1# Phòng Cảnh sát Môi trường- Công an ban sit Đà Nẵng pambuak bruk saong Chi cục raong glang saong Thú y ban sit peih bruk pasang iek đột xuất, duah mboh labik ngak limek o hacih saat. Nan lac cơ sở di ông Nguyễn Đăng Hoành daok di jalan Âu Cơ, phường Hòa Khánh Bắc, quận Liên Chiểu, ban sit Đà Nẵng. Cơ sở ini daok ngak tóp limek di labik oh hacih saat, daok jaik hố ga. Tuk pasang iek, po cơ sở oh hu harak hagait pambuak tal bruk ngak limek động vật ye : harak adat ngak mbang, pablei salih, harak chứng nhận hacih saat an toan pandap mbang.

2/ Di huyện Krông Pa, tỉnh Gia Lai hu hajan ribuk khang di ralo labik. Ribuk ngak ka labaih 200 baoh sang di dom xã Ia Rsai, Uar, Chư Rcăm saong Ia Rsươm par tabung; ralo taneh pala njam patam jaleih, khut. Langiu bruk daong jien piah blei ton, huyện  Krông Pa jeng hu tacei pato dom xã saong gah chức năng daong padang veik sang, daong ka bhap bini samar tani tanat rai diuk.

3# Di gilang tapuk huyện Đắc Hà, Sở Thông tin saong Truyền thông tỉnh Kon Tum  pambuak bruk saong Uỷ ban bhapbini huyện Đắc Hà peih harei tabiak bruk pachreih tui harei tapuk Việt Nam tỉnh Kon Tum mbang yaka 3 thun 2016. Harei tapuk Việt Nam mbang yaka 3 thun 2016 di tỉnh Kon Tum hu rilo bruk ngak ye : yaih khan tác phẩm, tác giả, tapuk vak ka Kon Tum. Adei Phạm Thị Hồng Hạnh, anek saih tal bac 11, sang bac Trung học Phổ thông Trần Quốc Tuấn, huyện Đắc Hà brei thau : “Adei mboh biak bui sambai. Thei jeng chreih chrai saong bruk puac tapuk. Hu mbaok tame harei pataom tapuk ini, daong siam ka adei biak rilo”

4/ Urak ini, di tỉnh Cà Mau hu labaih 330 labik ngak ikan katho thu, pachreih hu labaih 2.500 urang ngak, jien mek tame 2 triệu đồng sa urang sa bilan. Yaok thun, dom labik ini pablei tabiak darak pasar meng 10 tal 15 tấn ikan thu. Ini lac bruk ngak meng kan, phun jien buh tame takik min kein laba glaong, lagaih saong bruk ngak mbang di urang nông.

5# Hadei di dom bilan pandiak bhang khang, harei 18/4 di tỉnh Bình Phước hu sa mbang hajan praong gam tui ngin ribuk khang, ngak khat lahik trak di dua huyện Lộc Ninh saong Bù Đốp. Ngin ribuk khang ngak par tabung 15 baoh sang,  jaleih labaih 6.400 got amriak kalu, khat lihik yaok tỷ đồng. Anak bruk nan, tỉnh Bình Phước brei gah công an, bộ đội, dân quân, urang đoàn damdara trun tal dom labik gaok khat lihik piah daong pasiam dom khut khat, daong ka bhapbini samal tani tanat raidiuk.

6/ Bruk pak havay krem meng kan di huyện Hòa Thành, tỉnh Tây Ninh hu meng lavik samar mai saong hu ba bruk ngak gam gam ka labaih 1.200 urang ngak dalam palei. Urak ini daok hu labaih 400 baoh sang ngak bruk ini ngan saong yaom jien mek tame meng 2 triệu meteh tal 3 triệu đồng sa urang sa bilan.

7# Pandiak bhang dui atah labaih sa bilan ini mai ngak ka urang ruak mai iek ruak di dom sang iek di ban raya Hồ Chí Minh tagok glaong. Dua sang iek ruak  Nhi Đồng 1 saong Nhi Đồng 2 jeng hu biak ralo urang ruak mai iek ruak. Dua sang iek ruak hu ralo uranaih ruak  jalan hô hấp kayua sang pandar kadhik máy saong máy la ar, saong dom ruak jalan tiêu hóa. Bác sĩ Hoàng Lê Phúc, akaok khoa Tiêu hóa, sang iek ruak Nhi Đồng 1 brei thau : “Urang amaik njauk caik hatai, brei ka nek menyum rilo ia piah caga  lihik ia. Sangka ba anek nao iek ruak, tuk mbohc pandiak glaong kan si trun, uranaih mahu ia biak rilo. Nan lac dấu hiệu di lihik ia, meda ba tal lihik ia trak.”

Patui di ini dom khau tin dunya:

8/ Prang daok hu jalan salih barau bruk ngak di gah cảnh sát taneh I ini piah paglaong ilamu di cảnh sát dalam bruk langyah dom kadha mbuan ba tal srau kadau gah an ninh yau dom mbang khủng bố di ban ine Pari, Prang di bilan 11 thun bloh.

9# Đại hội đồng Liên hợp quốc barau peih mbang nyaom piah ginum biai bruk pacang caga pandar ma túy suan hukum. Brei panuac di tuk peih mbang nyaom, akaok Đại hội đồng Liên hợp quốc mbang 70, ông My-ô-gen Lích-kê-tốp  ndom lac, pacang caga bruk pandar ma túy piah siam ka pren yava bhapbini, quyền anek menuac saong bruk patagok khang kajap di dunya. Saong ini jeng lac trách nhiệm di menuac sia dunya. Ông My-ô-gen Lích-kê-tốp jeng hu panuac ieu menuac sia dunya ba tangin tame pacangg cakak saong bruk pandar ma túy suan hukum.

10/ Rajaei Ê-cua-đo brei thau, dom urang metai dalam mbang Megei baoh taneh khang 7,8 độ rích te di taneh ia ini puac adit bloh lac 480 urang. Mbang megei baoh taneh jeng ngak ka labaih 4 ribau urang karei njauk rambuah. Urak ini jeng daok 231 urang lahik./.