok gam gam di mikva, saong lac labik khik ramik ilimo di bangsa tapa dom mbang pataom ilimo daoh tamia pamaong tal halau gha.

9# Harei 16/2, Mintri Y tế, Dịch vụ xã hội saong Bình đẳng Tây Ban Nha khan lac taneh ia ini tal urak ini hu 23 urang njom virút Zika, hu maong lac jalan ba tal ruak akaok sit di anek kamar. Tui dom urang jakar ngak praong gah y tế Tây Ban Nha, taong abih dom urang njom virút Zika ini jeng njom meng dom taneh ia daok tamuh jit. Mintri Y tế, Dịch vụ xã hội saong Bình đẳng Tây Ban Nha jeng hu tabiak jalan iek ruak ka dom urang kumei metian njauk njom virút Zika.

10# Jeng dalam harei 16/2, urang tabiak panuac di rajaei Thái Lan, ông San-sen Kẹo-cam-nếch (Sansern Kaewkamnerd) brei thau, hãng kapal ahaok yaom lap  Nóc E di taneh ia ini meda gaok mek harak adat ngak bruk meyah daok hu bruk caik ka tuai daok gar di mblang par Đôn-muồng (Don Mueang) di Băng cốc kayua klak mbang par. Urak ini, hãng Nóc E hu 130 phi công, hadei di bruk nan, tần suất par di hãng trun 15% saong hãng ini daok caong hu 30 phi công barau dalam dua bilan tal./.