1/ Urak ni, tỉnh Quảng Ngãi dok 580 kapan gaiy song 4421 urang dok ngak bruk di dom bhum tasik. Mban tacei pato pacang caga ribuk ia sua tỉnh bhain pambuak bruk song dom po kapan ni piah pathau khan brei thau song tacei pato dom kapan gaiy tame labik pataok siam mekre .

2/ Harei 11/12, mbang nyaom ka 12 hội đồng bhap bini tỉnh Ninh Thuận mbang 9 hu hoãn veik piah pataom tame bruk pacang cakak ribuk ka 5. Tui bruk ba tabiak, mbang nyaom hu peih tabiak meng harei 11 tal harei 13/12. Jabat hội đồng bhap bini tỉnh Ninh Thuận brei thau, mbang nyaom hu peih ngak chip hadei di tuk ribuk ka 5 nao tapa.

3/ Piah plaih nyaik song patrun tal tanut beir di abih dom khat lihik kayua ribuk ka 5- ribuk Hagupit, mban tacei pato pacang caga ribuk tỉnh Sóc Trăng hu khan brei thau cambaih bruk rah tabiak di ribuk, saong hu panuac kakei dom puk palei dalam tỉnh ngak siam bruk paduan ba rah tabiak truh dom labik mbuan njauk bala nao tal labik siam mekre.

4/ Dom doanh nghiệp dalam tỉnh Thừa Thiên-Huế  hu buh tame labaih 14 tỷ đồng piah padang ngak, pasiam veik phố nao takai Nguyễn Đình Chiểu  brei ka tuai damuai saong dom bruk ngak ilamu lễ hội. Ong Trần Quang Hào, Giám đốc Công ty lữ hành Huetourits, lambaok gah đầu tư ramik ngak pasiam veik phố nao takai Huế brei thau:

“Mban khik iek kol dahlak padang dom jalan ini piah hu sa labik mai barau ka bhap bini puk palei jeng yau tuai du lịch, langiu di nan hu dom bruk ngak di tuk melam yau ialmu, pablei salih. Kol dahlak hu padang bruk pavlei salih pambuak saong dom pandap di puk palei, dom pandap thủ công meng kan, dom pandap mbang Huế.

5/ Chi cục khik caga phun pala tỉnh Lâm đồng brei thau, dom công ty dalam tỉnh dok blei tame labaih 18 triệu akaok pajaih bingu lyly piah pala pablei ka darak pasa tết nguyên đán jaik tal. Tui nan, dom akaok pajaih blei tame samu song taneh pala nan lac 72 ha, tagok 23 ha dut song vụ bingu tết thun 2014. Tui kuhria mboh dahlau, bingu LyLy bo LĐ pabak ka darak pasa tết  labaih 20 triệu dhar.

6/ Nyaom darak pasar kaya nông dunya VN thun 2014 hu peih tabiak kayua mintri công thương, mintri ngak nông saong patagok palei pala saong UB bhap bini ban sit Cần Thơ pambuak bruk peih ngak. Kadha di nyaom darak kaya nông mbang ini lac pambuak bruk, đầu tư patagok kaya nông, jhul pakhang bruk pablei tabiak negar langiu kaya nông bhum taneran kraong Cửu Long – VN”. Nyaom darak pachreih hu jaik 500 đơn vị, gian hàng di 200 đơn vị, doanh nghiệp dalam saong langiu taneh ia hu mbaok tame.

7/ Tui pasak pacang caga HIV/AIDS tỉnh Cà Mau, urang njom HIV dalam thun 2014 dalam tỉnh mboh hu rilo jang dut song thun dahlau. Bruk pacang caga HIV/AIDS di Cà Mau oh ka khang kajap, mbuan si tamuh tabiak khang. Urak ni di tỉnh Cà Mau, taong abih 9 huyện, ban sit song labaih 98% xã, phường hu urang njom HIV/AIDS. Urang njom HIV dalam tỉnh dak harei dak laik tame urang umo ranaih song hu rilo di urang kamei.

Patui di ini dom khau tin dunya:

8/ Taduan panuac daa di ong Bo-viêng-khăm Vông-đa-la, akaok mintri khoa học saong công nghệ Lào, kapul ngak bruk mintri khoa học saong công nghệ VN kayua akaok mintri Nguyễn Quân, ba akaok, nao rivang saong ngak bruk di Lào meng harei 9 tal harei 11/12.

9/ Gah khí tượng Nhật Bản brei thau, bruk langik tasik En Ni-nô hu rah tabiak meng bilan 6 tal bilan 8 thun ni. Mbang cemereip bruk yau ini nyu rah tabiak dalam 5 thun tapa song dok rah tabiak dalam bilan liar. En Ni-nô lac bruk nhiệt độ di angaok mbaok ia tasik di Thái Bình Dương pandiak tagok, meda ngak brei thu lagu di bhum ĐNÁ song Ôt-xtrây-lia, ba tal hajan khang di Nam Mỹ, kan kandah tal dom bruk ngak nong./.

10/ Ngan saong ralo uranaih, anek sau oh lac athur raong bo daok hu iek yau sa ayut trung thành piah me-in sambai saong ndom biai. Mboh hu kein lagaih di bruk ini, sa sang bac di Ôx-trây-li-a hu peih ngak iek sa danak dak barau, nan lac ba anek sau ini tame tal bac piah daong ka uranaih tự tin dalam bruk bac./.