1/ “Var lisei boh sang bak hatai anit ranam” hu mintri ilamu Thể thao song Du lịch palih ruah ngak kadha di harei boh sang VN 28/6 thun ni. Mintri ilamu Thể thao song Du lịch brei peih bruk pathau khan, jak ba dom boh sang peih ngak var lisei boh sang di grauk labik dalam negar meng 17 tuk tal  19 tuk harei canecar harei 28/6, njauk tame harei boh sang VN.

2/ Gilang pariak đầu tư saong patagok VN (BIDV) – dhar BT barau jao yaom jien 300 triệu đồng brei kapul ngak ikan BT piah daong ka urang taong cap ikan tabiak tasik. Ini lac yaom jien dalam danak dak “Daong pren ka biển đông, daong ka urang ngak ikan tabiak tasik taong cap ikan di dom bhum tasik di taneh ia kayua Gilang pariak đầu tư saong patagok peih tabiak.

3/ Kapul urang nong huyện Trảng Bàng tỉnh Tây Ninh bahrau peih kadung jien dong ka urang nong tỉnh brei ka urang nong pala drak rong glang. Mbang ni hu 40 boh sang rong limo ia tasau di xã Gia Lộc song  Lộc Hưng hu mesraiy jien, yaok boh sang 15 triệu đồng piah tagok bruk rong limo ia tasau, pala cao su. Tukvak brei mesraiy 24 bilan, yaom liba 0,7% yaok bilan. 

4/ meng akaok thun tal ini, gah y tế tỉnh BRVT duah mboh 67 urang njom HIV bahrau, langiu di nan daok hu 21 urang njom HIV salih tapa tukvak AIDS saong 15 urang metai. Anak bruk ini, gah y tế BRVT hu peih ralo jalan ngak yau: iek ruak HIV/AIDS di labik daok; peih ngak danak dak pacang caga njom mbak meng amaik tapa anek.  

5/ Dalam bhum tây nam bộ hu labaih 1 triệu 200 ribau urang bangsa Khmer. Dalam dom thun tapa, meng dom sarak bangsa di Đảng song karja brei ka urang bangsa takik, bruk mbang ngui daok dang di bhum urang  dom bangsa takik, abih di nyu nan lac bhum urang bangsa Khmer hu patagok. Boh sang kan kathaot dalam bhum palei urang Khmer meng 103 ribau boh sang thun 2001 trun dok 60.800 ribau boh sang thun 2013.

6/ Tỉnh Đồng Tháp urak ini hu 34 xã, phường ban sit di 8 huyện, ban dalam tỉnh daok rah tabiak bruk jaleih haluk, atah abih tih labaih 38 km. Dalam nan, hu labik jaleih dalam tame meng 10m tal 40 m. Ong Đặng Ngọc Lợi, phaok giám đốc sở ngak nông saong patagok palei pala tỉnh ĐT brei thau:

Băng: “Kol dahlak hu ba tabiak jalan langyah chip. Dahlau di abih brei lum lubang xoáy atah takai kraong jaik 30m, dalam tame jaik 20 m saong brei ngak tabung piah khik caga ka tal angaok plaih glut jaleih ba cuah seik tabiak”. 

7/ Bilan 7 thun 2013, Chi cục Thú y tỉnh An Giang  hu palih ruah 162 drei limo binai pajaih lai sind, trak meng 200 kg tagok meng dom boh sang rong dok di 2 huyện Tri Tôn song Tịnh Biên piah ngak brei metian haong pajaih limo nhập khẩu Red Angus. Tapa nan, dom limo binai  metian hu jaik 100% song 5 boh sang camereip mek hu 11 drei limo anek lai Red Angus. Tui kuhria, tal luac bilan 7 thun 2014, Chi cục Thú y tỉnh meda dut iek labaih 150 drei limo anek lai tra.

Patui di ini dom khau tin dunya:

8/ Cảnh sát taneh ia Kê-ni-a barau cap hu labaih 3 rituh bala limen dalam mbang đột kích tame sa kho pandap di ban pabah lam nge Mombasa. Dom bala limen ini hu papaok sre dalam dom kadung ni long piah ba tabiak negar lingiu. Dalam dom bala limen ini hu 228 bala daok tamo saong 74 bala karei hu tagaik jeng ralo candiah. Meng akaok thun tal ini, taneh ia ini  lahik 18 drei tê giác saong 51 drei limen.  

9/ Rajaei Ixraen bahrau brei thau bruk kuhria padang 1 ribau 500 labik dok bahrau di Bờ Tây song Đông An Cút di Giê-ru-xa-lem. Bruk padang labik dok di Ixraen meng livik mai hu mong lac bruk ngak suan adat hukum di dunya. Min, yaom lac hu bruk phản đối di Palextin song menuac sia dunya, Ixraen jeng daok brei padang dom labik dok bahrau di angaok bhum taneh hu Palextin mong lac ban ine di Palextin di anak tal.

10/ Tổng thống Mỹ Ba-rắc Ô-ba-ma barau brei hoãn dom lệnh trừng phạt di Mỹ ngan song gah menyek di Iran. Tui nan, Mỹ sanya brei padeih dom kham merat piah ngak patrun yaom jien mek tame  meng bruk pablei menyek tabiak negar lingiu di Iran dalam 6 bilan tui “kế hoạch bruk ngak haong gauk” di Iran saong kapul P5 pagam 1./.