1# patui danakdak mbang nyaom yaka 11 Quốc hội mbang 13, harei 24/3, dom urang Quốc hội ginum biai di tổ ka bruk patagok kinh te -xã hội thun  2015; bruk ngak hu dalam 5 thun 2011-2015 saong jalan patagok kinh tế-xã hội 5 thun 2016-2020 saong jalan pandar taneh 5 thun tukvak 2016-2020.

2/ Daok dalam tukvak puac vụ ngak padai đông xuân, min bhum gah ala kraong Lại Giang labik huyện Hoài Nhơn, tỉnh Bình Định daok rah tabiak bruk njom mbak. Di palei An Nghiệp, xã Hoài Mỹ, karja saong bhap bini daok duh hatai, kayua ia kraong dak harei dak thu nao. Ong Nguyễn Văn Lai, urang daok di palei An Nghiệp, xã Hoài Mỹ brei thau: Mblang hamu ini daok njom mbak. Yaok thun tok ngak hu vụ đông xuân, vụ hè njauk pok ar pacang mbak. Bo ar pacang mbak ngak meng tangin oh kajap. Ralo mikva daok di tapen kraong ini biak duh hatai, bilan hè mbak dak praong, dak glaong jang, thun hadei glaong jang thun dahlau.

3# Di huyện Cam Lâm, tỉnh Khánh Hòa, amuk Trương Mỹ Hoa, dahlau thiah ngak Phó akaok taneh ia, Chủ tịch kadung jien bac Vừ A Dính, Chủ nhiệm kalup kapul “kayua Hoàng Sa - Trường Sa anit ranam”  barau brei 120 paok jien bac ka anek saih bangsa takik saong di bhum tasik pulao di tỉnh Khánh Hòa. 70 paok jien bac hu kaoh meng kadung jien bac Vừ A Dính alin ka anek saih bangsa takik daok bac tan bac 5, yaok paok yaom 800.000 đồng; anek saih Trung học cơ sở saong Trung học phổ thông yaok paok yaom 1 triệu đồng. 50 paok jien bac brei ka anek saih di bhum tasik pulao, yaok paok yaom 1 triệu đồng hu kaoh meng kadung jien bac di kalup kapul “kayua Hoàng Sa - Trường Sa anit ranam ”.

4/ Urak ini hu labaih 2.378 bhap bini bangsa takik di tỉnh Bình Thuận hu taduan khoán khik iek labaih 86.431 ha glai. Kayua taneh glai taduan khoán biak praong, yaok baoh sang taduan khik iek labaih 36 ha, jalan nao mai kan kandah nan ye bruk pacang cakak khuah glai gaok ralo kan kandah, abih di nyu nan lac bilan pandiak yau urak ini. Ong Huỳnh Phi Hùng – akaok mban khik iek glai phòng hộ Phan Điền, huyện Bắc Bình, tỉnh Bình Thuận – labik hu labaih 12.500 ha glai hu jao khoán ka 313 baoh sang bhap bini bangsa Raglai xã bhum ceik Phan Điền brei thau: Glai di đơn vị khik iek nan lac glai khợp nan ye tuk bilan pandiak tal ye rah tabiak bruk khuah glai ralo. Thau lac yau nan, kol dahlak hu xác định bhum trọng điểm, piah pakhang veik dom tổ baoh sang jao khoán pambuak saong dom trạm. Yaok trạm khik iek meng 3 tal 5 tổ baoh sang jao khoán khik caga glai. Kol dahlak jeng pambuak saong chi cụ kiểm lâm tỉnh peih pasram ka mikva jalan pacang cakak khuah glai. Jalan ngak di kol dahlak pacang cakak nan lac bruk praong”.  

5# Tuariya saong njaom mbak ngak khat lahik yaok rabau hecta padai đông xuân saong xuân hè di tỉnh Sóc Trăng, jhul raidiuk di  bhapbini laik tame kan kandah, rilo sang mbuan si kurang pandap mbang, raidiuk lihik tani tanat saong oh hu jien piah buh tame pala drak ka vụ tal. Anak bruk ini, gah chuc nang tỉnh Sóc Trăng daok kham merat ba tabiak jalan ngak, sarak daong piah daong ka mikva samal tani tanat raidiuk.

6/ Di ban raya HCM, báo Tuổi trẻ barau peih mbang ndom meyai “janih oh brei pandar dalam raong glang – bruk hu mboh saong jalan langyah”. Tapa nan, urang ndom lac, jalan ngak siam abih piah palahik janih oh brei pandar dalam raong glang nan lac brei patagok bruk taong phạt ngan saong dom urang ngak sung. Suai lavik, dom jabat ruah duah ilamu brei ngak tabiak pajaih pabui hu năng suất glaong saong chất lượng glaong; ngak tabiak sa janih karei dalam raong glang, jeng ba mai kein laba min oh ngak jhak tal pren yava di urang blei mbang. 

7# Kapul daong urang ruak kathaot Tây Nam bộ pambuak bruk saong công ty Cổ phần Chuỗi thực phẩm TH barau brei 18 rabau lít ia tasau, yaom labaih 500 triệu đồng ka dom uranaih sang kan kandah di 13 tỉnh ban bhum taneran kraong Cửu Long. Yaom lac pandap sit min brei mboh bruk sangka di xa hoi tal dom adei sang kan kandah, daong dom adei hu pren kham merat yam tagok dalam raidiuk.

Patui di ini dom khau tin dunya:

8/ Danak dak lương thực dunya brei thau, jaik meteh dalam 22 tỉnh di Yemen daok eik lipa, kayua bruk mesruh metak song labaih 13 triệu urang brei hu daong pandap mbang.

9# Akaok gilang pariak patagok châu Á, ông Ta-kê-hi-đo Na-cao ndom lac kinh tế châu Á daok tagok khang yaom lac kinh tế Trung Quốc suai veik. Tui ông Na-cao, panuac khan ini hu ba tabiak meng bruk patagok khang kajap di dom nền kinh te barau tamuh karei dalam bhum ye Ấn Độ saong In-đô-nê-xi-a, tuk dua gah daok nduac tui dom salih barau gah kinh tế.

10/ Harei 23/3, Ngọai trưởng Palextin Rây-át En Man-ki brei thau, Ngoại trưởng Prang Giăng Mác A-rô meda nao rivang Bờ Tây piah ginum meyai bruk Prang dang tabiak peih sa nyaom meyai sron mbon dunya, langyah bruk  srau kadau Ixraen-Palextin./.