1# Kapul ngak bruk di Ban Kinh tế Trung ương barau hu var ngak bruk saong  tỉnh Phú Yên ka bruk khik ramik, pandar taneh tapeng tasik saong taneh brei pah taneh tapeng tasik ka dom kapul nyaom, menuac urang. Phú Yên urak ini hu 23 dự án tapeng tasik ngan saong labaih 5,6 triệu m2 taneh ; dalam nan, dự án du lịch meblah rilo di abih, jaik 5 triệu m2, daok veik lac dự án jabat ngak bruk saong dự án raong pala kaya ikan dalam ia. Dom dự án praong hu pah taneh tapeng tasik ye : dự án sang mac lọc hóa dầu Vũng Rô (xã Hòa Tâm, huyện Đông Hòa); dự án palei du lịch dunya Bắc Âu (ban sit Tuy Hòa; dự án raong hadang hacih saong raong hadang di angaok cuah.

2/ Di ban sit Buôn Ma Thuột, mintri ngak nông saong patagok palei pala barau pambuak bruk saong tỉnh Đắk Lắk peih nyaom meyai jalan ilamu công nghệ pacang pandiak bhang saong patagok khang kajap cà phê, pa-aok blait, amriah kalu bhum Đông Nam Bộ saong Tây Nguyên. Dalam nyaom meyai hu 40 pathau khan di dom urang ilamu, dom urang khik iek saong dom puk palei hu ginum meyai, klah rabha ilamu dalam pacang cakak pandiak bhang, pruh patak pataom ia piah patagok khang kajap phun cà phê, amriah kalu di bhum Đông Nam Bộ , Tây Nguyên. 

3# Meng melam 28/3 tal ini, kayua lingik la ar, bhum tasik Bình Thuận hu angin Đông Bắc khang pakat 6, giật tal pakat 8; riyak tasik glaong meng 2 tal 4 mét. Angin khang pambuak saong triều cường ngak glut jaleih 1.000 mét ar tasik di palei Tiến Đức, xã Tiến Thành, ban sit Phan Thiết. Triều cường nyu taong jaleih abih 4 baok sang, saong ngak ka rilo sang karei daok di labik ini duh hatai. Hu sa urang  bị thương tuk talaih, pajeng ba pandap, drap ar. 60 sang mbuan glut jaleih njauk nao plaih daok labik karei. Uy mban bhapbini ban sit Phan Thiết daok ieu pataom menuac daong bhapbini ba drap ar nao plaih di labik karei saong ngak kè tạm piah patrun patakik glut jaleih sang bhapbini tapeng tasik.

4/ Huyện Phong Điền, ban Cần Thơ saong ban sit Điện Bàn, tỉnh Quảng Nam barau hu Thủ tướng rajaei brei angan lac mek hu tanut chuẩn palei pala barau thun 2015. Thủ tướng rajaei jao ka UB bhap bini ban Cần Thơ saong UB bhap bini tỉnh Quảng Nam tabiak panuac brei thau tui quy định saong pok meyaom tui quyết định 1620/QĐ-TTg harei 20/9/2011 di Thủ tướng rajaei ka bruk patabiak jalan peih bruk pakacah “dalam taneh ia ba tangin tame padang ngak palei pala barau”.

5# Di ban sit Rạch Giá, Tỉnh ủy Kiên Giang barau peih bruk phong tặng, truy tặng angan  “ amaik VN anh hùng” mbang V thun 2016 ka 184 urang. Dalam nan alin angan ka 10 urang saong truy tặng angan ka 174 urang. Tal tukvak ini, dalam tỉnh Kiên Giang hu 1.318 amaik hu phong tặng, truy tặng angan “ amaik Việt Nam anh hùng”.

