1 # Tal thun 2020, huyện A Lưới, tỉnh Thừa Thiên - Huế kham merat ngak ka taong abih dom xã hu sang ilamo meng kan pambuak haong hiện đại. Dalam nan, 3 xã hu ralo bhap bani bangsa Tà Ôi, Pa Cô saong Cơ Tu meda pataomtame khik ramik ilamo meng kan; taong abih dom xã bangsa takik khik ramik saong patagok bruk padang ngak sang kabo meng kan.

2/ Dalam thun bac 2015 – 2016, huyện bhum ceik Trà Bồng, tỉnh Quảng Ngãi hu buh tame labaih 11 tỷ đồng piah padang ngak c sở vật chất, pandap panda duhka bruk pato bac. Tui nan, huyện hu buh jien padang ngak 9 sang bac mẫu giáo di ban sit Trà Xuân hu 5 duk bac saong labik hiệu bộ; padang, ramik pasiam dom duk bac, daning paga, pabah mbang, mblang me-in, sang caik radaih dom sang bac: Trung học cơ sở Trà Phú, Tiểu học Trà Phú, Tiểu học Trà Bình; blei saong peih brei labaih 43.000 baoh siphau saong jaik 11.000 tapuk giáo khoa dom pakat ka anek saih sang sarak karja, sang kan kandah, anek saih bangsa takik.

3 # Pak sang iek ruak Sang bac đại học Tây Nguyên, Kadung jien Daong uranaih tỉnh Đắc Lắc pambuak haong Sang iek ruak hữu nghị Việt Nam - Cu-ba Hà Nội bahrau peih bruk blac raihoh mek jien ka 80 uranaih mbaih camboi, hở hàm ếch. Dalam nan, ralo meng lac anek kamuan urang bangsa takik hu rai diuk kan kandah, mai meng dom tỉnh ĐắcLắc, Đắc Nông, Gia Lai, Kon Tum, Phú Yên saong Khánh Hòa. Dom adei hu kapul nyaom y, bác sĩ Sang iek ruak hữu nghị Việt Nam - Cu-ba Hà Nội khám sàng lọc saong blac raih oh mek jien. Danak dak blac raih piah klah rabha dom kan kandah, daong ka dom adei hu tự tin, samar ba drei tame cộng đồng, yam tagok dalam rai diuk.

4/ Ngak tui chỉ thị 68 di mban chấp hành TƯ đảng saong chỉ thị 11 di tỉnh ủy Trà Vinh ka bruk “salih barau bhum bhap bini Khmer”, abih di nyu nan lac pataom tame langyah bruk taneh riya ka dom baoh sang urang nông kan kathaot, piah rik daong patruh eik patrun kathaot saong ba bruk ngak di puk palei. Dalam dom thun tapa, kapul urang nông tỉnh Trà Vinh peih ngak hu siam bruk ini. Meng nan, rilo sang hu daong tani tanat rai diuk, sahanang hatai ngak mbang saong kham merat tabiak truh kan kathaot.

5 # Thun halei jeng yau nan, dahlau di tuk yamtame bilan tak tabau, kadha bo urang nong huac di abih nan lac yaom kaom. Min bilan tabau 2015-2016 ini, klau sang mac saradang di tỉnh Hậu Giang ba tabiak yaom blei tabau biak glaong, khik ka urang nong hu laba. Bruk tabau oh hu thei mai blei meda oh daok, kayua mblang taneh saong sản lượng trun, dom sang mac saradang daok kuhria kurang tabau piah ngak saradang.

6/ Huyện đoàn, Jabat bangsa saong Jabat lao động – thương binh saong XH huyện Thống Nhất, tỉnh Đồng Nai pambuak bruk barau peih harei pataom uraniah bangsa huyện mbang ka IV – 2015. Pataom mbaok tame, 500 uraniah bangsa dalam huyện hu me-in dom kadha yau: dui brak, tuh ia tame klaok, gu takhaoh jum pataom… Langiu di nan, huyện đoàn daok pambuak bruk saong kapul cơ sở sang iek ruak nhi đồng Đồng Nai peih bruk iek ruak, brei jru saoh ka 98 adei uraniah, alih hadiah 3.400 baoh siphau, 145 baoh katap, 30 paok jien bac, kuhria tabiak yaom jien labaih 38 triệu đồng.

7 # Dom hãng pablei salih gas pak bal raya Hồ Chí Minh brei thau, trun yaom pablei 1.000 đồng sa kg meng harei 1/9. Tapa nan, yaom pablei lẻ dom bình gas 12kg di Thủ Đức gas, Saigon Petro gas meda trun 12.000 đồng sa bình. Tui nan, yaom pablei lẻ glaong di abih dom bình gas tal tangin urang blei pandar di bal raya Hồ Chí Minh meng 265.000 tal270.000 đồng sa bình 12kg.

8/ Di Prang hu sa klup kapul dom urang takre VOV – rayo sap ndom VN hu angan lac klup kapul dom ayut di Radio Perche, hu jabat di Perche atah di Paris jaik 200 km, ngan saong dom urang dalam kalup kapul daok di rilo labik dalam taneh ia Prang. Klup kapul dom ayut di Radio Perche tabiak rai meng thun 1983, tal urak ini hu 32 thun, pataom hu yaok pluh urang daok di rilo labik dlam taneh ia Prang hu hatai takre rayo papar sap. Saong dom danak dak angaok rayo sap ndom VN daok  angan takre biak rilo i dom urang dalam kalup kapul./.