1# Pagaiy harei 31/3, Quốc hội hu pilih ruah amuk Nguyễn Thị Kim Ngân dang ngak akaok Quốc hội, akaok Hội đồng bầu cử pakat negar. Brei thau ka bruk kiểm phiếu,  ong Huỳnh Văn Tý, akaok kapul urang Quốc hội tỉnh Bình Thuận, akaok mban Kiểm phiếu brei thau, hu 472 phiếu (meblah 95,5% dom urang QH) njauk hatai pok amuk Nguyễn Thị Kim Ngân dang akaok Quốc hội. Daok bruk dang akaok Hội đồng bầu cử pakat negar hu 467 phiếu (meblah 94,5%) njauk hatai pok amuk Nguyễn Thị Kim Ngân dang angan ini. Hadei di tuk hu Quốc hội pilih ruah, amuk Nguyễn Thị Kim Ngân ngak lễ tuyên thệ anak Quốc hội.

2/ Panuac khan meng Cục an toàn thực phẩm brei thau, dalam quý I thun 2016, cục hu tabiak quyết định taong phạt hành chính 20 cty ngak suan gah an toàn thực phẩm ngan saong yaom jien taong phạt abih tih jaik 500 triệu đồng. Gam saong bruk taong phạt nan, Cục an toàn thực phẩm hu pacap dom công ty ngak suan gah quảng cáo taoh klaak dom asal oh njauk; dom cty ngak suan gah chất lượng pandap njauk pataom mek veik lô pandap oh siam daok pablei di darak pasar, pandar ka bruk karei, ngak pasiam veik atau ba nao am cuh klaak dom pandap nan tui quy định.

3# Tổng Cục Thủy sản saong Sở ngak nong saong patagok palei pala Hải Phòng pambuak bruk saong huyện pulao Cát Hải, ban sit Hải Phòng barau peih ngak adat cầu ngư tabiak taong cap bilan ikan Nam saong palao jaik 140 ribau drei ikan pajaih trun bhum tasik Cát Bà piah pabak veik kaya ikan dalam ia. Bruk palao ikan pajaih hu ban sit peih ngak yaok thun piah paglaong akaok sahaneg di bhapbini ka bruk khik caga kaya ikan dalam ia, pabak patagok kaya ikan dalam ia, paglaong mật độ quần thể di dom janih kaya ikan, cân bằng sinh thái saong khik caga alam môi trường.

4/ Panuac di Ban Chỉ huy pacang cakak bala langik tasik saong daong duah urang njauk bala tỉnh Bình Định brei thau, biar harei 30/3, kapal ikan BĐ 96461-TS di urang taong cap ikan dalam tinh daok taong cap ikan angaok tasik njauk khut jamriah, seik tui ia. Kapal ikan BĐ 96461-TS hu công suất labaih 70 mã lực, angaok kapal hu 11 urang taong cap ikan kayua ong Võ Văn Sĩ, umo 38 thun, daok di xã Hoài Hương, huyện Hoài Nhơn ngak thuyền trưởng. Ong Phan Xuân Hải, Chánh Văn phòng Ban Chỉ huy pacang cakak bala saong daong duah urang njauk bala tỉnh Bình Định brei thau: “Urak ini daok ndom biai nao mai hu haong kapal nan tapa tần số 7903. Hadei di tuk thau ka bruk nan,  mban chỉ huy pacang cakak bala saong daong duah urang njauk bala tỉnh Bình Định hu pandar dom gah yau bộ đội biên phòng, chi cục kaya ikan, UB bhap bini huyện Hoài Nhơn khik liên lạc saong kapal njauk bala saong pandar dom kapal dalam khu vực gam tọa độ mai daong”.

