# Meng harei 20/1 tal harei 31/3, Thanh tra mintri ilamu Thể thao song Du lịch hu peih bruk pasang iek di dom tỉnh, ban hu rilo rija roya prong yau Hà Nội, Quảng Ninh, Hải Dương, Phú Thọ, Bắc Ninh, Lạng Sơn, Hà Nam, Ninh Bình, Nam Định, Thái Bình, Lào Cai, Yên Bái. Bruk pasang iek ni piah pasiam, pacang cakak song langyah chip dom bruk ngak suan dalam  peih ngak rija roya, bruk ngak mbang gah dịch vụ ilamu bhap bini.

# Dalam tuk Tết anek sak pabe 2015, ngan saong jaik 5.500 ha njam patam dom janih, dom puk palei dalam tỉnh Lào Cai meda pabak jaik 82.000 tấn njam hajao pablei ka bhap bini. Tui taong yaom di jabat chuyên môn, ngan saong taneh njam daok paik, yaok bilan pabak ka darak pasar labaih 20.000 tấn, ginup ka urang blei mbang dalam tuk tết nguyên đán.

# Tỉnh Quảng Ngãi bahrau dong ka 4 DN hu mbaok tame danak dak tani tanat yaom kaom dalam tuk tết Nguyên đán anek sak pabe 2015. Tỉnh Quảng Ngãi hu panuac ieu dom DN hu mbaok tame danak dak tani tanat yaom kaom brei hu yaom pablei beir jang yaom darak pasa meng 5 tal 10%.

# Urak ini, pabah tasik Đà Diễn di ban sit Tuy Hòa, tỉnh Phú Yên daok njauk haluk pabak tame veik, ngak kan kandah ka kapal tuk tame tabiak pataok, ralo kapal njauk gar angaok haluk. Sa adit ini mai, yaok rituh kapal vah ikan ngừ đại dương di urang taong cap ikan ban sit Tuy Hòa oh tabiak tasik hu kayua haluk pabak tame di pabah tasik Đà Diễn ngak ka ia biak kaoh. Pabah tasik labik kapal tame tabiak hu labik praong oh ka tal 20m, ia kaoh nan ye kapal bhian gar angaok haluk, urang taong cap ikan oh ka tabiak tasik taong cap ikan vụ bahrau thun 2015.

# Dalam tỉnh Đồng Nai urak ni hu labaih 14.000 ha pala njam patam boh karaoh dom janih, mboh rilo di 3 bhum pala njam patam prong nan lac Xuân Lộc, Tân Phú, Thống Nhất. Yaok harei, urang nong dalam tỉnh pabak ka darak pasa jiak 1000 tấn njam patam. Dalam nan, dom bhum pala njam patam boh karaoh hu dom huyện pachreih ba urang nong ngak tui jalan hacih saat. Teang bilan đông xuân 2015, taneh pala njam di tỉnh hu 1.429 ha song tal tukvak ni, urang nong dalam tỉnh dokjar var iek glang mblang bein piah samar pabak ka darak pasa tết.

# Dalam thun bloh, bhap bini ban sit cần Thơ hu rik daong labaih 11.000 harei ngak bruk piah tuh bê tông labaih 120.000 m jalan palei ngan saong yaom jien jaik 30 tỷ đồng, padang ngak jaik 100 mbiak tatua.

# Mintri Thông tin song Truyền thông brei pabak tame laik 1 ka akaok laik phone 090 song  093 ka công ty thông tin di động Việt Nam MobiFone. Yau nan, MobiFone hu bahrau 2 triệu laik phone pan tangin 10 laik piah pabak ka darak pasa dalam taneh ia. Dom chuyên gia ndom lac, bruk pabak laik tame yau nan, samu hong 2 triệu laik phone, hu palagaih ka dom nhà mạng di động patagok thuê bao bahrau. 

Patui di ini dom khau tin dunya:

# Tui panuac khan di gah y tế Mô-dăm-bích, urang metai kayua njauk jru mek di tỉnh Tê-tê, gah timur taneh ia ini kayua menyum sa janih bia hu ieu lac Phôm-bê hu tal 67 urang. Dom urang ini tui kuhria daok hu rilo jang tuk labaih 100 urang jeng daok hu iek ruak di sang iek ruak.

# Tỉnh Vân Nam, gah Tây Nam Trung Quốc daok njauk langik tasik biak jhak meng puac adit tapa, ngak kan kandah praong gah kinh tế saong xã hội di tỉnh ini. Labaih 600 ribau urang, 36 ribau ha taneh ngak nong jeng gaok kan kandah trak kayua hajan patau saong tuyết laik kapal, jaik 60 baoh sang jaleih, labaih 8.100 drei athur raong, menuk ada metai kayua langik tasik biak jhak./.