1# Huyện bhum ceik Sơn Tây, tỉnh Quảng Ngãi barau jao 132 paok pandap alin ka urang jaoh jo dalam huyen. Dom paok pandap hu yaom jien abih tih labaih 33 triệu đồng. Dom paok pandap ini yaom lac sit min hu daong ka urang jaoh jo dalam huyen hu rilo bui sambai, yam tagok dalam raidiuk, bac megru saong mbeik drei tame bhapbini.

2/ Yaok pluh ribau baoh sang daok di tỉnh BT daok kurang ia pandar yaok harei. Makna kayua tukvak tapa pandiak bhang dui atah, dom sang mac ia oh ginup ia  tamo piah ngak tabiak ia hacih pabak ka bhap bini.

3# Uỷ ban bhapbini tỉnh Đắc Lắc barau peih nyaom biai  brei thau dom hukum barau patabiak hu Quốc hội mbang 13 brei tapa dalam mbang nyaom ka 8 di puac thun 2014. Piah ka bruk peih ngak hukum hu siam lagaih,  tỉnh Đắc Lắc hu khan brei thau cambaih dom hukum barau tal urang dang akaok dom sở, mban nganh kapul, nyaom, urang pan akaok dom huyen, ban sit…dalam nan njauk caik hatai tal Hukum Hộ tịch, Hukum Căn cước công dân saong Hukum Bảo hiểm xã hội. 

4/ Bộ chỉ huy quân sự tỉnh Đắc Nông saong kapul ngak bruk di tiểu khu quân sự tỉnh Mun-đun-ki-ri (taneh ia Cam-pu-chia) barau peih nyaom meyai saong mboh tangin sanya pambuak bruk taong abih gah. Tukvak tapa, dua tỉnh Đắc Nông saong Mun- đun-ki-ri  hu khik kajap saong ngak siam bruk biên giới saong dom thỏa thuận dua gah di rajaei dua taneh ia. Dua gah hu samar langyah yaok bruk oh brei rah tabiak di taphia negar, khik kajap an ninh QP bhum taphia negar.

5# Di labik Công nghiệp An Nghiệp, xã An Hiệp, huyện Châu Thành, Liên đoàn Lao động tỉnh Sóc Trăng pambuak bruk saong Sở, Ngành pambuak tal barau peih var patabiak bruk “ bilan urang ngak” thun 2015. “Bilan urang ngak” thun ini Liên đoàn Lao động tỉnh Sóc Trăng hu tabiak panuac ieu taong abih urang doan, urang ngak, dom pakat công đoàn dalam tỉnh pambuak bruk saong karja, labik, doanh nghiep paglaong trach nhiem, tui jalan jhul khang bruk pakacah, san xuat, rik daong saong Dang bo, bhapbini dalam tinh peih ngak siam bruk patagok kinh te – xa hoi

6/ Kayua langik pandiak dui atah, urak ini ralo bein durieng di huyện Cẩm Mỹ, tỉnh ĐN mbuan patrun năng suất saong tukvak paik baoh jeng suai jang sa bilan duk saong thun dahlau. Urak ini, ralo baoh durieng angaok phun daok meda, hu dom phun daok tabiak bingu, tok hu takik baoh durieng bahrau taha. Urang kuhria mboh lac, khat lahik meda meng 30 tal 40% duk saong thu dahlau.

7# Meng tuk bruk daong brei di dom kapul nyaom taneh ia langiu njauk cakak trun khang, dom labik iek ruak ka dom urang njaom HIV di ban raya Hồ Chí Minh laik tame kan kandah kayua kurang menuac ngak bruk. Di Khoa Tham vấn saong daong bhapbini di pasak Y tế dự phòng Quận 8, yaok pagaiy, dom urang y tế njauk ngak bruk abih công suất. Di labik menyum methadone iek ruak nghiện ma túy saong labik likau jru  ARV iek ruak HIV, yaok harei jeng hu jaik 100 urang dak gauk cang taduan mek jru. Bác sĩ Phạm Thanh Hiếu, akaok khoa Tham vấn saong daong bhapbini, pasak Y tế dự phòng Quận 8 brei thau : “Jeng hu jalan ngak lac urang ruak di labik halei njauk nao labik nan, min di quan 8 lac drei oh ngak khang kateik greik urang njauk nao puk palei di nyu. Meyah kateik greik urang rilo, urang meda klak iek ruak nan ye quan 8 taduan raok veik. Kayua labik ini hu rilo chúc nang yau nan ye kol dahlak njauk quá tải”

Patui di ini dom khau tin dunya:

8/ Dom pabah lamnge di Cuba daok caga taduan dom kapal thương mại di Mỹ tal Cuba mbang akaok meti hadei di labaih meteh abhap tapa. Bruk nan rah tabiak dalam dua harei hadei di tuk karja Mỹ harei 5/5 brei klaak lệnh cấm dom dịch vụ kapal thương mại nao tal Cuba. Menuac urang di Cuba saong Mỹ hu pok meyaom bruk nan, iek ini lac sa jalan nao piah jhul pakhang bruk pambuak talei rohim di Mỹ saong Cuba.

9# Dom sruh radaih juak thong minh saong siam kag alam moi truong jeng kadha praong pachreih dom meta maong dalam mblang darak radaih juak pakat dunya mbang yaka 25 barau peih tabiak di Thượng Hải, Trung Quốc. Dom pandap ngan saong dom công nghệ bahrau di abih, siam di abih hu 1 rabau 300 labik ngak meng 30 taneh ia saong bhum lãnh thổ di dunya ba mai nyom darak. Bruk ini hu peih tabiak piah yaih khan ka labik dang di radaih juak, camereip tok lac sa pandap piah nao mai, urak ini jeng biểu tượng ka bruk diukrai “ hijao” ngan saong lượng khí thải carbon bair. 

10/ Tui kuhria mboh di gah y tế dunya, di ralo taneh ia, urang praong labaih kilo, limek  meda hu labaih 50% di thun 2030. Cambaih laih nan lac, di Ailen,  urang praong labaih kilo, limek hu tal 89%, di  Hi Lạp nan lac 77% di thun 2030./.