5# Pagaiy harei 31/3, sa mbang khuah praong di Công ty ngak takhoh Á Châu, daok dalam labik công nghiệp Tân Bình, ban raya Hồ Chí Minh. Thau hu bruk ini, labaih 100 urang jakar urang lin di Phòng Cảnh sát caga khuah padam khuah quận Tân Phú, Quận 11, Quận 12 saong kapul cứu nạn cứu hộ - Cảnh sát pacang khuah padam khuah ban raya hu mbaok  piah padam apui. Tui kuhria mboh tuk akaok mereip, hu labaih 3 rabau mét vuông sang xưởng jaleih abih, dom pandap ngak kalik takhoh, jamriak ngak takhoh njauk pui mbang abih.

6/ Di tỉnh Bình Thuận, pandiak bhang jeng daok rah tabiak khang di taong abih dom huyện, ban sit ba tal thu lagu, kurang ia pala drak saong ia pandar, ngak kan kandah khang tal rai diuk bhap bini. Kuhria tal biar harei 30/3, Bình Thuận hu labaih 1.170 héc-ta phun pala njauk khat lahik kayua pandiak bhang, 600 ha phun mbang baoh kurang ia pruh, oh praong hu saong kht lahik taong abih. Tui kuhria yaom khat lahik tagok tal 40 tỷ đồng. Bình Thuận jeng hu labaih 96 ribau urang daok kurang ia pandar.  

7# Dalam bilan 3, bilan dam dara thun ini, dom urang đoàn dam dara saong kapul urang par phao kraong  tỉnh Tiền Giang hu ba gauk pajeng ba yaok rabau mét khối ia hacih meng dom trạm ba ia, labik padang ia taba mai daong rilo sang bhapbini daok dalam bhum atah bayah di huyện cù lao Tân Phú Đông, huyện Tân Phú Đông. Amuk Lê Thị Nết, urang daok di xã  Phú Đông, tỉnh Tiền Giang hu daong ia, khan lac: Dahlak kurang ia lavik paje bo oh thau ngak habal  piah hu ia piah pandar. Karja puk palei gam saong dom saai, dom kamuan daong ka dahlak hu ia pandar, dahlak ndua thar phuan rilo.

Patui di ini dom khau tin dunya:

8/ Hãng thông tấn Ria di Nga ba panuac di gah an ninh Nga brei thau, karja Nga  cap kreik 20 urang tui kol IS di ban ine Mát-xcơ-va. Bruk cap kreik dom urang ini hu peih ngak dalam chiến dịch bố ráp di gah an ninh liên bang Nga saong cảnh sát. Tapa duah thau mboh lac, dom urang nan daok duah saong pilih ruah menuac barau di Nga brei ka kol IS.

9# Panuac meng Nhà Trắng brei thau, Tổng thống Mỹ Ba-rắc Ô-ba-ma (Barack Obama) hu dang akaok nyaom biai Thượng đỉnh an ninh hạt nhân mbang yaka 4, rah tabiak dalam dua harei 31/3 saong 1/4 di ban ine Oa-xinh-tơn (Washington), Mỹ. Ini lac nyaom biai yaka 4 ka an ninh hạt nhân rah tabiak meng tuk Tổng thống Ba-rắc Ô-ba-ma tagok pan karja. Dom nyaom biai dahlau nan hu patui gauk peih tabiak di ban ine Oa-xinh-tơn thun 2010, Xơ-un (Seoul), Hàn Quốc, thun 2012 saong La Hay (The Hague), Hà Lan, thun 2014. Ini jeng lac nyaom biai hạt nhân puac abih dahlau di tuk ông Ô-ba-ma tabiak truh Nhà Trắng.

10/ Cuba pachreih tui bruk Thủ tướng Canada Giu-xtin Tru-đô mai rivang taneh ia pulao kaoh ini “dalam tuk halei lagaih”. Dom siam lagaih barau ini dalam talei pambuak bruk di Washington saong La Habana lac jalan praong peih tabiak ka dom cty di Canada jhul khang bruk pablei salih di Cuba, nyu trun daok takik kayua gaok kan kandah meng lệnh cấm vận di Mỹ. Meng dom siam lagaih nan, dom doanh nghiệp Canada meda patagok bruk ngak mbang gah DL cuba, urak ini jeng daok di tanut ala 100 triệu USD./.