1/ Mintri ngak nong song patagok palei pala hu panuac takei akaok UB bhap bini dom tỉnh, ban di TƯ hu ar pacang krong ribong brei patom tame tacei ba ngak ka nyu salah bruk pasiam ar pacang saong dom kadha daok ngak hu pagam tal ar pacang. Tacei ba, peih pasram ngak iek bruk pasiam ar, pasang iek bruk kuhria caga pandap panda, menuac ngak, jamriak kỹ thuật song caga pasiam ar tuk hu ribuk, ia sua, abih di nyu nan lac bruk pacang ia nduac tapa ar. Anak bruk ia sua thun 2014, dom puk palei brei samar ngak pasiam bruk khik caga siam merke ka ar, pato pasram ka dom menuac hu mbaok khik caga ar, abih di nyu nan lac kapul urang lin hu mbaok pak labik nan, brei ngak salah bloh dahlau di harei 30/5 thun ni.

2/ Tal tukvak ini abih tih phun jien ieu pataom brei ka bruk padang ngak palei pala barau di tỉnh Kon Tum hu labaih 855 tỉ đồng, dalam nan hu jaik 16 tỷ 300 triệu đồnng kayua bhap bini rik daong. Urak ini, taong abih 86 xã dalam tỉnh Kon Tum hu jalan ô tô nao tal pasak (80 xã hu jalan ô tô nao mai hu dalam bilan hajan saong pandiak); 568/671 palei hu jalan ô tô nao tal pasak (samu 84,6%); 86/86 xã hu điện negar mai tal puk palei.

3/ Di xã bhum 3 Vụ Bổn, huyện Krông Pách, Sở Y tế tỉnh Đắc Lắc hu peih bruk brei menuac nao pathau khan pablah haong bruk iek glang pren yava ka urang kamei ndih tapui tui sarak karja thun 2014. Bruk nan thun ni hu peih ngak di 43 xã bhum atah bayah, bhum kan kandah di tỉnh Đắc Lắc meng ni tal abih bilan 7, patom tame dom bruk pathau khan, tacei pato bruk Dân số - KHHGĐ, pabak dom jalan plaih metian bahrau song pacang cagar njom ruak tapa jalan ndih tapui.

4/ Pasak y tế huyện Bác Ái (tinh Ninh Thuận) hu pambuak bruk saong  blai y tế xã Phước Đại brei saoh tamo njom jru ka 560 baoh sang bhap bini bangsa takik daok di xã Phước Đại. Phun jien ka bruk nan kayua dự án kadung jien dunya pacang cakak pandiak dom VN daong. Danak dak pachreih ba bhap bini bangsa takik kak tamo tuk ndih piah patrun patakik ruak pandiak dom.

5/ Dalam 5 thun tapa, hệ thống Mặt trận của thành phố Hồ Chí Minh hu peih ngak jiak 2000 mbang pathau khan song labaih 260.000 hu mbaok. Dom bruk ngak ni, dong paglong akaoa sahaneng, chreih ba bui sambai di bhap bini dalam bruk khik caga chủ quyền palao tasik, pachreih ba ka kadung jien “Kayua Trường Sa anit ranam- kayua jalan nao dahlau di negar” labaih 24 tỷ đồng.

6/ Sở ilamu Thể thao saong Du lịch tỉnh Bạc Liêu daok peih ngak chip bruk kuhria caga ka Festival Đờn ca tài tử pakat negar mbang ka sa thun 2014. Ini lac bruk ilamu nghệ thuật praong piah pok meyaom saong yaih khan ilamu Đờn ca tài tử  Nam Bộ - sa janih ilamu hadah krah di bangsa VN jeng yau bhap bini Nam Bộ. Rah tabiak meng harei 20 tal harei 24/4, Festival Đờn ca tài tử pakat negar mbang ka sa hu 21 tỉnh, ban pataom mbaok tame.

7/ Meng akaok thun tal ni, ban raya HCM hu pa tabiak jiak 7 ribau harak QĐ khik iek urang hadei di tuk klak jru phiel di labik daok. Labaih 2.200 urang duah hu bruk ngak, 140 urang hu dong phun jien ngak mbang song yaom jien labaih 1tỷ 300 triệu đồng. Ban raya urak ni hu 167 kalup kapul hu 1000 urang hadei di tuk klak jru phiel hu mbaok tame bruk the duc thể thao, pato megru dom jalan pacang caga, pacang njuk jru phiel veik, ndom nyai nao mai, bui sambai, padang mblang main, dong ka urang hadei di tuk klak jru phien hu raidiuk siam merke. 

Patui di ini dom khau tin dunya:

8/ Hadei di mbang roya “thac ia” meng kan di TL (meng harei 12 tal harei 15/4), UB pacang cakak tham nhũng TL meng ba tabiak panuac kaoh ka bruk thủ tướng tạm quyền Dinh-lắc Xin-na-vắt ngak suan adat hukum atau oh dalam danak dak blei padai brah di urang nông. Nan lac harak khan barau ini di ong Sẳn-sởn, Tổng thư ký Ủy ban pacang cakak tham nhung taneh ia ini. Bruk UB pacang cakak tham nhũng kadul veik tukvak tabiak quyết định ndom angaok nan ngan saong thủ tướng Dinh-lắc nan lac kayua UB ini brei hu tukvak pasang iek pabak tame panuac calei di 3 nhân chứng nan lac dom phaok thủ tướng dalam rajaei tạm quyền TL pambuak tal danak dak blei padai brah. 

9/ UB ka urang tị nạn Liên hợp quốc bahrau brei thau, urang tị nạn Xyri tut angan tame harak likau tị nạn di Li-băng urak ni yam tapa tanut 1 triệu menuac, caik tabiak rilo kan kandah ka Libi. Dalam nan hu labaih 2 triệu 500 ribau urang Xyri nduac klak taneh ia, rilo meng nduac tapa Li-băng, Thổ Nhĩ Kỳ, I-rắc, Ai Cập song dom negar karei karei. Dom jabat dong brei di dunya dok kham merat ngan saong bruk urang tị nạn Xyri. Urak ni LHQ bahrau taduan hu labaih 14% yaom jien piah dong ka urang tị nạn Xyri./.

10/ Kuhria tal urak ini, bol bala Mỹ hu buh tabiak labaih 3 triệu USD ka bruk nao duah kapal haok MH370 di hãng kapal haok Malaysia Airlines lahik meng jaik sa bilan ini mai. Urak ini bol bala Hoa Kỳ daok kuhria patagok jaik dua mbang yaom kadung jien karja tuk camereip nan lac 4 triệu USD hu parabha ka bruk duah sruh kapal haoh lihik ini./.