1# Danakdak pato megru uranaih tangaoh dahlau di thun nao bac, piah patagok bruk caga nao bac di uranaih tangaoh Việt Nam kayua  Kadung jien patagok xã hội Nhật Bản daong. Danakdak hu yaom 60 tỉ đồng, hu ba tabiak ngak di Hà Nội, Thái Nguyên, Quảng Bình saong ban raya Hồ Chí Minh daong ka 255 uranaih tangaoh ala 6 thun hu bac sap kí hiệu di sang, di sang bac piah patagok khả năng, akaok sahaneg dahlau si yam tame sang bac. Urak ini, dalam taneh ia hu jaik 15.500 uranaih ala 6 thun lac uranaih tangaoh atau kan si pang, min rilo uranaih oh hu bac mam non, dalam tuk amaik ame uranaih oh hu daong ilamu piah ndom puac saong uranaih.

2/ Bilan tabau 2014 – 2015, dalam taneh ia pala labaih 300 ribau ha tabau nguyên liệu ngan saong sản lượng jaik 20 triệu tấn tabau phun, ngak hu labaih 1,4 triệu tấn saradang. Min kayua ngak rilo , urak ini dalam taneh ia jeng daok labaih jaik 390 ribau tấn saradang dalam tuk saradang pablei tabiak negar langiu tok labaih 69 ribau tấn. yaom  tabau nguyên liệu glaong; ilamu pala drak daok biar; bruk quy hoạch bhum nguyên liệu saong sang mac di dom labik oh ka lagaih… lac dom makna ngak ka gah tabau saradang VN kurang pren merak gauk di drak pasar.

3# Sruh ruak panidak tabiak darah di huyện Đắc Glei, tỉnh Kon Tum patuh tabiak di 3 xã, ban sit lac Đắc Glei, Đắc Pét, Đắc K’roong meng akaok bilan 7 meng blaoh hu 39 urang ruak. Hadeidi tuk duah mboh sruh ruak,  Sở y tế tỉnh Kon Tum tacei pato pasak y te huyện Đắc Glei samal pasang iek, parabha, iek urang ruak tui njauk tacei pato di mintri y te. Taphia di nan, peih rilo mbang ieu pataom bhapbini rami ramik ngak hacih alam moi truong, pametai bọ gậy, loăng quăng saong pruh hóa chất pametai jamaok ka jaik 500 sang bhapbini.:

4/ Sở ilamu, TT saong DL tỉnh Thừa Thiên-Huế barau peih bruk taong yaom dom danak dak nghệ thuật daoh Huế ngan saong dom diễn viên nhạc công barau tame nghề. Dalam 3 harei meng harei 12 tal harei 14/8, jaik 80 diễn viên parang iek dom bài bản, ragu daoh Huế eng drei pilih ruah saong tui tacei pato di hội đồng nghệ thuật. Dom urang daoh gheih, hu mbaok tame daoh Huế di puk palei. Bruk ngak ini piah patagok bruk khik iek karja dalam gah nghệ thuật parang me-in daoh Huế.

5# Tỉnh Đắc Nông, Kapul mỹ thuật Việt Nam pambuak bruk saong uy mban bhapbini tỉnh Đắc Nông barau peih parang iek my thuat bhum VII (gah  Đông Nam Bộ) mbang yaka 20. Parang iek hu labaih 200 tác phẩm, hu pilih ruah meng 314 tác phẩm di labaih 180 họa sỹ, urang điêu khắc lac urang dalam kapul  Mỹ thuật Việt Nam saong kapul Văn học nghệ thuật di  9 tỉnh: Đắc Nông, Bình Phước, Bình Dương, Bình Thuận, Bà Rịa-Vũng Tàu, Đồng Nai, Lâm Đồng, Ninh Thuận saong Tây Ninh.  Ông Trần Khánh Chương, akaok kapul mỹ thuật Việt Nam brei thau :“Parang iek labik bhum ini piah ba dom tac pham mai tal bhapbini, pachreih dom urang paneh. Ini jeng lac jalan lagaih piah bhapbini thau tal my thuat, paglaong trinh do tham my di bhapbini.

