1 # Raja-ei bahrau tacei pato dom mentri, ngành, puk palei pasang iek piah thau cambaih baoh sang kathaot, baoh sang jaik kathaot tui chuẩn bahrau saong kuhria caga dom jalan piah peih ngak dalam thun 2016 pambuak pagam haong bruk peih ngak danak dak pakat negar patrun kathaot tui jalan khang kajap 2016-2020 bahrau hu Quốc hội brei tapa. Taphia di nan, patui ngak ka nyu salah saong peih ngak siam dom sarak brei ka bhum urang bangsa takik saong dom puk palei biak kan kandah, abih di nyu nan lac gah taneh daok, taneh pala drak, sang daok, aia hacih, y tế, pato megru...

2/ Piah pacang caga jit ruak menuk ada pambak meng menuk ada tapa menuac, Mintri y tế hu panuac kakei bhap bini jhui mbang menuk ada, dom rilaow menuk ada ruak, metai oh thau asar di nyu, jhui sik ngak, pajeng ba, pablei salih menuk ada oh thau asar. Tuk thau menuk ada ruak, metai, urang jhui sik ngak song mbang bo khan chip ka karja palei song thú y labik nan thau.           

3 # Thun bac ini, tỉnh Đắc Lắc palih ruah hu 940 anek saih tame tal 10 saong  2.700 anek saih bangsa takik tame tal 6 bac pak dom sang bac phổ thông bangsa gam bac gam daok. Tỉnh Đắk Lắk jeng hu palih ruah, brei 200 anek saih bangsa takik, mboh ralo lac dom adei daok pak bhum kan kandah nao bac pak dom sang bac đại học, cao đẳng chuyên nghiệp dalam negar, daong patagok urang ngak bruk chất lượng gkaong ka puk palei.

4/ Tỉnh Bình Định bahrau hu sa urang metai camereip kayua ruak pandiak tabiak darah. Lac uranaih umo 4 thun dok di ban sit Bồng Sơn, huyện Hoài Nhơn. Tal tuk vak ni, tỉnh Bình Định hu labaih 1.200 urang ruak pandiak tabiak darah tagok jang rilo thun dahlau. Bác sĩ Bùi Ngọc Lân, Akaok pasak Y tế dự phòng tỉnh Bình Định brei thau

 Bruk pathau khan jak ba pacang caga ruak pandiak tabiak darah hu peih ngak yaok thun. Urak ni kol hulin dok pachreih ba dom ban, ngành abih di nyu nan lac dom sang bac, pachreih ba anek saih hu mbaok tame bruk pametai loăng quăng, bọ gậy di boh sang

5 # Pahadar 33 thun harei Gru pato Việt Nam, Sở Pato megru bal raya Hồ Chí Minh bahrau peih bruk pok angan saong alin brei giải thưởng Võ Trường Toản thun 2015 ka 33 gru pato hu ralo rik daong dalam bruk pato megru. Ini lac dom gru pato hu palih ruah meng labaih 70 ribau gru pato di bal raya Hồ Chí Minh dalam thun bac ini. Anai gru Huỳnh Thị Tuyết Vân, gru pato sang bac Bồi dưỡng Giáo dục Quận 6, sa dalam 33 gru pato taduan hu giải thưởng Võ Trường Toản thun ini brei thau:

 “Hadei di 33 thun buh pren yava ka bruk pato megru, harei ini taduan hu giải thưởng Võ Trường Toản, dahlak mboh biak drut droi. Tui dahlak, giải thưởng Võ Trường Toản ini hu makna biak prong, nyu lac pren khang piah ka gru pato kham merat pato siam jang saong sangka tal anek saih ralo jang.”

 6/ Urak ni, urang nong bhum taneran krong CL dok samar trun pajaih hu labaih 1,5 triệu ha padai Đông Xuân 2015-2016. Piah mek hu năng suất, chất lượng glong pabak ka bruk pablei tabiak negar langiu, gah ngak nong dom tỉnh hu panuac kakei urang nong ngak dom pajaih yau Jasmine 85, Nàng Hoa,  nyaom pajaih OM  song VD20, IR 4625... Thạc sĩ Lê Quốc Cường, Giám đốc Pasak khik caga phun pala gah merong  di Cục khik caga phun pala (mintri ngak nong song patagok palei pala) kakei lac

Mik va urang nong njauk caga siam bruk ngak taneh, li-ua siam piah plaih njauk ngộ độc hữu cơ. Khol drei pacang siam baoh bao meh, takuh meng di akaok vụ meda patrun khat lihik. Bilan đông xuân thun ni, meda kurang ia di puac vụ, mik va njauk  kuhria caga siam.

7 # Yaok pluh baoh sang urang nong xã Bình Phú, huyện Càng Long, tỉnh Trà Vinh daok duh hatai kayua jaik tal harei pala drak min padai pajaih chất lượng glaong oh ka pacah meta. Nan lac padai pajaih cấp xác nhận 1 kayua Công ty dịch vụ Nông nghiệp Đông Xuân daok di palei 1, bal sit Càng Long, tỉnh Trà Vinh pablei, yaom 12.500đ/kg. Mong gah langiu, asal pajaih jeng khang, kajap, hadah, jangaih, daok dalam vaktu pandar min hadei di tram pandih tui njauk panuac tacei pato, padai pacah meta oh ka tal 20%. Urak ini gah chức năng daok mek mẫu nao dut iek piah thau cambaih laih makna di nyu.

 Patui di ni dom khau tin dunya:

8/ Harei 21/11 anak tal, Lào cuh vệ tinh viễn thông Lào Sat-1. Ni lac sa bruk hu makna biak praong di negar Lào. Urak ni dom bruk kuhria caga hu ngak salah bloh. Dự án cuh vệ tinh Lào Sat-1 hu yaom jien buh tame ngak abih tih 259 triệu đô la. Vệ tinh ni hu cuh meng Trung Quốc min dom hệ thống điều khiển caik di Lào.Urak ni, Lào hu ba menuac tapa TQ piah hu mbaok tame bruk cuh vệ tinh dalam harei  21/11 anak tal.

9 # Raja-ei Thái Lan bahrau brei tapa dự thảo pambuak bruk haong Trung Quốc patagok dom jalan pasei atah 867 km, ngan haong phun jien buh tame padang ngak jaik 350 tỷ baht (samu 9,8 tỷ USD). Ini lac jalan pasei pambuak meng pabah negar Noỏng Khai haong Lào tal dom tỉnh Na-khon Rát-cha-xi-ma saong Keng Khoi saong jalan pambuak meng Bangkok tal pabah lamnge Máp Ta Phút. 

10/ Kuhria tal harei 12/11 labaih 2.100 drei ada di (Cam-Pu-Chia) metai kayua njom virus H5N1. Urak ni dok 8.800 drei ada di CPC dok mbuan si njom ruak. Dom drei menuk da njom ruak mbang ni jeng hu raong palao dalam bein gah likuk sang. Hadei di tuk dom po trang trại brei thau lac tapon da njauk ruak song metai, gah thú y hu nao pasang iek song mek mẫu. Tapa dut iek mboh lac dom mẫu nan dương tính song virus H5N1./.