1#/ Tui Thông tư liên tịch 37 patabiak bilan 10/2015 di Liên mintri Y tế song Mintri jien padai ye meng harei 1/3 anak tal, jiak 1.900 dịch vụ kĩ thuật y tế hu ramik veik yaom, tui nan, brei tagok yaom meng 30 tal 50%. Anak meta bruk tagok yaom tok pandar ka dom urang ruak hu thẻ bảo hiểm y tế.

2# Dalam dua harei 28 saong 29 bilan 3 tal, di ban sit Hội An, tỉnh Quảng Nam rah tabiak Festival ilimo tơ lụa Việt Nam - Châu Á. Ngan saong kadha “ ba tơ lụa tame veik raidiuk barau”, Festival pachreih hu 7 palei menyim gheih mekre di Việt Nam saong dom taneh ia ngak lụa hu angan je dalam bhum ye : Ấn Độ, Nhật Bản, Trung Quốc, Thái Lan,  Lào.  Ông Lê Thái Vũ, akaok Công ty Cổ phần Tơ lụa Quảng Nam brei thau: Palei Lụa Hội An dang tabiak peih  Festival ka luạ Việt Nam saong  Châu Á, hu mbaok di rilo angan je praong saong akaok Hiệp hội Lụa Châu Á, akaok Hiệp hội Lụa di dunya. Lingiu di nan, pataom hu dom palei ngak di Việt Nam saong châu Á mai saong peih nyaom biai ka bruk ngak lụa.

3#/ Di muinyim tỉnh Kon Tum daok rah tabiak bruk me-in, duah thau kadha main meng kan di bhap bini, parang iek lagu laram song bruk ngak thủ công meng kan piah pok meyaom ilamu di bhap bini dom bangsa takik dalam tinh. Dom bruk ngak yau ye: parang me-in Chiêng Tre (bangsa Ba Na); capi T’rưng, Klông Pút (bangsa Sê đăng); bruk ngak lan an, menyim, pak yot …song dom bruk main karei yau nao cà khoeo, ndik gheng trơn, jhul gai.. pachreih hu rilo bhap bini dalam palei, tuai damuai atah jiak song ayhut di dunya . Hoàng Nguyễn Ngọc Linh, anek saih tal bac 7B4, sang bac Trung học cơ sở Lý Tự Trọng, ban sit  Kon Tum brei thau: Adei mboh biak chreih chrai, abih di nyu nan lac dom janih lalat ragam bangsa yau T’rưng atau Ting ning jeng brei mboh ragu ragam karei di gauk, tuk lai tame gauk ye pang mboh biak chreih chrai. Adei sahaneng ini lac sa bruk ngak biak siam, lagaih.

4# Chi cục jalan ia dalam taneh ia gah meraong pambuak bruk saong Cảng vụ jalan ia dalam taneh ia bhum 3 peih mbang tabiak bruk tabung glaong khik caga trật tự an toàn jalan nao mai duh ka rija roya akaok xuân gah meraong thun 2016. Mbang tabiak ngak bruk ini piah patrun meng 5 tal 10% dom bruk, dom urang metai saong bị thương  kayua bala di jalan nao mai duk saong thun dahlau.  Ông Hoàng Văn Hùng, akoak Chi cục jalan ia dalam taneh ia gah meraong brei thau: “Urak ini, biak sangka tal dom libik jhak ye tatua Bình Lợi, ban raya  Hồ Chí Minh,  njauk pasang iek rami ramik jalan ia piah plaih di bala, gar di angaok tatua, abih di nyu nan lac tatua radaih pasiay. Kadha njauk caik hatai sangka tra  nan lac dom  jalan pajeng tuai damuai, yau ye bhum Cần Thơ, dom canah jalan ia duh ka rija roya di  Châu Đốc saong Bến Tre”

