1# Ủy ban pilih ruah negar barau brei adat ka tỉnh Lai Châu peih bruk pilih ruah dahlau jang di 3 xã: Tá Bạ, Tà Tổng saong Mù Cả di huyện Mường Tè. Tui nan, bruk pilih ruah di ini meda hu Ủy ban pilih ruah tỉnh Lai Châu peih ngak dahlau 7 harei duk saong harei pilih ruah di negar, nan lac rah tabiak di harei 15/5/2016. 3 xã Tá Bạ, Tà Tổng, Mù Cả hu 6.095 cử tri rilo meng lac bangsa Mông, La Hủ, Hà Nhì, ngan saong 32 tổ pilih ruah. Makna peih bruk pilih ruah dahlau di ini lac kayua 3 xã ini lac xa kan kandah, hu taneh praong, ceik glaong, hu rilo kraong ribong pacang cakak nan ye nao mai kan kandah. Abih di nyu nan lac, labik buh phiếu di dom bản atah di pasak xã, dalam tuk nan bruk thông tin liên lạc oh ka siam, yau nan ye kan kandah tal bruk buh phiếu di cử tri.

2/ harei 19/4, karja ban sit Hội An, tỉnh Quảng Nam ieu pataom jaik 1 rituh ca nô ba abih 1.200 tuai daok gar angaok pulao Cù Lao Chàm tame baoh tame hu siam mekre. Dahlau di nan harei 18/4, angaok bhum tasik Cù Lao Chàm hu ngin ribuk gam tui hajaln praong, tasik riyak khang, ngak brei kapal DL pajeng tuai oh mai veik baoh taneh hu. Jaik 1.200 tuai damuai dalam saong langiu taneh ia tabiak rivang DL di pulao Cù Lao Chàm njauk daok veik di pulao. Ini lac mbang ka 3 meng tuk pulao Cù Lao Chàm ba tame ngak DL, tuai njauk gar veik di pulao biak ralo.

3 # Meng akaok thun tal ini, tỉnh Sóc Trăng hu labaih 480 urang ruak pandiak tabiak darah, tagok 75% duk saong dom bilan ini thun dahlau; dalam nan hu 27 urang ruak trak, rilo meng lac di ban sitVĩnh Châu, Trần Đề saong ban sit Sóc Trăng. Anak bruk ruak pandiak tabiak darah patuh khang dalam tỉnh, gah Y tế  tỉnh Sóc Trăng pataom tame pathau khan ka bhapbini paglaong akaok sahaneng caga jit ruak; peih bruk pametai lăng quăng, pruh jru pametai jamaok di dom labik hu jit ruak; pasang iek catang dom urang ruak pandiak tabiak darah saong langyah samal dom sruh jit barau ptuh, oh caik ka nyu pambak praong.

4/ Hadei di sa tukvak pandiak bhang dui atah, di ban sit Buôn Ma Thuột, tỉnh Đắc Lắc hu hajan akaok bilan. Hajan khang tok dui atah dalam dom PLUH minit, min ngak ka ban it Buôn Ma Thuột la-ar jang hadei di tukvak pandiak bhang, pabak ia pandar saong daong ka ralo taneh phun pala di puk palei.                           

5# Tiền Giang hu labaih 2.300 urang jaoh jo kayua bala di tuk ngak bruk saong ruak bẩm sinh saong labaih 1.000 urang sup meta. Thun blaoh, dom kapul pahla, xa hoi hu daong labaih 1,3 tỷ đồng piah daong jaik 1.300 urang jaok jo blac raih đục thủy tinh thể, alin radaih lăn, radaih lắc; padang sang jum pataom saong alin pandap, jien bac ka anek saih, urang jaoh jo kathaot. Ông Lê Văn Khôi, akaok kapul urang sup meta tỉnh Tiền Giang brei thau: “Meda lac raidiuk di urang sup meta ini hu tani tanat. Urang kathaot trun yaok thun 2%. Urang kathaot gaok kan kandah jeng hu min oh daok sang eik. Anak tal, Kapul meda peih dom tan xóa mù iek ruak Brai. Kapul daok peih bruk brei ka hội viên mesraiy jien piah pala drak, raong glang saong pablei salih sit ”. 

6/ Bhum taneh padai tỉnh An Giang bhian dang anak bruk jaleih takai kraong. Dalam tỉnh urak ini hu 56 labik kraong mbuan jaleih taneh. Sa dalam dom makna hu thau lac kayua kurang phù sa. Bruk ini daok ngak oh tani tanat ka sa bhum taneh praong. Saai Nguyễn Văn Cung daok di gah đầu nguồn tỉnh An Giang brei thau: “Urak ini nguy hiểm lo, jaleih gam gam. Tuk halei jeng huac, daok oh sahanang hatai”.

7# Kiên Giang lac tỉnh hu menuac sia rilo, abih tih jaik 1 triệu 800 rabau urang, dalam nan bhapbini bangsa Khmer meblah 12%. Yaom lac bruk menek di tỉnh mek hu tanut menek thay thế, min oh ka kajap. Dom thun tapa, Kiên Giang daok jhul khang bruk pathau khan trun menek ka bhum atah bayah, bhum tapeng tasik, pulao kaoh, abih di nyu nan lac bhum bhapbini bangsa Khmer; patabiak bruk xã, phường tut angan peih bruk oh hu urang menek ka 3 di dom puk palei oh ka ngak siam bruk dân số - kế hoạch hoá gia đình. Yau nan ye, urak ini, bruk dân số - kế hoạch hóa gia đình di Kiên Giang hu siam lagaih, daong tapak tal bruk patagok kinh tế - xã hội.

Patui di ini dom khau tin dunya:

8/ Tui số liệu barau abih, dom urang metai dalam mbang megei baoh taneh khang 7,8 độ Ríchte di Êcuađo melam 16/4 tagok tal 350 urang saong labaih 2 ribau 500 urang karei njauk rambuah. Urang ngak praong taneh ia ini khan lac, dom urang metai meda hu ralo jang tuk daok hu ralo menuac gar dalam dom sang jaleih. 

          9# Dom mbang par thương mại di mblang par Ku-ma-mô-tô, Nhật Bản, hu peih veik di harei 19/4, 3 harei hadei di tuk rah tabiak mbang megaiy baoh taneh khang 7,3 độ ríchte. Yaom lac hu hasit kan kandah di hệ thống xử lý hành lý di mblang par, min gah giới chức mblang par brei thau, abih tih hu 18 mbang par thương mại hu peih veik dalam harei 19/4.

10/ Jeng dalam harei 19/4, Mỹ khan lac hu brei sa kapul hu ilamu gah bala meng lingik tasik nao daong Ê-cu-a-đo pasiam dom khut khat kayua bala hadei di mbang MEGEI baoh taneh khang 7,8 độ rích-te, ngak takik di abih 413 urang metai. Dom chuyên gia Mỹ hu daong rajaei Ê-cu-a-đo taong yaom bruk khat lahik, kuhria pandap daong jeng yau langyah bruk pak nan./.