1/ Di Jabat Trung ương Đảng di ban ine Hà Nội, nyaom biai mbang ka 10, Ban Chấp hành Trung ương Đảng mbang XI bahrau hu peih tabiak. Tổng Bí thư Nguyễn Phú Trọng pan akaok nyom biai song hu kadha ndom puac peih mbaok mbang nyaom. Tổng Bí thư lac; Nyaom biai mbang ni hu makna biak prong ngan song bruk pan akaok ba jalan ngak siam dom bruk ngak di thun 2015 jang yau dalam nhiệm kỳ song peih ngak siam nyaom roya đảng bộ dom pakat, yam tal nyaom roya pakat negar mbang ka 12 di Đảng.

2/ Harei 5/1, dự thảo bộ luật dân sự (pasiam veik) hu ba tabiak mek panuac di bhap bini. Bruk pasiam veik, pabak bộ luật dân sự nan lac piah padang bộ luật ini jeng hukum di dom hukum, ramik veik jaik abih dom talei pambuak bruk xã hội hu padang tagok tui jalan tự do, halan hatian, samu gauk saong eng drei taduan trách nhiệm di dom gah hu mbaok tame. 

3/ Thủ tướng rajaei bahrau mbaoh tangin tame harak công nhận đô thị du lịch tasik  Cửa Lò, tỉnh Nghệ An. Ban sit Cửa Lò hu rilo janih pachreih urang du lịch, abih di nyuu nan lac takai tasik Cửa Lò, palao Lan Châu, palao Ngư song rilo labik kiến trúc hu yaom sajarah dak rai ilamu. Hạ tầng đô thị ban sit Cửa Lò hu sangka padang ngak song daok hu ngak pasiam jang tuk hu pok brei  angan lac đô thị loại 3 thun 2009.

4/ Kapul kinh tế - QP 92, quân khu 4 barau brei 34 drei limo pajaih lai sin ka dom baoh sang urang bangsa takik kan kathaot daok di 4 xã: Hương Lâm, A Ðớt, Ðông Sơn saong Hương Phong  daok dalam bhum dự án kinh tế - QP A So, huyện A Lưới, tỉnh  Thừa Thiên - Huế. Dom baoh sang tame dự án brei ngak var raong kreik saong hu tacei pato ilamu, jalan iek glang, hu daong pandap mbang, jru thú y. Ini lac danak dak daong ka dom baoh sang bhap bini kan kathaot yam tagok patruh eik patrun kathaot, rik daong tani tanat saong paglaong rai diuk.

5/ Di ban sit Nha Trang, mintri ilamu thể thao song du lịch pambuak bruk song UB bhap bini tỉnh Khánh Hòa bahrau peih nyaom biai ilamu pakat dunya ka bruk khik caga song patagok yaom glaong ilamu palao tasik VN. 60 tham luận, dalam nan hu 13 tham luận di dom urang roh duah negar langiu hu pataom tame dom kadha yau, dom bruk lý thuyết, jalan roh duah ilamu palao tasik, bruk đa dạng di ilamu palao tasik di VN song di dunya.

6/ Sở lao động – thương binh saong xã hội tỉnh Đồng Nai brei thau, urak ini dalam tỉnh tok daok jaik 2 ribau baoh sang bangsa takik daok dalam anagn sang kan kathaot saong tui kuhria baoh sang kan kathaot ini meda tabiak truh kan kathaot dalam thun 2015. Tui ong Lâm Duy Tín, phaok giám đốc sở lao động – thương binh saong xã hội tỉnh Đồng Nai, dom baoh sang kan kathaot tui tanut chuẩn lac urang bangsa takik meda trun samar jang dalam tukvak anak tal kayua hu daong bac bruk ngak, daong meng sơ cấp tal đại học.

7/ UB bhap bini huyện Trà Cú, tỉnh Trà Vinh bahrau hu harak công văn brei tanut ka bruk jak ba “Tết ka urang kan kathaot song urang njauk jru klik kuac” xuân Ất Mùi thun 2015. Tui nan, dom xã ban sit meda rik dong meng 100 tal 200 pok pandap tết, dom mban ngành huyện hu rik dong meng 1 tal 3 pok pandap. Ni lac bruk ngak siam, brei mboh hatai “ anit ranam gauk, hala siam pacang hala tahak” di urang jakar, công chức, viên chức dalam huyện brei ka dom boh sang kan kathaot, urang njauk jru klik kuac dalam tuk tết thun anek sak pabe 2015.

Patui di ini dom khau tin dunya:

8/ Tổng thống Vênêxuêla Ni-cô-lát Ma-đu-rô hu tagok jalan nao rivang TQ, pataom tame bruk daong ka nền kinh tế Vênêxuêla dang anak bruk mbuan pacah sraiy. Dalam mbang nao rivang negar langiu dui atah sa adit, ong Ma-đu-rô jeng hu nao tal dom taneh ia thành viên dalam kapul dom taneh ia pablei menyek tabiak negar langiu piah padang sa chiến lược piah patagok veik yaom menyek daok ngak kan kandah khang tal bruk jien padai di Vênêxuêla.        

9/ Sa pasak prong tacei pato bruk roh duah y tế song pren yava di Nhật Bản hu peih tabiak ngak bruk di bilan 4 thun ni. Jabat roh duah song patagok Y tế Nhật bản hu padang  tagok dreih yau Viện roh duah Y tế negar Mỹ. Jabat ni hu bruk khik ramik, parabha phun jien di rajaei dalam dom dự án roh duah ka công nghệ y tế, oh caik ka dom mintri, ban, ngành gam khik ramik yau dahlau deih. Jabat ni hu trách nhiệm khik ramik 9 dự án pagam tal bruk iek ruak ung thư, jru pasiam tế bào song ngak tabiak jru.

10/ Urang brei panuac di mintri menyek Irac, ong Gi-hát brei thau, menyek pablei tabiak negar langiu di taneh ia ini dalam bilan 12 hu glaong di abih dalam rilo thun tapa; min kein laba meng menyek hu takik kayua yaom menyek daok trun./.