1/ Mintri jien padai hu jao buh brei (oh mek jien) 1.566 tấn brah meng gilang khik mepiah di negar daong Nghệ An piah daong ka bhap bini dalam tukvak cang bilan yuak thun 2015. Taphia di nan, pandar UB bhap bini tỉnh Nghệ An taduan mek saong parabha brah nan njauk tukvak, njauk menuac urang. Meng akaok thun tal ini, thủ tướng rajaei jeng hu tacei pato mintri jien padai buh brei (oh mek jien) brah meng gilang khik mepiah di negar brei ka dom tỉnh: Lào Cai, Lai Châu, Tuyên Quang, Quảng Trị, Quảng Ngãi, Bình Định, Đắk Lắk, Kon Tum, Gia Lai, Ninh Thuận, Phú Yên.

2/ Bahrau ni, sang ngak bruk bahrau di palao Sinh Tồn, huyện palao Trường Sa, tỉnh Khánh Hòa hu peih pakak song ba tame pandar. Sang ngak bruk ka urang jakar, bol bala song bhap bini palao Sinh Tồn hu padang ngak abih 15 tỷ đồng kayua urang jakar, urang ngak gah padang ngak rik dong. Sang ngak bruk nan glaong 2 tal, prong jiak 460 m2 khang kajap song hu dom công trình phụ karei karei pabak ka bruk khik caga, bac megru song mbang ngui ka urang jakar bol bala song bhap bini daok di  palao. 

3/ Piah pok meyaom dom urang đội, phụ trách đội ngak siam bruk đội saong bruk uranaih, harei 26/5, di ban sit Kon Tum, hội đồng đội tỉnh Kon Tum peih nyaom roya cháu ngoan Bác Hồ mbang ka VIII. Dalam nyaom roya, 180 urang đội, 240 gru pato tổng phụ trách đội saong 9 urang jakar hội đồng đội dom huyện, ban dalam tỉnh hu pok meyaom. Ini lac dom baoh bingu hadah mekre di abih dalam bein bingu ribau bruk siam, bac da-a naih joi, kham merat hu mbaok tame bruk đội saong bruk uranaih di puk palei.

4/ Tui chỉ thị di Ủy ban bhap bini tỉnh Đồng Nai ka bruk peih mbang pakacah Trung học phổ thông pakat negar thun 2015 payua tal Sở pato megru, dom sở, dom gah pambuak tal, Ủy ban bhap bini dom huyện, thị, dom đơn vị njauk pambuak gauk ngak siam bruk di drei piah peih mbang pakacah siam mekre, njauk quy chế. Dalam nan gah pato megru brei kuhria caga dom kadha ka mbang pakacah yau: peih ngak siam danak dak, jalan pato pakai, bac megru, peih ngak siam bruk ôn tập ka anek saih, brei urang jakar, gru pato ginup tanut chuẩn hu mbaok tame dom khâu di bruk pakacah di palei pala, dalam song hadei di tuk pakacah khik hu siam mekre, tantu, cambaih laih. 

5/ Tui UB bhap bini huyện Gò Công Đông, tỉnh Tiền Giang, meng bilan 3 tal ini, dalam huyện hu jaik 1.600 ha nghêu di labaih 170 baoh sang urang ngak ikan njauk metai rilo ngak khat lahik jaik 400 tỷ đồng. Ngan saong yaom 16.000 đồng sa kg ye yaok ha nghêu njauk khat lahik labaih 350 triệu đồng. kayua phun jien buh tame ralo nan ye rai diuk di urang raong nghêu gaok kan kandah, oh hu jien piah raong veik. Urak ini, gah chức năng saong UB bhap bini huyện Gò Công Đông daok ngak dom harak gar piah pok tagok pakat angaok daong phun jien ka urang ngak ikan hu nghêu njauk khat lahik. Tal urak ini, gah chuyên môn oh ka duah mboh makna ngak brei metai nghêu ralo.

6/ Tui gah ngak nong tỉnh Hậu Giang, tui kuhria dalam bilan 5 ni dalam tỉnh hu labaih 10.000 ha padai hè thu patrun pajaih avar hu yuak kuak. Tui năng suất, yaom kaom yau urak ni, hadei di tuk kaoh abih phun jien urang nong dok liba hu 15 triệu đồng sa ha,  hu taneh mek hu 20 triệu đồng sa ha. Yaom lac liba oh glong dut song yaok thun min urang nong biak bui sambai, yuak tal halei urang mai blei tal nan, hu phun jien piah ngak bilan padai hadei. Tal tukvak ni, urang nong dalam tỉnh yuak hu labaih 1000 ha padai hè thu, rilo mblang padai brei năng suất jiak  10 tấn sa ha, njauk jang vụ dahlau. 

7/ Tui harak pathau khan di UB an toàn jalan mbak pakat negar, dalam 5 bilan akaok thun, dalam negar rah tabiak labaih 9 ribau 300 mbang bala angaok jalan mbak, ngak ka labaih 3 ribau 700 urang metai, 8 ribau 500 urang njauk rambuac Duk saong dom bilan ini thun dahlau, nyu takik jang di taong abih 3 gah nan lac: dom mbang, dom urang metai, dom urang njauk rambuac. Eng bala jalan pasei ye rilo jang dom mbang saong dom urang metai. Bala angaok jalan mbak biak khang rah tabiak jaik 4 ribau 300 mbang, takik jang 175 mbang duk saong thun 2014.

Patui di ini dom khau tin dunya:

8/ Di ban ine Phnôm Pênh, lambaok rajaei CPC hu pok huân chương glong di abih di Hoàng gia Campuchia brei ka gilang pariak Đầu tư song patagok VN (BIDV), song gilang pariak Đầu tư song patagok Campuchia (BIDC) –đơn vị thành viên di BIDV di Campuchia. Brei panuac di tuk nan, amuk Men Som On, Phó Thủ tướng rajaei Campuchia tong yaom glong dom rik dong di BIDV dalam bruk patagok KT di CPC 

9/ Hãng tin Tân hoa xã di TQ brei thau, sa mbang khuah sang raong ong muk taha di labik bhum kreih negar taneh ia ini ngak ka 38 urang metai saong 6 urang karei njauk rambuac. Mbang khuah rah tabiak di sa baoh sang dalam tòa nhà brei ka dom urang taha di Bình Đỉnh Sơn, tỉnh Hà Nam. 2 urang karei njauk rambuac biak trak. Dom bruk roh duah saong daong ka urang njauk bala daok hu peih tabiak saong makna di mbang khuah oh ka thau.

10/ Kadung jien uranaih Liên hợp quốc (UNICEF) brei tha: labaih 70 ribau uranaih umo ala 5 thun di Nê Pan mbuan si njauk lavang lavaih, hadei di 2 mbang megei boh taneh khang rah tabiak di negar ni. Tui kuhria hu labaih 15 ribau uranaih umo ala 14 thun dok njauk lavang lavaiy trak song 55 ribau uranaih karei jeng dok dalam lavang lavaih di tanut mbiah. Dom adei njauk hu bruk dong samar pandap mbang piah pasiam bruk lavang lavaih. Kadung jien uranaih Liên hợp quốc dok pambuak bruk song dom gah hu pagam tal piah dong ka uranaih Nê Pan./.