1/ Lac labik hu rilo glai, dom thun jiak di ni, bruk rong hani mek ia darko di xã Sam Mứn, huyện Điện Biên, tỉnh Điện Biên dak harei dak patagok. Rilo sang hadei di tuk  buh jien tame ngak bruk ni, mek hu kein liba glong, dong patruh iek patrun kathaot di puk palei.

2/ Piah daong ka bhap bini bhum biak kan kandah hu jalan patagok kinh tế, paglaong rai diuk, tỉnh Tuyên Quang brei buh tabiak labaih 122 tỷ đồng piah padang ngak cơ sở hạ tầng, daong patagok sản xuất saong khik ramik, pasiam dom công trình ka bhap bini. Piah patagok hu kein laba phun jien đầu tư, tỉnh Tuyên Quang pandar dom công trình, dự án hu parabha brei phun jien brei ngak salah bloh dalam thun 2015.

3/ Tỉnh Đắc Lắc hu labaih 3.800 héc ta taneh pala njam patam dom janih, min urak ni bahrau hu labaih 20 ha njam patam hu chứng nhận njam hacih saat. Thun 2010, Hội đồng bhap bini tỉnh Đắc Lắc hu patabiak sarak dong patagok bruk pala njam, ngak njam saong pablei njam hacih saat, tui jalan ngak lac tal thun 2015 hu labaih 480 ha njam hacih, min urak ni  bahrau ngak hu labaih 4,4% bruk ba tabiak.

4/ Meng bilan 2/2015 tal urak ini, di huyện Hàm Tân, tỉnh Bình Thuận daok rah tabiak bruk pandaik bhang, ia di dom kraong, craoh, danao, kavei daok thu lagu, ia biak kurang, ngak ka bhap bini rilo xã kurang ia ngak mbang, kurang ia pandar, ngak kan kandah tal rai diuk saong năng suất, sản lượng phun pala. Dom xã kurang ia pala dak saong ia pandar biak khang nan lac Thắng Hải, Tân Thắng, Sơn Mỹ, Sông Phan, Tân Phúc saong  Tân Đức.

5/ Rilo urang nong di xã Hiếu Liêm, huyện Vĩnh Cửu, tỉnh Đồng Nai dok tui bruk cakak hom tràm duah hu jien tani tanat meng 4 tal 5 triệu đồng sa bilan. Di labik ni, dom urang nong nao tal dom bein pabam tràm pajaih cao sản cakak dhar tràm meda tui tacei pato di po bein piah pabam jeng phun tràm pajaih. Yaok hom tràm urang cakak hu mbang 200 ribau đồng. Hu thau bruk ngak ini bahrau hu meng 2 thunini mai, hu ba jien tame tani tanat ka urang dok di labik ni.

6/ Pamaong tal bruk pahadar 40 thun harei peih paha gah meraong, yasa taneh ia (30/4/1975 – 30/4/2015), mesup harei 10/4, Ủy ban bhap bini tỉnh Bình Phước pambuak bruk saong Bộ Tư lệnh Quân khu 7 peih ginum meyai khoa học ngan saong kadha: “Căn cứ bộ chỉ huy quân peih paha gah meraong VN di Tà Thiết (1972 - 1975). Đoàn Sĩ – urang vak di rayo sap ndom VN daok di ban raya Hồ Chí Minh brei thau:

Dom tham luận di nyaom meyai hu taong yaom glaong bruk ngak, labik dang saong yaom glaong di căn cứ Bộ chỉ huy quân peih paha gah meraong VN dalam bruk mesruh metak pacang Mỹ daong atneh ia di Tà Thiết (Bình Phước) meng thun 1972 tal thun 1975. Yaom lac hu padang tabiak saong hu mbaok dalam tukvak panak min ini lac labik rah tabiak ralo bruk sajarah dak rai hu makna praong glaong, hu tính chất quyết định tal bruk mesruh metak peih paha bangsa, yasa taneh ia di bangsa drei. Nyaom meyai jeng hu pataom dom bài học quí meng bruk ngak di căn cứ Tà Thiết dalam bruk mesruh metak saong ba tabiak dom jalan ngak piah patagok yaom glaong di inem krung sajarah dak rai ini dalam rai diuk harei ini.   

7/ Di pasak Thể dục Thể thao tỉnh Vĩnh Long, Giải cih haning nyaom roya Thể dục thể thao bhum tanweran krong Cửu Long mbang ka 4 thun 2015 hu peih tabiak. Hu 50 vận động viên mai meng dom tỉnh ban di bhum taneran krong CL yau Đồng Tháp, An Giang, Sóc Trăng, Kiên Giang, Cần Thơ, Trà Vinh, Vĩnh Long, hu mbaok tame pakacah song 4 janih haning tui 28 nội dung cá nhân song kapul nyaom likei kamei

Patui di ini dom khau tin dunya:

8/ Rajaei Urugoay brei thau, taneh ia hu brei saoh laptop ka urang mbang jien bilan hưu di puac thun ini tui yau sanya di Tổng thống Ta-ba-rê Va–kê dalam bruk vận động tái tranh cử. Ini lac dự án peih praong di danak dak phúc lợi xã hội hu peih ngak meng thun 2007. Tui nan laptop brei saoh hu brei ka anek saih sang bac công dalam negar. Adit dahlau, rajaei Urugoay  hu peih bruk đấu thầu ka dom cty tame pabak komputer saong dom ứng dụng ka urang taha. 

9/ Liên hợp quốc ba tabiak hệ thống cơ sở dữ liệu akaok meti ka dom nyaom dong duah urang njauk bala, mong ini lac jalan ngak bahrau piah dong ka rilo urang dalam dom mbang bala meng langik tasik. Tui bruk khik ramik di Gah y tế dunya, hệ thống cơ sở dữ liệu ni  piah pabak ka dom rajaei bruk dong ba siam di abih meng dom kapul y tế, cứu hộ negar langiu dalam tuk gaok bruk khẩn cấp.

10/ Anak bruk hoành hành di dom kapul pablei salih ma túy, dom gah khik caga hukum Ecuador daok jhul pakhang dom bruk cap mek kol tội phạm nguy hiểm ini. Tui akaok mintri nội vụ Hô-xê Xê-ra-nô, cảnh sát taneh ia ini cap hu 2 tấn ma túy saong 200.000 USD dalam mbang taong tame sa tổ chức pablei ma túy “nguy hiểm saong hùng mạnh” di taneh ia ini./.