# Piah caga pacang dom kan kandah meng ribuk Hagupít, akaok mintri ngak nông saong patagok palei pala Cao Đức Phát, akaok mban pacang cakak ribuk ia sua TƯ daok tacei pato bruk pacang cakak ribuk, hajan ia sua di dom tỉnh meng Khánh Hòa tal Ninh Thuận. Urak ini, 3 kapul ngak bruk di mintri jeng daok patui pambuak bruk saong dom puk palei peih bruk pacang cakak ribuk, hajan ia sua.

 # Ngin li-an tuh tame dalam Lào Cai ngak brei hajan sit di dom labik. Bhum ceik hu labik hu hajan sraiy saong ia kakua kapan, nan ye dalam tỉnh daok li-an khang di dom labik yau: ban sit Lào Cai li-an 15,7 độ C; Phố Ràng (Bảo Yên) li-an 14,3 độ C; bhum ceik Bắc Hà li-an 10,7 độ C. Abih di nyu nan lac di ban sit Sa Pa trun tal 6,7 độ C.

# Thun ini, bộ tư lệnh bhum 3 hải quân hu meng 40 tal 50 mbang kapal, kho, blai mek hu angan “khik siam, pandar khang kajap”. Đảng ủy bhum bhian tacei pato dom đơn vị ngak siam bruk jak ba bhap bini, peih ngak hu kein lagaih bruk pakacah “bol bala ba pren tame padang ngak palei pala barau” di ban sit Đà Nẵng saong tỉnh Quảng Bình.

# Ong Bùi Tấn Dũng, Phó akaok Ủy ban bhap bini huyện An Lão, tỉnh Bình Định brei thau: Kayua lingik tasik dalam dom harei tapa dalam huyện hu hajan nan ye nyu ngak jaleih ceik di labik jalan atah jaik 1km (meng km 1+500 tal km 3+500 jaln pambuak dom xã ngan saong yaok ribau m3 haluk, patau. Bruk glut jaleih ngak gar jalan di rilo labik di jalan ini, abih di nyu nan lac, nyu ngak ka 35 boh sang gam saong 100 urang di palei 3 xã An Nghĩa, huyện An Lão oh nao mai hu.

# UBMT negar VN huyện Thuận Bắc, tỉnh Ninh Thuận barau alin hadaih sang jum pataom ka amuk Nguyễn Thị Thủy daok di palei Mỹ Nhơn, xã Bắc Phong. Sang praong 30m2, ngak abih 40 triệu đồng. Dalam nan “kadung jien ka urang kan kathaot” huyện hu daong 20 triệu đồng, daok veik hadom kayua baoh sang, gauk gar rik daong. Hu sang daok tani tanat daong ka baoh sang amuk Thủy yam tagok patruh kan kathaot khang kajap.

# Đại học quốc gia ban raya Hồ Chí Minh bahrau peih ginum biai taong yaom 5 thun peih ngak mô hình pato megru khung, pambak tame  chuẩn đầu ra (ieu katut lac CDIO). Mai pataom mbaok dalam ginum biai hu lambaok dom mintri, dom ngành pambuak tal saong labaih 200 urang di labaih 30 labik pato megru đại học dalam taneh ia.

Patui di ini dom khau tin dunya:

# Gah nông lương LHQ (ieu lac FAO) barau patabiak panuac cảnh báo ka bruk an ninh lương thực dunya dak harei dak jhak nao. Harak pathau kan barau di abih ka triển vọng yuak kuak bilan mùa saong bruk lương thực  bo gah nông lương LHQ patabiak barau ini brei mboh, bất ổn an ninh lương thực daok đe dọa tal 38 taneh ia angaok dunya, dalam nan hu 29 taneh ia di châu Phi, yaom lac thun ini tui kuhria ngak hu biak rilo, labaih 2,5 triệu tấn ngũ cốc.

# Takik di abih 50 urang metai di Xô-ma-li hadei di tuk menyum ia njom jru mek meng sa bingun di gah barak ban ine Mô-ga-đi-su. Hãng tin CNN di Mỹ ba panuac ong Ốt-xman Mô-ha-mét, sa urang ngak praong di huyện Y-át-sít (Yaqshid) brei thau, taong abih dom urang bahrau metai nan jeng kayua menyum ia meng sa binguk bahrau raok. Abih tih hu labaih 150 urang njauk tame sang iek ruak kayua menyum ia bingun ini.

# LHQ brei thau, urang metai kayua Ê-bô-la tagok tal 6.388 urang dalam abih tih 17.942 urang njom ruak. Tui LHQ, dom urang metai barau jeng rah tabiak di 3 taneh ia Xi-ê-ra  Lê-ôn, Ghi-nê saong Li-bê-ri-a./.