1 # Dalam mbang rivang Hoa Kỳ, akaok Quốc hội saong Kapul urang lambaok pakat glaong Quốc hội negar drei hu nao rivang saong ndom biai haong urang jakar, urang ngak dalam Đại sứ quán Việt Nam daok pak Hoa Kỳ. Akaok Quốc hội Nguyễn Sinh Hùng pok meyaom dom kham merat di urang jakar, urang ngak dalam Đại sứ quán, jang yau dom jabat Việt Nam daok pak Hoa Kỳ, Akaok Quốc hội caong khin kapul nyaom urang jakar, urang ngak Việt Nam daok pak Hoa Kỳ patui veik kham merat ngak siam bruk ngoại giao bo Đảng saong karja jao brei; patui veik jhul pakhang, ngak ka pasiam jang talei rohim pambuak bruk nao mai di Việt Nam - Hoa Kỳ, oh padeih pabak ka talei rohim di bhap bani dua negar.

2/ Mesup harei 7/9, di cung ilamu hữu nghị Việt Xô, HN, rayo sap ndom VN (VOV) peih bruk pahadar 70 thun padang tabiak (7/9/1945-7/9/2015) saong taduan mek Huân chương độc lập hạng I mbang ka dua. 70 thun tapa, rayo sap ndom VN tuk halei jeng lac jalan brei thau di đảng, rajei, sap ndom di bangsa, sap ndom di bhap bini, lac ayut sahabat di aurang pang rayo dalam taneh ia saong ayut dunya. Ong Nguyễn Đăng Tiến – Tổng Giám đốc rayo sap ndom VN brei thau: Harei ini dalam bruk salih barau di taneh ia, rayo sap ndom VN brei yam tagok, brei gam gam salih barau bruk ngak nan lac padang rayo sap ndom VN jeng tổ hợp đa phương tiện, tiên tiến, barau. Salih barau dom asar kadha, salih barau jalan papar sap, pataom ginup 4 janih báo chí piah ba thông tin samar, njauk, tapak, chreih chrai tal yaok urang dalam saong langiu negar.

3 # Dalam thun 2015, dự án ba điện ka bhap bani dom bangsa takik tỉnh Sơn La daok hu peih ngak, ngan haong jaik 5.400 baoh sang dalam 72 palei. Tỉnh kham merat tal abih thun ini sang hu pandar điện dalam tỉnh hu jaik 87%. Piah pabak điện ka bhum palei pala tui jalan ngak lac tal thun 2020, dom sang hu pandar điện, tỉnh Sơn La njauk patui veik buh jien tame ngak ka 507 palei oh ka hu điện, gam haong 27 ribau baoh sang. Yau nan min, dom baoh sang daok veik jeng daok pak dom labik kan kandah, caong khin hu phun jien buh tame ngak ralo.

4/ Kuhria tal tukvak ini, tỉnh Bình Định hu jaik 350 urang njom ruak pandiak tabiak drah, ralo jang jaik dua mbang duk saong thun bloh, ralo abih nan lac ban Quy Nhơn, meblah jaik meteh dom urang ruak. Ong Bùi Ngọc Lân, giám đốc pasak y tế dự phòng tỉnh Bình Định brei thau: “urak ini daok tame dom bilan puac thun, tỉnh daok peih dom jalan pacang cakak. Ka sa nan lac patagok bruk pasang iek, duah thau chip saong langyah abih sruh jit. Ka dua lac patagok bruk tacei pato bhap bini peih ngak dom jalan pacang cakak yau pametai bọ gậy, vệ sinh. Ka 3 brei peih mbang 2 di bruk pametai bọ gậy saong pruh jru pametai jamuak”.

