1/ Sở Ilamu Thể thao song Du lịch Đà Nẵng bahrau peih bruk nghiệm thu song jao brei 3 danak dak Đình làng Hưởng Phước (xã Hòa Liên, huyện Hòa Vang); đình làng An Ngãi Đông (xã Hòa Sơn, huyện Hòa Vang) song  đình làng Khuê Bắc (phường Hòa Hải, quận Ngũ Hành Sơn). Thun 2015, 3 ngôi đình dok di Đà Nẵng hu pasiam veik song tong abih phun jien jiak 9 tỷ đồng meng kadung jien karja ban ĐN, daok dalam danak dak “ Khik ramik song patagok inem krung ilamu phi vật thể ban sit ĐN, tuk vak 2013-2015”. Ni lac dom ngôi đình di inem krung pakat ban sit, njauk khut khat trak,  nan ye hu ban ĐN pasiam veik dalam thun ni.

2/ Sarak nyaom roya huyện Tánh Linh, tỉnh BT ba tabiak bruk ngak meng thun 2010 tal 2015, tuh bê tông meng 40 tal 50% dom jalan mbak palei pala. Tal urak ini, Tánh Linh hu ngak salah bloh labaih 140 km jalan bê tông, mek hu 100% tanut sarak ba tabiak. Eng jalan katak song bê tông hóa ngak hu labaih 120 km, ngan saong abih tih yaom jien labaih 1.710 tỷ đồng. Phun jien nan kayua karja saong bhap bini daong. Ngak salah bloh jalan mbak palei pala, rik daong ka bruk taom gaok ndom meyai nao ilamu saong patagok kinh tế huyện Tánh Linh di dom bhum dalam tỉnh.

3/ Labaih 200 drap ar song jiak 100 thoat binguk, brei mboh ilamu hadah krah di urang Chăm yau Văn bản akhar haroh vak di angaok baar, khan aow di urang Chăm song tanyah pet, nyim bingu la, khan bac song dom janih pandap pabak ka rai duik yaok harei hu yaih khan tal bhap bini dalam mbang parang iek  “ Ilamu Chăm Ninh Thuận” hu peih ngak di muinyim tỉnh NT. Langiu di nan, ni jeng lac mbang camereip bhap bini hu mong iek dom janih pandap bahrau duah hu dalam tuk peih bruk duah thau di di chỉ tháp Hòa Lai. Sa inem krung di labik Hòn đỏ, Mỹ Tường di xã Nhơn Hải, huyện Ninh Hải dalam nan hu kapak patau, candiak lan, patau thạch anh, ngak ka tuai damuai takre. Mbang parang iek hu dui atah tal harei 15/11.

4/ Di ban Vũng Tàu, tỉnh Bà Rịa – Vũng Tàu barau rah tabiak mbang pakacah daoh tamia chuyên nghiệp pakat negar mbang 2 thun 2015 kayua mintri ilamu thể thao saong DL peih tabiak. 21 đơn vị nghệ thuật daoh tamia chuyên nghiệp dalam negar ngan saong labaih 1000 diễn viên hu mbaok tame pakacah. Mbang pakacah hu peih tabiak 3 thun sa mbang piah taong yaom chất lượng nghệ thuật, kein laba bruk ngak, taphia di nan tacei jalan patagok ka dom thun patui ngan saong dom đơn vị nghệ thuật, daoh tamia chuyên nghiệp dalam negar. Ini lac tuk piah dom đơn vị nghệ thuật, dom nghệ sĩ taom gaok, ndom meyai nao mai, bac megru ilamu, duah thau sáng chế barau dalam nghệ thuật, pok meyaom dom kapul nyaom, menuac urang hu thành tích xuất sắc dalam bruk ngak nghệ thuật.

5/ Peih bruk “5 oh 3 hacih”, urang kamei tỉnh Hậu Giang hu labik dang biak prong dalam bruk padang ngak palei pala bahrau di puk palei. Dalam nan peih ngak tanut “ Boh sang oh eik lipa kan kathaot”, dom pakat Hội hu dong ka labaih 33.000 adei saai kamei mesraiy jiak 500 tỷ đồng, saong dom pok jien karei hu labaih 200 tỷ đồng piah dong ka urang kamei peih dom bruk ngak mbang patruh kan kathaot song patagok jien mek tame ka boh sang.

6/ Đề án miuyim sajarah dak rai tự nhiên bhum taneran kraong Cửu Long kayua sang bac đại hco5 Cần Thơ soạn thảo saong dang akaok peih tabiak. Phaok giáo sư tiến sĩ Hà Thanh Toàn, hiệu trưởng sang bac đại học cần thơ, akaok mban jak ba padang đề án brei thau: miuyim sajarah dak rai tự nhiên hiện đại, rik daong ka bruk patagok ilamu, tham quan DL, pato pakai bhap bini saong paglaong kinh tế XH di ban cần thơ saong bhum taneran kraong Cửu Long.

7/ Meng bloh, di sang ilamu dam dara ban raya HCM rilo anek saih, SV hu mbaok piah pachreih ka vòng loại pakacah hùng biện sap Anh mbang ka 4 thun 2015 kayua sang ilamu dam dara ban raya HCM peih ngak hu angan “ Dam dara ranaih umo song lagu bangsa VN”. Mbang pakacah lac sa mblang chuyên nghiệp piah ka dom ayhut brei mboh tài năng anh ngữ song bruk duah thau ka lagu meng kan.

Patui di ini dom khau tin dunya:

8/ Viện Hà Lâm ilamu hoàng gia Thụy Điển hu brei thau po di giải Nobel y học thun 2015 lac 3 urang ilamu bangsa Ireland, Nhật Bản saong Trung Quốc, ngan saong dom bruk ruah duah ka dom jalan iek ruak barau piah pacang veik ruak kayua ký sinh trùng. Cambaih laih nan lac, dua urang ilamu William Campbell, urang asal Ireland saong Satoshi Omura, urang Nhật Bản, hu pok meyaom kayua dom bruk duah mboh pambuak tal jalan iek ruak barau pacang veik saong bruk nhiễm trùng kayua ký sinh trùng giun gol rah tabiak.

9/ Akaok mintri ngoại vụ anh Thê-rê-xa Mây hu panuac ieu Liên minh Châu Âu jhul pakhang bruk trục xuất dom urang oh ginup harak gar likau tị nạn, dalam tuk vak nyaom ni dok kham merat pacang caga bruk khủng hoảng tị nạn prong abih dalam rilo pluh thun tapa. Tui Akaok mintri Thê-rê-xa Mây, rajaei Anh hu panuac ieu meda taduan 20 ribau urang Xiry meng dom trại tị nạn dalam 5 thun tal./.

10/ Mintri ngoại giao TL hu daa đại sứ In-đô-nê-xi-a L.Ra-úp mai tal jabat mintri ini piah duah jalan ka bruk sauk kayua dom mbang khuah glai di In-đô-nê-xi-a L par tapa, ngak kan kandah tal dom tỉnh gah meraong TL, labik pachreih ralo tuai DL. Dom doanh nghiệp dalam bhum Đông – Nam Á lahik yaok triệu đo la Mỹ kayua gaok kan kandah di sauk meng mbang khuah glai di In-đô-nê-xi-a L dalam luac sa bilan tapa./.