1 # Melam 22/2, bal Sơn La, tỉnh Sơn La hu peih mbaok Lễ hội Mùa Hoa Ban pak phường Chiềng Cơi, bal Sơn La. Ini jeng lac tukvak piah meyaih khan ka pren khang, langik tasik taneh riya, anek manuac bal Sơn La ngan haong hatai caong khin piah “Bal bingu Ban” jeng labik mai di ralo tuai damuai dalam saong langiu negar. Lễ Hội Mùa hoa ban hu ralo bruk ngak ilamo, padhih ndung bak ilamo bangsa yau: pataom daoh tamia bhap bini; pakacah ngak mbang huak; pakacah mek ikan, pakacah chim Hoạ mi, caoh menuk; pakacah dom môn thể thao bangsa yau nao Cà Kheo, Tó mắc lẹ, katung talei, parah còn.

2/ Di xã Cảnh Dương, Uỷ ban bhap bini huyện Quảng Trạch gam saong Uỷ ban bhap bini xã Cảnh Dương (Quảng Trạch, Quảng Bình) peih ngak lễ cầu ngư, tabiak taong cap kaya ikan akaok thun 2016. Ini lac lễ hội meng kan di urang taong cap ikan bhum tasik Cảnh Dương saong hu peih tabiak di harei rằm bilan sa yaok thun. Lễ cầu ngư langiu bruk caong bilan tasik barau, urang taong cap ikan nao tasik hu siam lagaih, kapal mai hu pabak hadang ikan

3 # Dom thun jaik di ini, pak dom tỉnh gah kreh negar oh hu ribuk aia sua nan ye takuh hu cakrok patagok samar. Vụ Đông Xuân ini, langiu di bruk huac hu jit ruak, kurang aia, urang nong tỉnh Quảng Ngãi daok dang anak bruk anek takuh palai kaik hamu padai. Angaok dom mblang hamu di huyện Đức Phổ, mikva tuan biak ralo hình nộm piah pateok takuh min jeng oh pateok hu. Ong Huỳnh Chí Thanh daok pak xã Phổ Châu, huyện Đức Phổ brei thau: “Ralo, biak ralo. 5, 10 drei, 20 drei hu hamiat. Caik bẫy min oh mek hu. Kaik yau ini, kaik klaih mongyau klak, kaik tal halei klak tal nan”

4/ Kayua langik tasik kan kandah, pandiak bhang dui atah, tỉnh Bạc Liêu hu jaik 20.000 ha hadang raong kurang ia mbak piah sản xuất, ralo di abih nan lac di ban sit Giá Rai, huyện Phước Long saong Hồng Dân. Piah patrun patakik khat lahik saong caga pacang jit ruak, gah ngak nông kakei urang raong hadang oh tathuak ia nerak tabiak mblang hamu, ngak pasiam danao njauk kỹ thuật, oh palao hadang raong barau chip tuk oh ka xử lý môi trường danao raong. Langiu di nan, anek pajaih brei hu pasang iek jit ruak dahlau tuk palao raong. 

5 # Urak ini, urang nong dom huyện gah pai tỉnh Tiền Giang nan lac: Cái Bè, Cai Lậy saong Châu Thành daok tame bilan yuak vụ padai Đông Xuân 2015-2016. Tui urang nong pak ini, kayua langik tasik vụ mùa ini oh siam lagaih, halak halin jit ruak ralo nan ye năng suất padai tok hu 7 tấn/ha, trun jaik meteh tấn sa ha dut haong vụ ini thun dahlau. Yau nan min bruk pablei padai biak mbuan laghaih kayua urang blei mai tal hamu piah blei. Akaok vụ mùa ini, yaom padai that janih thường yaom labaih 4.400 đồng/kg, padai chất lượng glaong jaik 6.000 đồng/kg. Ngan haong yaom pablei yau nan hadei di sa vụ padai, urang nong laba hu labaih 20 triệu đồng sa ha.

6/ Di ban raya HCM, mintri công thương barau họp ginum meyai ka bruk pablei brah tabiak negar langiu thun 2016. Tui harak pathau khan thun 2015, VN pablei tabiak negar langiu hu jaik 6,6 triệu tấn brah, yaom labaih 2,8 tỷ đô la Mỹ. Tui kuhria, brah pablei tabiak negar langiu di VN thun 2016 meda oh lagaih kayua hiện tượng El Nino, bruk njom mbak, merak gauk di dom taneh ia yau:  Thái Lan, Ấn Độ, Pakistan.

7 # Tui Viện Vệ sinh dịch tễ Tây Nguyên, meng akaok thun 2016 tal ini, abih di nyu lac hadei di Tết Nguyên đán Bính Thân, ruak pandiak tabiak darah tamuh khang pak Tây Nguyên. Tal urak ini, dom tỉnh Tây Nguyên hu jaik 900 urang njauk ruak pandiak tabiak darah, tagok labaih 20 mbang dut haong tukvak ini thun dahlau. Dalam nan,  urang njauk ruak rilo di abih lac di tỉnh Gia Lai saong Đắk Lắk.  Tui dom chuyên gia y tế, makna ngak ka ruak pandiak tabiak darah tagok glaong nan lac langik tasik oh siam, nyu lagaih ka jamaok ndung ba ruak pandiak tabiak darah cakrok patagok samar. 

Patui di ini dom khau tin dunya:

8/ Hãng tin Kyodo di NB ba panuac dalam rajaei taneh ia ini brei thau, NB saong TQ daok hu kuhria peih mbang pataom di dom urang ngakpraong gah ngoại giao di puac bilan 2 ini piah ginum meyai ka phản ứng saong Cộng hòa dân chủ bhap bini TT hadei di dom mbang thử hạt nhân di Bình Nhưỡng.

9 # Tổng thống Xyri Ba-xa An Át-xát harei 22/2 tabiak panuac lac mek harei  13/4 tal lac harei peih bruk bầu cử Quốc hội pak Xyri. Hãng thông tấn karja Xyri ba khaw tin Raja-ei Xyri brei thau, dom mbang bầu cử Quốc hội Xyri jeng hu peih ngak yau dahlau diah yau tuk Raja-ei Xyri peih bruk bầu cử 4 thun sa mbang. Bruk bầu cử Quốc hội di Xyri hu brei thau tok dom tuk hadei di tuk Nga saong Mỹ njauk gauk brei padeih cuh phao pak Xyri meng harei 27/2 anak tal.

10/ Chủ tịch Cuba Ra-un Ca-xtơ-rô harei 22/2 hu brei ba 9 ribau urang lin nao piah jhul kadul likuk jit Zi-ka, taphia di nan ieu taong abih bhap bini brei paglaong bruk pacang cakak jit./.