5 # Ủy ban Mặt trận negar Việt Nam tỉnh Đắc Lắc bahrau peih Nyaom biai mek panuac ka Dự thảo Bộ luật Hình sự (pasiam veik). Pak nyaom biai, ralo panuac lac njauk sahneng kuhria bruk patrun patakik bruk caik guk, peih prong bruk phạt jien saong hình phạt oh cap khik njauk tantu, cambaih laih,  plaih bruk lợi dụng sarak sarak nhân đạo di hukum negar piah plaih njauk guk. Daok bruk klaak dom hình phạt tử hình mek hu ralo panuac njauk hatai haong gauk, patrun bruk tử hình ngan haong 7 tội danh dalam 22 tội danh njauk tử hình..

6/ Thun 2015, Cà Mau sangka paglaong bruk pato bruk ngak, sangka rilo tal thực hành jang lý thuyết saong paglaong chất lượng pato bruk ngak. Daok gah chất lượng pato megru, tỉnh Cà Mau palih dom gah hu pren khang di puk palei nan lac kaya ikan – ngak nông – ngak glai piah pato dahlau, nyaik pato tràn lan. Taphia di nan, tỉnh daok iek praong bruk pato bruk ngak pambuak saong ba bruk ngak ka urang ngak. Thun 2015, tỉnh Cà Mau kham merat pato bruk ngak ka meng 30.000 tal 32.000 urang ngak.

7 # Tui kuhria di kapul padang ngak đề án bồi thường, daong ba, rami ramik labik daok di dự án mblang kapal haok pakat dunya Long Thành, tỉnh Đồng Nai, yaom jien bồi thường, daong brei taneh di dự án meda tagok tal jaik 7.540 tỷ đồng. Ini lac yaom jien prong di abih dalam taong abih pok jien peih bruk bồi thường, daong ba di dự án ka bhap bani. Patui di nan lac jien pandar ka dom sarak daong ba labaih 2.140 tỷ đồng; jien bồi thường sang, pandap kiến trúc labaih 1 ribau tỷ đồng; jien thường phun pala jaik 655 tỷ đồng. Hu thau, taong abih jien ka dom bruk labaih 13.100 tỷ đồng.

Patui di ini dom khau tin dunya:

8/ Meng bloh, Tổng thống Ai Cập Áp-đen Pha-ta An Xi-xi hu nao rivang mban Thư ký ASEAN saong hu mbang taom gaok Tổng Thư ký ASEAN Lê Lương Minh. Di mbang taom gaok, dua gah njauk hatai brei patui duah thau jeng yau pambuak bruk khang kajap jang gac dalam dom gah yau pato megru, DL, khik ramik inem krung ilamu saong an ninh, dalam nan hu bruk mesruh pacang chủ nghĩa khủng bố saong taong paoh. Langiu di nan, ASEAN saong Ai Cập brei jhul pakhang dom bruk taom gaok, patagok bruk thau gauk jang tapa jalan pablei salih saong pambuak talei rihim menuac saong menuac.

9 # Thủ tướng Australia Tony Abbott (Tô-ni Áp-bót) brei tahu Raja-ei Australia meda patagok bruk taduan raok urang tị nạn meng Syria. Ong khan lac: “Khaol dahalak daok pasang iek, taduan raok ralo urang jang meng Syria, jang yau patagok bruk daong ka urang tỵ nạn Syria daok daok dalam dom trại tỵ nạn pak dom negar jaik taphia yau sa binah dalam panuac sanya suai lavik di Australia haong Cao ủy Liên hợp quốc ka urang tị nạn (UNHCR)”.

 10/ Mintri pablei salih, công nghiệp saong năng lượng HQ barau brei thau bruk pablei tabiak negar langiu ô tô di taneh ia ini dalam bilan 8 thun 2015 nyu  patrun kayua yaom hối đoái oh siam saong bruk kinh tế yau dang veik di dom darak barau tagok. Dalam bilan 8, HQ pablei tabiak negar langiu hu 181.915 radaih, trun jaik 1%  duk saong thun bloh saong trun jaik 3% duk saong 258.781 radaih di bilan 7. Jien mek tame gah pablei tabiak negar langiu ô tô di HQ dalam bilan 8 nan lac jaik 3 tỷ USD, biar jang sa thun dahlau  9%./.