1/ Di HN,  Thủ tướng Nguyễn Tấn Dũng bahrau hu var ngak bruk song Tập đoàn Viễn thông quân đội Viettel ka bruk sx, pablei salih jang yau jalan patagok di tập đoàn. Thủ tướng hu panuac ieu Viettel pataom tame patagok khang bruk ngak prong, kham merat jeng sa DN viễn thông dang akaok oh lac di taneh ia bo dok lac dalam khu vực.

2/ Akaok mintri Đinh La Thăng gam saong kapul ngak bruk di mintri jalan mbak pajeng ba barau nao pasang iek bruk ngak dự án pasiam, papraong jalan trun tagok kapal haoh di mbalng kapal hao Pleiku saong Dự án jalan Hồ Chí Minh tapa Tây Nguyên. Mbang sa di dự án hu ngak salah bloh di akaok bilan 3/2015. Mintri jalan mbak pajeng ba brei adat kreik pabah mbang kapal haok meng harei 15/3 piah patui peih ngak mbang 2. Tapa nan, dự án hu ngak salah bloh di puac bilan 8/2015, takik jang 4 bilan duk saong tukvak ba tabiak.

3/ Tỉnh Lai Châu kham merat dalam thun ni hu meng 15 tal 20 xã mek hu tanut chuẩn ka bruk padang ngak palaei pala bahrau. Meng bruk di dom puk palei nan lac, menuac urang dok prai rai, anak meta jalan ngak cemereip saong praong di abih piah ka tỉnh ngak hu bruk ba tabiak nan lac, pablak dom phun jien piah tani tanat labik dok ka bhap bini, meng nan peih ngak dom tanut ka bruk padang ngak palei pala bahrau.   

4/ Meng harei 25/3 tal harei 1/4, di tỉnh Bình Định rah tabiak ralo bruk ngak ilamu, daoh tamia, thể thao pahadar 40 thun harei peih paha tỉnh Bình Định (31/3/1975-31/3/2015) saong taduan Huân chương HCM. Ong Nguyễn Văn Dũng, Giám đốc Sở ilamu Thể thao saong Du lịch tỉnh Bình Định  brei thau: Meng makna praong glaong piah salam uan bruk jayah hadah hadai di bhap bini drei saong pathau khan dom jak jeng di bhap bini drei hadei di 40 thun peih paha, padang saong patagok Bình Định dak harei dak khang kajap. Gah ilamu TT saong DL peih dom bruk ngak piah ngak brei cambaih laih jang, hadah krah jang makna di 40 thun peih paha Bình Định.

5/ Di huyện Lắc tỉnh Đắc Lắc bahrau rah tabiak bruk “pakacah limen meng kan”, sa dalam dom bruk ngak di Harei pataom cà phê Buôn Ma Thuột mbang ka  V- 2015. Nyaom pakacah limen meng kan hu rah tabiak 2 thun sa mbang dalam bilan 3 tui sa ka ia harei. Tame pakacah, hu 14 drei limen di huyện Lắc song 2 mbang pakacah nduac di angaok thu song 2 mbang pakacah nduac di ala ia. Hadei di 4 mbang pakacah, limen hu angan Y Khăm Sen, số báo danh 11, dok di palei Lê, ban sit Liên Sơn mek hu ja yah .

6/ Dalam dom harei tapa, di ban sit Phước Long (tỉnh Bình Phước), quỹ toàn cầu pacang cakak ruak pandiak dom pambuak bruk saong pasak y tế ban sit Phước Long peih bruk brei saoh kamo saong yil ka dom baoh sang kan kathaot, baoh sang sarak karja, baoh sang bangsa takik dalam ban sit. Bruk ngak ini piah pacang cakak ruak pandiak dom tuk bilan hajan jaik tal. Ini jeng lac bruk ngak piah patrun dom urang njauk ruak pandiak dom kayua jamuok kaik ka dom baoh sang kan kandah, kurang phun jien, bhum urang bangsa takik.

7/ Urak ni, bruk njom mbak di tỉnh Sóc Trăng mboh patrun patakik. Tanut njom mbak di dom bilai dut jeng daok di tanut beir, nan ye dom ar pacang mbak hu peih tabiak piah mek ia taba tame piah ngak padai Xuân Hè. Di dom krong ribong di tỉnh Sóc Trăng jeng dok bak ia, mik va urang nong dok samar jhuk ia tame hamu piah pruh ka mblang padai Xuân hè dok thu lagu.

Patui di ini dom khau tin dunya:

8/ Di mbang ginum meyai pakat thứ trưởng ngoại giao di ban ine Seoul Hàn Quốc barau ini, TQ saong NB njauk gauk brei peih ginum meyai pakat ngoại trưởng 3 gah mbang ka 7 di puac bilan ini. Tui dom khau tin di NB saong HQ, bruk ginum meyai pakat ngoia5 trưởng tui kuhria hu rah tabiak dalam dua harei 21 saong 22/3 di ban ine Seoul.

9/ Cuba song Mỹ brei pambuak veik talei điện thoại tapak, njauk cakak klaoh meng thun 1999. Công ty viễn thông Cuba brei thau, tuk camereip, brei pambuak veik dom mbang ieu phone pakat dunya. Ni lac sa bruk ngak dalam thỏa thuận di công ty viễn thông Cuba song gah pabak dịch vụ IDT di Mỹ. Bruk pambuak veik jalan talei ndom biai tapak hu dong pasiam bruk taom gaok ndom biai nao mai di bhap bini 2 taneh ia.

          10/ Thổ Nhĩ Kì barau kreik pabah mbang negar jaik negar Xyri, yau sa jalan ngak an ninh pacang caga tuk bruk taong paoh gauk daok rah tabiak di taneh ia jaik taphia ini. Dom pabah mbang di tỉnh Hatay di TNK oh brei radaih saong menuac nao tame TNK meng Xyri. Dom urang Xyri hu hộ chiếu hu adat nao tapa pabah mbang piah mai palei./.