1#/ Ban sit Lào Cai tỉnh Lào Cai hu  7 đơn vị palih ruah, song jiak  79 ribau cử tri. Dalam dom bruk kuhria caga puac di abih ka harei palih ruah 22/5 anak tal, ban sit Lào Cai hu ngak pasiam, njauk hukum piah ka dom ứng cử viên taom gaok, tui pang hatai cong khin di cử tri, jang yau yaih khan danak dak bruk ngak di drei. Dom xã phường daok tui iek, cập nhật danh sách cử tri nao ngak mbang atah piah ka mik va meda mai sang plaik phiếu njauk harei palih ruah.

2/ Sang bac phổ thông bangsa bán trú Tiểu học Nậm Khắt di xã Nậm Khắt, huyện Mù Cang Chải, tỉnh Yên Bái hu 99% anek saih lac anek kamuan bangsa. Meng thun 2014, sang bac hu peih bruk “sang bac siam mekre, anek saih tari tarieng”. Meng bruk kham merat di gru saong anek saih, thun 2015, sang bac mek hu tanut pakat negar, 99% anek saih di sang bac hu bac ginup danak dak, sang bac oh daok bruk anek saih klak bac.

3#/ Ngak tui panuac ieu di Trung ương Hội Chữ thập đỏ Việt Nam, harei 10/5, Hội  Chữ thập đỏ ban đà Nẵng tabiak bruk jak ba dong bhap bini gaok kan kandah kayua pandiak bhang, njom mbak di dom tỉnh gah kreik negar - Tây Nguyên song bhum taberan krong CL. Bruk jak ba ni dui atah tal abih harei 30/6, rik pataom jien ndua, padai brah, pandap pandap dong ka mik va di bhum gaok bala.

4/ Kadung jien daong UBMT negar tỉnh NT barau taduan hu 3,3 tỷ đồng di dom kapul nyaom, doanh nghiệp daong bhap bini bhum njauk pandiak bhang dalam tỉnh. Yaom jien ini hu UBMT negar tỉnh NT parabha ka 6 huyện lac: Bác Ái, Ninh Sơn, Thuận Bắc, Thuận Nam, Ninh Hải saong huyện Ninh Phước, yaok huyện 250 triệu đồng. Daok 100 baoh sang bhap bini daok di xã Bắc Sơn, huyện Thuận Bắc, yaok baoh sang hu daong sa triệu đồng. UBMT negar tỉnh NT hu kaoh tabiak 300 triệu đồng blei 30 tấn brah brei ka mikva bhum pandiak bhang dom huyện Ninh Phước, Thuận Bắc saong Thuận Nam.

5#/ Hadei di labaih 10 harei khik iek, pacang cakak, huyện Tuy Phong, tỉnh Bình Thuận pasang iek hu bruk an ninh trật tự kayua urang langiu tỉnh tuh tame labik ni duah trầm. Hạt kiểm lâm pambuak bruk song po glai song công an xã padang dom labik pacang cakak di pambah mbang glai, nan ye samar duah mboh urang bahrau mai duah trầm. Cảnh sát giao thông huyện Tuy Phong gam tui iek di angaok jalan ba tal xã Phong Phú piah duah dom radeih lạ pajeng tuai oh hu harak gar, tapa nan xử phạt hành chính song pandar nao veik palei.

6/ Thành đoàn ban raya HCM hu peih parang iek rup thoat ngan saong kadha “75 thun, kapul drei praong tagok haong taneh ia”. Parang iek yaih khan labaih 150 blah thaot ka bruk ngak di thiếu nhi ban raya ngan saong dom bruk “Uranaih sit ngak bruk sit, dak padang ban raya anh hùng”. Hu mbaok dalam parang iek, adei Nguyễn Ngọc Thanh Trà – anek saih tal 5, sang bac Tiểu học Mê Linh, quận 1, ban raya Hồ Chí Minh lac: “Tame đội thiếu niên tiền phong anek sanya ngak tui 5 paka Wa Hồ pato, piah jeng anek jat gheih, bac daa naih joi”  

7#/ Dalam dom harei tapa, hu bruk ikan rong bè di angaok krong Cái Vừng, huyện Phú Tân, tỉnh An Giang nyu metai. Tui kuhria mboh oh ka ginup abih, hu labaih 9 tấn ikan điêu hồng, ikan he, di jiak 40 boh sang rong njauk khat lihik. Anak bruk ikan rong bè metai, gah chức năng hu panuac tacei dom boh sang raong ikan paduan ba lồng bè nao labik karei hu jalan ia siam jang, peih cadik ia ka ikan, pataom mek ikan metai oh caik ka nyu jhak tal môi trường.

Patui di ini dom khau tin dunya:

8/ Hadei meng rilo kham merat di dunya, bruk ginum meyai sron mbon ka Y-ê-men hu pambuak veik di Cô-oét. Tui nan, 3 kapul ngak bruk haong gauk di rajaei Y-ê-men saong phiến quân hu padang tagok di adit dahlau, hu taom gauk veik piah piah ginum meyai dom bruk praong nan lac: bruk ba kapul phiến quân tabiak truh dom bhum taneh meblah mek thun 2014, jao vũ khí di phiến quân, lui urang guc saong thỏa thuận ka bruk chính trị.

9#/ Urang brei panuac di  Tổng thư ký Liên hợp quốc Xtê-phân Đu-gia-rích brei thau, kuhria meng akaok thun ni hu labaih 780 ribau urang Xy ri di dom labik mesruh metak kan si taduan hu pandap dong pahla. Ong Đu-gia-rích ndom lac, dalam bilan 4 song bilan 5 meng bloh, yaok pluh ribau urang taduan hu pandap dong pahla dunya.Dalam nan, ia menyum, pandap mbang, dụng cụ vệ sinh song dom janih karei karei hu tal tangin labaih 3 ribau urang Xy ri di tỉnh Hôm song 35 ribau urang di ban sit  Blu-đan meng bloh.

10/ Gah y tế Ôn-đu-rát brei thau, taneh ia trung mỹ ini barau hu sa urang akaok meti lac sa uranaih jaik ndih tapui meda njauk ruak akaok sit kayua amaik njom virut Zika. Ong Phran-xit Con-tre-rát, Thứ trưởng mintri y tế Ôn-đu-rát brei thau, urang kamei njauk Zika daok metian 6 bilan. Tapa siêu âm, dom bác sĩ medil lac adei jaik hu ndih tapui tabiak meda njauk ruak akaok sit, sa dị tật bẩm sinh pambuak tal patagok glo akaok./.