6/ Piah khik caga labaih 8.000 ha bein phun mbang baoh anak bruk njom mbak dak harei dak khang, Jabat ngak nông saong patagok palei pala huyện Chợ Lách, tỉnh Bến Tre hu padang 3 labik duk độ mbak piah brei thau bruk njom mbak yaok harei angaok riyak papar sap saong daong ka urang nông pasang iek độ mbak dalam danao bein, piah thau tuk halei njauk njuk ia pruh ka bein phun mbang baoh. Ong Bùi Thanh Liêm – akaok Jabat ngak nông saong patagok palei pala huyện Chợ Lách, tỉnh Bến tre brei thau: “Labik ini drei duk bloh drei khan ka bhap bini thau tuk halei njauk mek ia tame, phun halei diuk hu dalam độ mbak halei. Bruk praong di dom labik ini oh lac duk bloh lui bhap bini tabiak nao bo di abik nan daok hu urang jakar tacei pato langyah ka bhap bini pandar ia yau habar saong tuk halei njuk ia tame bein piah khik mepiah”.

7# Hadei di labaih sa thun ngak tui Nghị định 67 di rajaei ka dom sarak patatagok kaya ikan, tal urak ini, 4 sruh kapal kanduh kayau ngak barau akaok mereip di urang ngak ikan Sóc Trăng barau hu ba trun ia piah tabiak tasik taong ikan. 4 sruh kapal kanduh kayau hu ngak barau duh ka bruk taong atah ar hu công suất meng 650 CV tagok saong yaom jien ngak meng 8 – 9 tỷ đồng/sa sruh; dalam nan gilang pariak ngak nong saong patagok palei pala brei mesraiy 6 tỷ đồng. Ini lac danakdak peih tabiak jalan ka urang ngak ikan hu mbuan lagaih nao tasik livik harei, gam taong mek kaya ikan, gam daong brei thau chủ quyền tasik pulao negar. 

Patui di ini dom khau tin dunya:

8/ Di jabat mintri jien padai Lào di ban ine Viêng chăn, Ong Liên Thi kẹo  - akaok mintri jien padai hu pan akaok mbang họp báo khan brei thau: meng harei 1-4/4/2016 Lào hu dang tabiak peih nyaom meyai akaok mintri jien padai ASEAN mbang ka 20; Nyaom meyai akaok mintri jien padai saong thống đốc gilang pariak ASEAN mbang ka 2 gam saong dom nyaom meyai pambuak tal. Akaok mintri jien padai Lào, ong Liên Thi Kẹo brei thau: nyaom meyai hu brei tapa asal nghị định thư ka bruk tự do hóa dịch vụ jien padai dalam nan hu gah bảo hiểm saong gilang pariak hu mbaoh tangin sanya di akaok bilan 5/2016 anak tal di Phờ răng phuốc -Đức.

9# Ủy ban soạn thảo Hukum negar Thái Lan barau tabiak dự thảo hukum negar bahrau hu maong lac jalan langyah ka bruk srau kadau chính trị dui atah pluh thun tapa di taneh ia ini. Tui kuhria, dự thảo Hukum negar barau hu ba tabiak duah thau hatai sahneng di bhap bini di harei 7/8 tal. Meyah dự thảo ini hu bhap bini njauk hatai brei tapa,bruk tổng tuyển cử meda hu peih  ngak di bilan 7/2017 yau panuac sanya di Thủ tướng Prayuth Chan-ocha. 

10/ kapul ngak pahala Oxfam barau hu panuac ieu dom taneh ia kaya meda dalam dunya kham merat jang gac dalam bruk daong ka urang tị nạn Syria, saong brei thau lac tal urak ini kapul ini barau taduan hu 1,39% dalam abih tih jaik 5 triệu urang di cư Syria. Cambaih laih, dalam kapul dom taneh ia kaya meda, tok hu 3 taneh ia nan lac Canada, Đức saong Na Uy sanya daong  tái định cư ka rilo urang Syria jang duk saong tanut ba tabiak. Dalam tuk dom taneh ia karei yau Australia, Phần Lan, Iceland, Thụy Điển saongNew Zealand  bahrau tut angan labaih meteh yaom bo njauk di nyu lac brei rik daong, dom taneh ia daok veik di kapul ini daok tut angan taduan takik jang biak ralo duk saong tanut ala trung bình ini./.