6/ Pahadar 70 thun harei công an bhap bini VN (19/8/1945-19/8/2015) saong 10 thun harei “taong abih bhap bini khik caga an ninh palei negar” (19/8/2005-19/8/2015), mesup harei 14/8, mban peih bruk pahadar dom harei lễ praong ban raya HCM hu peih parang iek thoat binguk ngan saong kadha “công an bhap bini VN – hadah mbaok 70 thun dak padang, mesruh metak saong praong tagok”. Rah tabiak meng ini mbiak tal harei 20/8. Parang iek hu parang tabiak 100 blah thaot tui 2 kadha nan lac “ilamu đấu tranh hadah hadai di công an bhap bini VN”,  “công an saong bhap bini ban raya HCM khik caga an ninh palei negar”. Parang hu ba mai ka urang maong dom rup thoat yaih khan sajarah dak rai 70 thun dak padang, mesruh metah saong praong tagok di công an bhap bini ala bruk tacei ba di Đảng; jeng yau dom rup binguk siam di dom kapul công an, cảnh sát pacang padam pui khuah … saong rik daong di bhap bini ban raya dalam bruk khik caga an ninh palei negar.

7# Cục Mỹ thuật, nhiếp ảnh saong parang iek di mintri ilimo, padhih saong Du lịch barau peih tabiak bruk  pakacah saong parang iek thaot binguk ngan saong kadha “roh duah Việt Nam”. Mbang pakacah saong parang iek thaot binguk hu kadha “Roh duah Việt Nam” piah pachreih dom urang nhiếp ảnh patagok pren sáng tạo meng dom meta maong barau karei piah hu dom tac pham hu yaom glaong ka noi dung saong nghe thuat. Tukvak nap dom tac pham pataom tame pakacah  meng harei 14/8 tal  30/10/2015. Tui kuhria, parang iek hu alin giải thưởng saong hu ba tabiak parang iek di Hà Nội dalam bilan 12 thun ini.

Patui di ini dom khau tin dunya:

8/ Mintri an ninh Lào pambuak bruk saong Đại sứ quán VN saong jabat lambaok mintri công an VN di Lào barau peih bruk tamat tal bac sap VN hệ 6 bilan akaok meti ka 28 urang jakar, chiến sỹ mintri an ninh Lào. Meng trách nhiệm di dom urang chiến sỹ, hadei di 6 bilan bac megru, 28 anek saih di tal bac medandom meyai hu meng sap Việt, pang, ndom saong puac, vak gheih.

9# Melam 13/8, gilac hu sa mbang patuh di sa sang mac thép di tỉnh Liêu Ninh, Trung Quốc. Mbang patuh ini rah tabiak oh ka tal 24 tuk hadei di mbang patuh praong di cảng Thiên Tân (ban Thiên Tân, Trung Quốc). Rayo papar sap negar Trung Quốc brei thau, mbang patuh rah tabiak tuk 9 tuk 45 minit melam 13/8 (tukvak di puk palei) di sa sang mac luyện thép tư nhân sit di gah langiu ban An Sơn, di tỉnh Liêu Ninh. Urak ini, oh hu thei bị thương dalam mbang patuh ini. Makna mbang patuh lac kayua “chất lỏng nyu sraiy tabiak langiu ”. Dom urang ngak di sang mac kham merat padam pui khuah.

10/ Thứ trưởng mintri nội vụ Iran Majid Aghababaei brei thau, dom pabah mbang negar angaok haluk nan lac Razi, Bazargan saong Sero hu peih pabah mbang saong ngak bruk veik. Dahlau nan hu mehit lac Iran kreik pabah mbang taphia negar  haong Ankara hadei di tuk sa sruh radaih tải di taneh ia ini njauk Thổ Nhĩ Kỳ cuh harei 11/8. Gah Thổ Nhĩ Kỳ ndom lac hu kreik pabah mbang taphia negar saong Iran dom mong di puac harei piah pasang iek bruk di labik nan hadei di tuk rah tabiak bruk cuh gauk./.