1./Bruk ngak harak khai sinh ka anek naih di tỉnh bhum ceik Sơn La mboh hu rilo siam mekre, abih di nyu nan lac di bhum atah bayah, bhum urang bangsa takik. Dalam thun 2014, dalam tỉnh hu ngak harak khai sinh ka labaih 32 ribau anek naih. Ong Phạm Văn Chung, Giám đốc Sở Tư pháp tỉnh Sơn La brei thau: Piah ngak siam bruk ngak harak khai sinh tui adat hukum di karja, dahlau di abih brei jhul pakhang bruk pathau khan brei ka urang thau cambaih. Abih di nyu nan lac di bhum atah bayah, bhum urang bangsa takik, brei patagok jang bruk pathau khan, pasang iek piah ngak ka nyu siam jang bruk ngak harak khai sinh ini

2/ Ban sit Đà Nẵng daok pataom tame ngak ralo jalan ngak patrun kathaot. Tal urak ini, ban sit hu daong ka jaik 8.600 baoh sang tabiak truh kan kathaot, dalam nan hu jaik 1.600 baoh sang tabiak truh baoh sang biak kan kathaot, patrun baoh sang kan kathaot di ban sit daok 2,8%. Ban sit Đà Nẵng jeng hu patabiak sarak ka baoh sang kan kathaot mesraiy oh mek laba dalam 3 thun, brei ka labaih 1.000 baoh sang biak kan kathaot mesraiy phun jien ngak mbang.

3./Ủy ban bhap bini tỉnh Bình Định bahrau brei adat peih ngak Dự án padang ngak bến ikan Nhơn Lý di xã Nhơn Lý, ban sit Quy Nhơn saong bến ikan Tân Phụng di xã Mỹ Thọ, huyện Phù Mỹ. Dua dự án này daok dalam danak dak kein laba tapen tasik kayua bruk patagok khang kajap tỉnh Bình Định, hu peih tabiak ngak meng thun 2015 tal thun 2017 saong yaom jien buh tame ngak abih tih 78 tỷ đồng.

4/ Đại tá Nguyễn Đình Đoàn, phaok Bộ Chỉ huy bộ đội biên phòng tỉnh Tây Ninh brei thau, ngak tui kế hoạch di Bộ tư lệnh Bộ đội biên phòng ka bruk mesruh pacang buôn lậu, pajeng ba sung hukum pakao hala tapa negar, abih di nyu nan lac tuk tết anek sak pabe 2015, Bộ Chỉ huy Bộ đội biên phòng Tây Ninh brei patagok menuac urang di kapul pacang cakak tội phạm ma túy saong pambuak bruk saong 2 đồn biên phòng di Mộc Bài saong Phước Chỉ piah duah thau bruk ngak di kol tội phạm, abih di nyu nan lac kol buôn lậu, piah mek hu siam mekre di abih dalam mbang tabung glaong ini.

5./Gilang pariak Ngoại thương dhar Đồng Nai bahrau peih bruk nao rivang saong alin hadiah 100 pok pandap, yaom 400 ribau đồng yaok pok brei ka sang kan kathaot, sang kan kandah di ban sit Vĩnh An, huyện Vĩnh Cửu. Lingiu di nan, Gilang pariak daok hu nao rivang saong alin hadiah pandap di pasak raong urang taha, urang jaoh jo saong urang ruak tâm thần di tỉnh. Labaih 125 pok pandap, 400kg brah, 15 thùng mì, 15 klaok menyek mbang saong 5 triệu đồng piah iek glang tết ka urang taha daok di pasak.

6/ Patagok co sở vật chất khang kajap, pandap panda jamriak barau gam saong menuac urang hu ilamu glaong, sang iek ruak Đa khoa ban sit  Cần Thơ daok caik hatai sangka tame bruk paglaong siam lagaih iek glang pren yava ka bhap bini bhum taneran kraong Cửu Long. Tal urak ini, sang iek ruak ban sit Cần Thơ hu pandar labaih 30 lỹ thuật glaong dalam taong abih gah tame iek ruak. Dalam nan, blac daraih nội soi hu iek lac kỹ thuật chủ đạo di sang iek ruak.

7./ An Giang hu maong lac labik ngak ikan thu hu angan di bhum taneran kraong Cửu Long, yaok thun pablei tabiak darak pasar dalam taneh ia yaok rituh tấn ikan thu dom janih saong daok hu pablei tabiak negar lingiu. Thun ini, ikan thu hu ngak meng ula saong kiuk oh ginup piah pablei dalam tuk tết. Sa-ai Lê Văn Tiểu, pô labik ngak ikan thu meng ula daok di  xã Vĩnh Hội Đông, huyện An Phú, An Giang brei thau: Thun ini darak pasar biak kurang janih ikan thu ngak meng ula, hu rilo menuac di dom tỉnh dalam bhum taneran kraong Cửu Long saong ban raya Hồ Chí Minh mai kakei blei dahlau piah ngak pandap alin hadiah..

Patui di ini dom khau tin dunya:

8/ Di jabat ngak bruk mintri Ngoại giao (Lào), ong Xạ-lởm-xay Côm-mạ-xít, Thứ trưởng mintri Ngoại giao Lào saong ong Khri-tôp Bơ-cơ-nơ, Đại sứ Thụy Sĩ di Lào hu mbaoh tangin tame Harak pambuak bruk miễn thị thực ka menuac sia dua tneh ia hu hộ chiếu ngoại giao saong hộ chiếu công vụ. Tui harak pambuak bruk bahrau nan, bhap bini dua taneh ia hu adat nao mai saong daok oh tapa 90 harei. 

9./Dom jalan saong dom mblang hamu di negar Anh daok hu tuyết patih me-om sre. Gah khí tượng taneh ia ini hu tabiak panuac cảnh báo ka bruk lingik li-an yau ia patau di dom labik. Labaih 200 sang bac di Xcốt-len, xứ Uên ( Wales) saong Bắc Ailen brei kreik pabah mbang kayua tuyết laik kapal. Cảnh sát hu panuac kakei bhap bini brei caik hatai sangka tuk nao angaok dom jalan hu bak tuyết.   

10/ Piah pacang cakak bruk ô nhiễm rah tabiak khang di TQ dalm tukvak tapa, UB salih barau saong patagok taneh ia TQ hu pandar dom ban sit gah brak taneh ia ini, dalam nan hu ban ine Bắc Kinh, ban Thiên Tân saong tỉnh Hà Bắc brei cakak trun bruk pandar dhang dalam puk palei drei. Tui nan, tal thun 2017, abih tih dhang pandar di 3 labik nan trun daok 63 triệu tấn./.