1#  Meng thun 2011 tal urak ini, dalam tỉnh Quảng Nam peih bruk dồn điền đổi thửa hu labaih 6.000 ha di 50 xã dalam 9 huyện, ban, patagok abih tih taneh hu dồn điền đổi thửa meng dahlau mai tal urak ini jaik 18.000 ha. Kadung jien karja tỉnh hu parabha ka dom puk palei dalam tukvak 2011-2015 jaik 30 tỷ đồng. 

2/ UB bhap bini ban sit Tuy Hòa, tỉnh Phú yên pambuak bruk saong gilang pariak công thương VN (VietinBank) peih bruk alin hadiah 252 baoh sang ka urang kan kathaot kayua gilang pariak daong. Dom urang dang akaok tỉnh Phú yên taong yaom glaong dom bruk ngak siam di Vietinbank dalam bruk patruh eik patrun kathaot, khik kajap an sinh XH dalam tỉnh; taphia di nan caong khin VietinBank  patui bruk sangka daong dom danak dak an sinh XH, bayar dhar phon di puk palei.  

3# Tui pathau khan di Sở Công Thương Bình Dương, dalam 10 bilan thun 2015, bruk xuất nhập khẩu daok patagok , xuất siêu 3 tỷ đô la Mỹ. Dom pandap  chủ lực hu kim ngạch pablei tabiak taneh ia langiu praong ye : Pandap kayau 10 bilan hu jaik 2 tỷ USD; pandap pưt jhik hu 1,66 tỷ USD, takhok klik hu 1,38 tỷ USD; lan am hu jaik 90 triệu USD...

4/ Ban Cần Thơ urak ini hu labaih 16.200 ha pala phun mbang baoh, sản lượng yaok thun hu labaih 186.500 tấn. Dom thun jaik di ini, ralo urang nông di huyện Phong Điền, quận Ô Môn, Thốt Nốt… salih tapa pala phun mbang baoh chuyên canh ngak jeng dom bhum baoh kayau đặc sản daong patagok năng suất, sản lượng bo daok ngak jeng ralo thương hiệu baoh kayau hu angan je, patagok yaom glaong saong kein laba ka urang nông.

5# Tal urak ini, dalam tỉnh Vĩnh Long hu 18/89 xã padang ngak palei pala barau mek hu Tiêu chí ka 6 (Cơ sở vật chất ilimo). Dalam 19 tiêu chí padang ngak xã hu chuẩn palei pala barau, Tiêu chí ka 6  lac sa dalam dom tiêu chí rik daong patagok tanut thụ hưởng ilimo, duh raidiuk tinh thần ka bhapbini palei pala, daok lac labik  peih nyaom biai, mít tinh, taom gaok kapul nyaom di karja puk palei…

6/ Melam nhạc Sol vàng, ngan saong kadha “Y Moan – Huyền thoại cao nguyên” hu rah tabiak di tukvak 20 tuk harei 14/11 di sang daoh Hòa Bình, ban raya HCM,  papar binguk tapak angaok VTV9 saong tiếp sóng angaok VTV Huế, rayo papar sap papar binguk Lâm Đồng saong rayo papar sap papar binguk Bình Phước. Dalam melam nhạc Sol vàng, ngan saong kadha Y Moan – huyền thoại cao nguyên, taha palei K’blin saong nhạc sĩ Nguyễn Cường – urang gru, ayut sahabat di Y Moan hu khan veik brei thau dom dalikan, hatai sahneng di drei ka urang anek di ceik glai. Dalam melam nhạc, dom tư liệu quý tuk nghệ sỹ bhap bini Y Moan daok diuk jeng hu ba tabiak yaih khan.     

Patui di ini dom khau tin dunya:

7# Thủ tướng Ấn Độ Narendra Modi (Na-ren-đra Mô-đi) harei 5/11 hu peih ngak 3 bruk ka ameh rilo tham vọng, hu tiền tệ hóa ameh, trái phiếu ameh saong jien xu meng ameh. Brei panuac hadei di tuk patabiak dom bruk nan, Thủ tướng Modi ndom lac, ini jalan nao njauk piah Ấn Độ patruh kathaot, taphia nan daong ba mai quyen luc ka urang kamei kayua urang kamei Ấn Độ oh hu hagiat langiu ameh. Thủ tướng Modi brei thau: ini lac bruk gheih mekre di ilimo Ấn Độ, nan lac hu sa hệ thống ba mai quyền lực ka urang kamei ngan saong bruk daong di ameh".

8/ Gilang pariak patagok châu Á (ieu lac ADB) barau mbaoh tangin brei mesraiy yaom jien  100 triệu đô la Mỹ brei ka TQ patagok dom dự án piah patrun bruk pandar năng lượng, pamaong tal bruk padeih pandar thủy ngân saong patrun phát thải khí nhà kính jeng yau khí độc hại dalam gah hóa chất. Dự án angaok nan hu peih ngak dalam 5 thun saong tui kuhria hu ngak salah bloh di bilan 2/2021.

9# Gah hàng không saong vũ trụ Mỹ (NASA) barau brei thau lac samal pilih ruah dom phi hành gia barau, yau sa binah dalam bruk kham merat piah caga ba anek menuac tagok Sao Hỏa. Giám đốc NASA Charles Bolden (Sác-lơ Bôn-đân) brei thau, kapul dom urang thám hiểm vũ trụ barau ini di Mỹ hu ilamu piah ba bruk roh duah Sao Hỏa tagok glaong jang jeng ye daong peih bruk ba anek menuac yam takai tagok hành tinh bhong./.