5#/ UBMT negar VN tỉnh Bình Thuận bahrua peih nyaom biai Hiệp thương mbang ka sa piah ba menuac tabiak ứng cử piah pilih ruah tame QH mbang 14 song Hội đồng bhap bini tỉnh tuk vak 2016-2021. Tui bruk ba tabiak di Ủy ban Thường vụ Quốc hội, tinh Binh Thuan hu pilih ruah 7 urang ka QH g 14, tapa nan, nyaom biai njauk gauk brei urang tabiak ứng cử takik di abih lac  urang, rilo di abih 15 urang (kuhria gam 3 urang kayua TƯ ba mai). Dalam nan sangka tal bruk urang ứng cử lac urang kamei, urang bangsa Chăm, urang jakar ranaih umo ala 40 thun.

6# Bilan padai đông xuân 2015 - 2016 ban sit Cần Thơ hu labaih 86.700ha; dahlau saong hadei dom harei Tết Bính Thân urak ini hu labaih 73%  mblang  ha,u daok tasak, dalam nan hu 32% padai yuak blaoh di tuk Tết. Yaom lac yuak praong, min di rilo labik dom urang blei saong doanh nghiệp dalam tỉnh jeng oh ka pataom tame jhul pakhang bruk blei padai ka urang nong, ngak ka urang nong di dom puk palei gaok rilo kan kandah dalam bruk pablei padai.

7#/ kayua pandiak bhang, njom mbak dui atah, dalam tỉnh Kiên Giang hu labaih 34 ribau ha padai vụ mùa song đông xuân njauk khat lihik. Anak bruk nan, UB bhap bini tỉnh hu tabiak panuac lac bala meng lingik tasik dalam tinh. Tui nan kadung jien karja brei donglabaih 150 tỷ đồng ka 18 ribau 125 boh sang hu mblang padai njauk hat lihik. Tui kuhria dalam dom harei tal, tỉnh peih brei jien piah dong ka urang nong njauk tuk vak.

Khaw tin dunya

8# Harei 17/2, di sang bac Đại học negar Lào di ban ine Viêng-chăn (Vientiane) rah tabiak harei pataom yaih khan dom ilimo bangsa di dom sinh vien taneh ia langiu daok bac megru di ini. Pataom tame hu rilo dom ayut sinh vien Lào, Việt Nam, Campuchia, Hàn Quốc, Trung Quốc. Harei pataom piah yaih khan dom gheih mekre mengkan di dom taneh ia ye : angui cuk bangsa, pandap mbang mengkan, dom ragam tamia, kadha daoh pok meyaom taneh ia, anek menuac; saong tapa nan, ngak jeng labik taom gaok, klah rabha ilimo saong bac megru gauk di dom ayut sinh viên Lào saong sinh vien dom taneh ia daok bac di sang bac Đại học negar Lào.

 9#/ Tổng Cục vệ sinh dịch tễ di mintri Y tế Mê-hi-cô khan lac, kuhria tal harei 16/2 di negar Bắc Trung Mỹ ni hu 80 urang njom vi-rút Yika, dalam nan hu 6 urang kamei metain. Piah pacang cakak vi rút njom mbak, taphia bruk pathau khan ka janih jamuk pambak ruak song pato pakai urang jakar, Rajaei liên bang song karjai dom bang di Mê-hi-cô hu tacei pato dom gah y tế peih bruk pruh jru di dom labik mbuan si tamuh ruak, dom labik hu rilo menuac song brei ka bhap bini thau chip dom urang njom ruak bharau.

10# Gah Y tế dunya barau brei thau, bruk pacang caga virut Zika meng ini tal bilan 6 brei hu tal 56 triệu đôla Mỹ, dalam nan hu bruk patagok vắcxin, chẩn đoán saong roh duah ka bruk njom mbak di virút Zika. Dalam tukvak ieu rik daong tame kadung jien, gah Y tế dunya hu duah sa quĩ dự phòng chip jaik 2 triệu đôla piah bayan ka dom bruk ngak tuk akaok mereip./.