1/ Harei 5/12, mbang nyaom ka 11, Hội đồng bhap bini  Hà Nội mbang 14 hu tamat bloh. Brei panuac tamat mbang nyaom, Akaok Hội đồng bhap bini  Hà Nội  Ngô Thị Doãn Thanh tong yaom glong dom hatai sahneng, dom panuac ginum biai dalam mbang nyaom di dom urang hội đồng bhap bini. Taphia di nan hu panuac lac, hadei di mbang nyom, UB bhap bini ban HN brei patom tame ngak dom bruk, dom jalan ngak bo Hội đồng bhap bini ban HN hu ba tabiak piah meng akaok thun 2015, peih ngak hu siam dom sarak hu brei tapa.

2/ Di ban sit đà Nẵng, Bộ Tư lệnh Quân khu 5 barau peih var taom gaok jaik 300 urang lambaok dom rai rah “Bộ đội cụ hồ”, Anh hùng taphon nyaom bol pan phao kraong bhap bini, urang jakar pakat glaong bol bala padeih hưu di ban sit Đà Nẵng, tỉnh Quảng Nam, Quảng Ngãi, Bình Định, Gia Lai saong Kon Tum. Di var taom mbaok, thường vụ Đảng ủy, Bộ Tư lệnh Quân khu 5  hu khan brei thau bruk patagok kinh tế xã hội, dom bruk thời sự di labik quân khu 5; taphia di nan caik hatai tui pang dom caong khin, dom panuac rik daong, dom ilamu di dom tướng lĩnh, urang jakar bol bala ka bruk pakhang QP, an ninh dalam dak padang saong khik caga taneh ia palei negar. 

          3/ Di ban sit Quy Nhơn, Kapul kaya ikan tỉnh Bình Định pambuak bruk song kadung jien dong ka urang tong ikan tỉnh bahrau peih bruk jao pok jien dong ka dom urang tong ikan gaok kan kandah song hu kapan tong ikan di tasik atah gaok bala di angaok tasik thun 2014. Dalam mbang dong ni, hu 16 boh sang tong ikan hu kapan njauk bala di angaok tasik hu Kapul kaya ikan tỉnh BĐ dong 150 triệu đồng meng “danak dak kayua palao tasik anit ranam” di mintri ilamu Thể thao song Du lịch, yaom dong glong di abih lac 20 triệu đồng ka sa boh sang.

4/ Sở y tế Cầ Tho barau peih nyaom pakacah pathau khan “urang VN dahlau di abih njauk pandar jru VN”. Tapa nyaom pakacah pathau khan nan, gah ye tế Cần Thơ caong khin rik daong dalam bruk salih barau akaok saneng, bruk randap pandar jru di bhap bini. Taphia di nan, paglaong akaok saneng, bruk hu thau di urang jakar, urang ngak gah y tế ka jru ngak tabiak dalam taneh ia.

5/ Tui rayo papar sap papar binguk tỉnh Bình Dương (BTV), 100 tập phim ký sự papar binguk ka bhum tasik, yaok tập atah 15 minite hu peih tabiak meng harei 15/12. Dom tập phim brei mboh hatai khang di dom urang jakar, urang lin di palao atah, dom urang tong ikan khang hatai luac harei melam di angaok tasik song dom bhum taneh sajarah dak rai. Dom cảnh phim ký sự hu quay di 28 tỉnh, ban hu tasik, palao yau Hoàng Sa, Trường Sa; palao Phú Quý, Lý Sơn.

6/ Phòng Lao động, Thương binh saong Xã hội huyện Gò Dầu, tỉnh Tây Ninh pambuak bruk saongpasak Giáo dục thường xuyên huyện peih bruk tamat tal pato pala bimao ka urang ngak palei pala di xã Cẩm Giang. Hadei di labaih 20 harei bac bruk ngak, dom urang ngak hu gru pato pasak Giáo dục thường xuyên huyện Gò Dầu tacei pato  tapak dom  jalan ngak saong ilamu pala bimao. Tapa nan, dom urang bac jeng hu thau dom ilamu pala bimao saong taong abih urang ngak mek hu chứng chỉ bac tamat tal bac.  

7/ Dalam nyaom biai Ung thư mbang ka 17 rah tabiak di ban raya Hồ Chí Minh, Sang iek ruak Ung bướu ban raya Hồ Chí Minh hu brei thau ka 5 janih ung thư dang akaok di ban raya HCM. Tui kuhria mboh di sang eik ruak Ung bướu ban raya Hồ Chí Minh, dalam 5 thun meng thun 2008 tal 2012, ban raya HCM hu, 34.581 urang bahrau njauk ruak. Gah likei, 5 janih ung thư hu mboh rilo nan lac phổi, gan, đại trực tràng, dạ dày, vòm hầu. Dok gah urang kamei rilo meng lac ruak ung thư tasau,  cổ tử cung, đại trực tràng, phổi song tuyến giáp. Meng panuac khan ni sang iek ruak Ung bướu ban raya Hồ Chí Minh hu panuac caong ban raya caik hatai jang tal bruk pacang caga jnuk pakao piah patrun dom ruak ung thư kayua pakao hala.

Patui di ini dom khau tin dunya:

8/ Thủ tướng Thái Lan Pra-dút barau hu panuac lac, TL brei jhul pakhang bruk patagok kinh tế “kỹ thuật số” kayua kein laba di taneh ia ini dalam yaok gah. Brei panuac di nyaom ginum meyai ngan saong kadha “kinh tế kỹ thuật số salih barau mbaok meta di TL” peih tabiak di ban ine Băng-cốc harei 4/12, Thủ tướng Thái Lan Pra-dút ndom lac, bruk patagok khang “kinh tế kỹ thuật số” hu rik daong jhul pakhang dom gah kinh tế karei patagok tui.

9/ Labaih 2 ribau tuai damuai dok gar di dom pambah lamnge di Manila, gah kreik negar Phi-líp-pin song palao Min-đa-nao di gah merong negar ni hadei di tuk gah khik iek tasik pacang dom bruk nao mai meng jalan tasik, kayua mboh lac ribuk pakat 5 mede tuh tame dom labik nan. Gah dự báo thời tiết di Phi-líp-pin brei thau, ribuk Ha-gu-pít dok di Thái Bình Dương, atah di Phi-líp-pin labaih 500km gah Đông Nam. Tui kuhria ribuk meda tuh tame tỉnh Đông Xa-ma di harei page, ba tui hajan khang song riyah glong meng 3 tal 4 mét.

10/ Akaok mintri Thống nhất Hàn Quốc Ri-ô Kin Chê hu mbang nao rivang saong ngak bruk di Mỹ meng harei 8 tal harei 14/12 piah ginum meyai ka sarak di HQ ka CHDC bhap bini TT jeng yau talei pambuak bruk di duah gah Triều Tiên./.